Un Bida Cu Mi No A Lamenta Nunca

MANERA PAUL OBRIST A RELAT’E

Na 1912, ora mi tabatin seis aña, Mama a muri ora e tabata dunando lus na su di cincu yu. Rond di dos aña despues, un criá hóben, Berta Weibel, a cuminsá cuida nos famia. Ora Tata a casa cuné su siguiente aña, como mucha nos tabata contentu pa tin un mama atrobe.

NOS tabata biba na Brugg, un pueblo chikitu den e parti di abla aleman di Suisa. Berta tabata berdaderamente un persona cristian, i mi tabata gust’é mashá. El a cuminsá studia e publicacionnan dje Studiantenan di Bijbel (Testigonan di Jehova) na 1908, i e tabata compartí cu otronan loke el a siña.

Na 1915, djis despues cu Tata i Berta a casa, mi a bai cuné na un funcion di e “Foto-Drama di Creacion.” E presentacion aki di ‘slides’ i película di e Asociacion Internacional di Studiantenan Sincero di Bijbel a laga un impresion profundo riba mi mente i curason. Otro hende cu a asistí tambe a keda impresioná. E sala na Brugg tabata asina yen, cu polis a cera e portanan i a manda esnan cu tabata yega despues pa bai bek. E ora ei hopi a purba drenta dor di un bentana habrí usando un trapi, i algun a logra.

Mama Su Ehempel Excelente

E tempu ei Guera Mundial I tabata causando hopi angustia na Europa, i hende tabatin miedu tocante futuro. Pues, pa yama di cas pa cas cu e mensahe consolador dje Reino di Dios, manera mi mama di criansa tabata haci, tabata un tarea noble. Algun biaha e tabata lagá mi compañ’é, i mi tabata disfrutá mashá di esaki. Na 1918, Mama finalmente por a simbolisá su dedicacion na Jehova Dios pa medio di bautismo bou di awa.

Tata no a interferí cu Mama su adoracion te na su bautismo, pero e ora ei el a cuminsá opon’é. Un dia Tata a coge su literatura bíblico i tir’é den kachel. Mama a logra saca solamente su Bijbel for dje candela. Pero loke el a haci despues tabata asombroso. El a bai cerca Tata i a bras’é. E no a carga ningun rencor contra dje.

Totalmente sorprendí, Tata a calma. Sin embargo, de bes en cuando, su oposicion a intensificá, i nos tabatin cu soportá su explosionnan.

Empleo i Progreso Spiritual

Na 1924, despues di a completá tres aña di aprendis como barbero, mi a bandoná cas i a haña trabou den e parti di abla frances di Suisa. Esaki a duná mi oportunidad pa mehorá mi conocimentu di e idioma frances. Aunke e mudansa a stroba mi progreso spiritual un poco, mi nunca a perde mi amor pa e berdad di Bijbel. P’esei ora mi a regresá cas seis aña despues, mi a cuminsá asistí n’e reunionnan dje congregacion cristian na Brugg.

Djis despues di esei mi a muda pa Rheinfelden, un pueblo chikitu rond di 40 kilometer leu. Mi a traha ei den e pelukeria di mi ruman muher i a sigui cu mi progreso spiritual dor di reuní cu un grupo chikitu di Studiante di Bijbel. Un dia ora nos a terminá nos studio di Bijbel di meimei di siman, Ruman Soder, e anciano encargá cu e grupo, a puntra: “Ken ta planea pa participá den e ministerio di veld diadomingo?” Mi a ofrecé mi mes, asumiendo cu lo mi a compañá un ruman i cu lo el a siñá mi con pa haci e trabou.

Ora diadomingo a yega i nos a yega nos teritorio, Ruman Soder a bisa, “Señor Obrist lo traha aya banda.” Aunke mi curason a bati mas lihé cu nunca promé, mi a cuminsá bishitá e hendenan den nan cas i papia cu nan tocante e Reino di Dios. (Echonan 20:20) For dje tempu ei padilanti, nunca mi a vacilá pa efectuá e trabou di predicá cu Jesus a bisa mester ser realisá promé cu e fin dje sistema di cosnan aki yega. (Mateo 24:14) Dia 4 di mart, 1934, ora mi tabatin 28 aña di edad, mi a simbolisá mi dedicacion na Jehova Dios pa medio di bautismo bou di awa.

Dos aña despues mi a haña trabou como barbero na Lugano, un stad den e parti di abla italiano di Suisa. Mesora mi a cuminsá predicá e bon nobo ei, aunke mi por a papia masha tiki italiano. Tog, durante mi promé diadomingo den e ministerio, mi a laga e 20 foyetonan cu mi tabatin huntu cu mi. Cu tempu, mi a logra reuní algun persona interesá pa forma un grupo pa studia E Toren di Vigilancia. Despues di tempu un cantidad di esakinan a ser bautisá, i na februari 1937 nos a forma un congregacion di Testigonan di Jehova na Lugano.

Dos luna despues, na april 1937, mi a ricibí un carta cu a cambia mi bida dramáticamente. E tabata un invitacion pa sirbi na Betel, manera e facilidadnan di sucursal di Testigonan di Jehova den un pais ta ser yamá. Mesora mi a aceptá e invitacion—un decision cu mi no a lamentá nunca. Asina mi a cuminsá loke a bira un carera di 60 aña den e ministerio di tempu completo.

Sirbishi di Betel den Tempu Turbulento

N’e tempu ei e Betel di Suisa tabata situá den e stad di Bern, capital di Suisa. Ei nos tabata imprimí buki, foyeto i revista den 14 idioma, i esakinan a ser mandá na tur parti di Europa. Na algun ocasion, mi tabata hiba e literatura imprimí n’e stacion di trein cu krenwá [caretia], ya cu den e dianan ei nos no tabata disponé semper di un van. Mi promé asignacion na Betel tabata den e Departamento di Composicion, unda nos tabata traha e plachi di metal for di cua nos tabata imprimí literatura. Pronto mi a cuminsá traha na recepcion, i, naturalmente, mi a sirbi tambe como barbero p’e famia di Betel.

Na september 1939, Guera Mundial II a dal aden, i e atake nazi a plama teror na tur parti di Europa. Suisa tabata un pais neutral net meimei dje nacionnan cu tabata den guera contra otro. Inicialmente, nos a sigui cu nos actividad cristian sin interferencia. Anto, dia 5 di juli, 1940, dos or di merdia, miéntras mi tabata na mi lesenar den e sala di recepcion, un polis na civil a presentá, compañá pa un soldat cu tabatin un rifle cu un bayonet montá riba dje.

“Unda Zürcher ta?” e polis na civil a grita. N’e tempu ei Franz Zürcher tabata e superintendente di sucursal di nos trabou di predicá na Suisa.

“Ken mi por mi bisa ta puntra p’e?” mi a puntra. Mesora nan a gará mi i lastrá mi subi e trapinan, exigiendo pa mi hiba nan n’e oficina di Zürcher.

Henter e famia di Betel—nos tabata mas o ménos 40 e tempu ei—a ser ordená pa reuní den e comedor. Cuater soldat cu mitrayeur a ser posicioná pafó dje edificio pa desanimá cualkier persona di purba hui. Paden, rond di 50 soldat a cuminsá listra e edificio. Contrario na loke nan a spera, nan no a haña ningun evidencia cu Testigonan di Jehova tabata enbolbí den promové resistencia contra servicio militar. Tog, gran cantidad di literatura a ser confiscá i hibá den cincu truck di ehército.

Ora nos a nenga di permití autoridadnan gubernamental dicidí riba contenido di E Toren di Vigilancia, a stop di publik’é na Suisa. Esaki a nificá cu ménos personal tabata necesario p’e trabou na Betel, i miembronan mas yong dje famia a ser animá pa bai i bira pionero, manera Testigonan di Jehova cu ta traha den e trabou di predicá tempu completo ta ser yamá.

Trahando Pionero Durante Tempu di Guera

Na juli 1940, mi a regresá n’e área di abla italiano di Suisa cerca di Lugano, caminda mi tabata biba promé cu mi a bini Betel. E teritorio fiel católico aki, cu pa e tempu ei tabata tambe bou dje influencia fuerte di facismo, a bira mi asignacion como pionero.

Rara bes a pasa un dia sin cu polis a pará mi i exigí pa mi stop cu mi actividad di predicá. Un dia miéntras mi tabata papiando cu un señora na un porta di curá, un homber bistí na civil a gará mi di patras, hincá mi den un auto di patruya i hibá mi Lugano. Ei el a entregá mi na polis. Ora mi a ser interogá, mi a splica nan cu Jehova Dios a manda nos predicá.

“Aki riba tera, ta nos ta manda,” e oficial a contestá den un forma arogante. “Dios por manda den shelu!”

Durante e guera, tabata specialmente vital pa nos tuma na pechu e conseho di Jesus pa ta “cauteloso manera colebra i tog inocente manera palomba.” (Mateo 10:16) Pues, mi a sconde mayoria di mi literatura den e sacunan parti paden di mi camisa. I pa haci sigur cu lo mi no a perde nada, mi tabata bisti braga cu a hala cera pertá bou dje rudianan.

Cu tempu, mi a ricibí instruccion pa muda p’e vaye di Engadine, unda e wega di pushi-cu-raton cu polis a continuá. Esaki ta un vaye bunita den e parti oost di Alpen di Suisa, cu den tempu di winter ta derá bou di capanan diki di sneu, p’esei mi a laga manda mi skinan pa yudá mi move di un caminda pa otro den e teritorio.

Handschoen cayente ta vital ora di biaha cu ski durante un winter friu. Dor cu mi a usa esnan di mi constantemente, pronto nan a cuminsá gasta. Ki gradicidu mi tabata un dia ora mi a ricibí completamente inesperá un pakete di post cu tabata contené un suèter di brei na man i tambe handschoen cayente! Un ruman muher cristian den mi ex-congregacion na Bern a traha nan pa mi. Te awor aki ora mi pensa riba esei, e ta yená mi cu gratitud.

Hopi Privilegio Gososo

Na 1943, condicionnan na Suisa a cuminsá stabilisá, i mi a ser yamá bek pa sirbi na Betel. Pa motibu di cierto problemanan den e congregacion di abla frances na Lausanne, rond di 100 kilometer leu, mi a ser asigná pa bishitá e stad ei regularmente pa yuda e publicadónan haña un punto di bista corecto dje organisacion di Dios.

Despues mi a sirbi pa un tempu como superintendente di circuito pa tur e congregacionnan frances na Suisa. Na cuminsamentu di siman, mi tabata traha na Betel, pero mi a dedicá diabierne, diasabra i diadomingo pa bishitá un congregacion diferente cada siman den un esfuerso pa duna yudansa spiritual. Ademas, ora un congregacion di abla frances a ser formá na Bern na 1960, mi a bira su superintendente presidente. Mi a sirbi den e capacidad aki te na 1970, ora Betel a muda for di Bern pa su bunita sitio actual den e pueblo di Thun.

Mi tabata contentu pa haña un grupo chikitu di Testigonan di abla italiano na Thun, i mi a cuminsá traha cu nan. Cu tempu un congregacion a ser formá, i mi a sirbi como su superintendente presidente pa un cantidad di aña te ora rumannan mas yong a cualificá pa carga e responsabilidad ei.

Loke mi a considerá un privilegio specialmente gososo ta di asistí na congresonan internacional di Jehova su pueblo. Por ehempel, na 1950 tabatin e asamblea memorabel Aumento di Teocracia den Yankee Stadium, New York. Bishitando e sede mundial di Testigonan di Jehova na Brooklyn, New York, a laga un impresion duradero riba mi. Tampoco lo mi no lubidá nunca Ruman Milton G. Henschel su discurso e siguiente aña n’e Asamblea Adoracion Limpi na Londen, Inglatera, cu a resaltá Jesus su palabranan, “Mi ta bisa boso, Si esakinan keda ketu, e piedranan mes lo sclama.” (Lucas 19:40) Ruman Henschel a puntra, “Boso ta kere cu e piedranan lo tin cu sclama?” Ainda mi por tende den mi oreanan e “No!” resonante cu a bini for di dies di miles di bos.

Ora mi a bai Betel aya na 1937, i mi tata a haña sa cu nos tabata ricibí solamente un zakgeld chikitu, el a puntra preocupá, “Mi yu, con lo bo haci sobrebibí den bo behes?” Mi a contest’é citando e palabranan dje salmista David: “Nunca mi a mira un hende hustu bandoná henteramente, ni su yunan buscando pan.” (Salmo 37:25) E palabranan aki siguramente a ser cumplí den mi caso.

Ki contentu mi ta cu mas cu 80 aña pasá, Berta Weibel a casa cu Tata i cu pa medio di su ehempel i guia mi a yega na conocé Jehova i su cualidadnan! Aunke otro miembronan dje famia a haci bofon di dje, el a sirbi Jehova fielmente te na su morto na 1983. E nunca a lamentá di a sirbi su Dios, Jehova; ami tampoco hamas a lamentá di a keda soltero i dedicá mi bida henteramente n’e sirbishi di Jehova.

[Plachi na página 25]

Trahando na Betel