Sperando cu Pacenshi Riba Jehova Desde Mi Hubentud

MANERA RUDOLF GRAICHEN A RELAT’E

Di ripiente tragedia a dal mi famia ora mi tabatin apénas 12 aña di edad. Promé, nan a manda mi tata prizon. Despues, nan a saca ami cu mi ruman muher for di cas i manda nos bai biba cerca hende straño. Mas despues, Gestapo a arestá ami cu mi mama. Ami a bai prizon, i e a bai resultá den un campo di concentracion.

E SERI di sucesonan ei a marca solamente e comienso di un periodo di persecucion penoso cu mi a sufri den mi hubentud como Testigo di Jehova. E notorio Gestapo nazi i despues e Stasi (polis secreto) di Alemania Oriental a purba kibra mi integridad na Dios. Awor, despues di 50 aña di sirbishi dedicá na dje, mi por bisa mescos cu e salmista: “Pa basta tempu nan a mustra hostilidad na mi desde mi hubentud; tog nan no a prevalecé contra mi.” (Salmo 129:2) Ki gradicidu mi ta na Jehova!

Mi a nace dia 2 di juni, 1925, den e pueblo chikitu di Lucka cerca di Leipzig, Alemania. Asta promé cu mi a nace, mi mayornan, Alfred i Teresa, a reconocé e zonido di e berdad di Bijbel den e publicacionnan dje Studiantenan di Bijbel, manera Testigonan di Jehova tabata conocí e tempu ei. Mi ta corda con tur dia mi tabata wak e cuadronan di esenanan di Bijbel cu tabata cologá n’e murayanan di nos cas. Un cuadro a mustra e lobo i e lamchi, e lamchi di cabritu i e leopardo, e bisé i e leon—tur den pas, guiá dor di un mucha chikitu. (Isaías 11:6-9) Cuadronan asina a haci un impresion duradero riba mi.

Ki ora cu tabata posibel, mi mayornan a incluí mi den actividadnan di congregacion. Por ehempel, na februari 1933, djis un par di dia despues cu Hitler a tuma poder, e “Foto-Drama di Creacion”—cu su ‘slides,’ película i naracion grabá—a ser pasá den nos pueblo chikitu. Ki entusiasmá mi tabata, un mucha di apénas shete aña di edad, pasando dor dje pueblo den e baki di un pikop i ser parti di un recorido pa haci propaganda pa e “Foto-Drama”! Na e ocasion aki i na otronan, e rumannan a lagá mi sintí mi un miembro útil dje congregacion apesar cu mi tabata hopi yong. Pues for di un edad masha yong, mi a ser siñá dor di Jehova i influenciá dor di su Palabra.

Entrená pa Confia den Jehova

Pa motibu di neutralidad cristian estricto, Testigonan di Jehova no a enbolbé nan mes den política nazi. Como resultado, na 1933 e nazinan a pasa leynan cu a prohibí nos di predicá, reuní i asta lesa nos propio literatura bíblico. Na september 1937 Gestapo a arestá tur e ruman hombernan den nos congregacion, incluyendo mi tata. Esei a hací mi masha tristu. Mi tata a ser sentenciá na cincu aña di prizon.

Cosnan a bira masha difícil pa nos na cas. Pero masha lihé nos a siña confia den Jehova. Un dia ora mi a bini cas for di scol, mi mama tabata lesando E Toren di Vigilancia. E tabata kier a prepará un almuerso lihé pa mi, di manera cu el a pone e revista riba un kashi di cushina chikitu. Despues di almuerso, miéntras cu nos tabata wardando e tayónan, un hende a bati duru na porta. Tabata un polis cu kier a wak si nos tabatin literatura bíblico den nos apartamento. Mi tabatin hopi miedu.

Tabata un dia extraordinariamente cayente. Pues e promé cos cu e polis a haci tabata kita su helm i pon’é riba un mesa. E ora ei el a cuminsá busca. Segun cu e tabata wak bou dje mesa, su helm a cuminsá slep bini abou. Di manera cu mi mama a core gara e helm i a pon’é riba e kashi di cushina net riba E Toren di Vigilancia! E polis a busca rond nos apartamento pero no a haña ningun literatura. Naturalmente, e nunca a pensa di wak bou di su helm. Ora e tabata cla pa bai, den djente el a pidi mi mama un dispensa miéntras cu el a rek tras di su lomba pa coge su helm. Ki un alivio mi a sinti!

Experencianan manera esei a prepará mi pa pruebanan mas difícil. Por ehempel, na scol nan a pone presion riba mi pa djoin e organisacion di Hubentud di Hitler, den cua muchanan tabata ser entrená den disiplina militar i indoctriná cu filosofia nazi. Algun maestro tabatin e meta personal di logra un participacion di studiante di 100 porciento. Mi maestro, Herr Schneider, lo mester a sinti cu e tabata un fracaso total pasobra, distinto for di tur e otro maestronan na mi scol, e tabata falta un studiante pa yega un participacion di 100 porciento. Ami tabata e studiante ei.

Un dia Herr Schneider a anunciá na henter e klas: “Muchanan, mañan nos lo bai keiru cu klas.” Tur mucha a gusta e idea. Anto el a agregá: “Boso tur mester bisti boso uniform di Hubentud di Hitler pa ora nos marcha den caya, tur hende por mira cu boso ta nechi muchanan di Hitler.” E siguiente mainta tur e muchanan a presentá den nan uniform cu excepcion di mi. E maestro a yamá mi dilanti klas i a puntrá mi: “Wak rond n’e otro muchanan i despues wak bo mes.” El a agregá: “Mi sa cu bo mayornan ta pober i cu nan no por aford di cumpra un uniform pa bo, pero lagá mi mustrá bo algu.” El a hibá mi na su lesenar, a habri un lachi i a bisa: “Mi kier duná bo e uniform nobo nobo aki. E no ta bunita?”

Lo mi a preferá di muri cu bisti un uniform di nazi. Ora mi maestro a mira cu mi no tabatin intencion di bistié, el a rabia, i henter e klas a bu mi. E ora ei el a bai keiru cu nos pero a purba scondé mi dor di lagá mi cana meimei di tur e otro muchanan den nan uniform. Sin embargo, hopi hende den e pueblo por a mirá mi como cu mi tabata resaltá entre mi compañeronan di klas. Tur hende tabata sa cu ami i mi mayornan tabata Testigonan di Jehova. Mi ta gradicidu na Jehova pa a duná mi e fortalesa spiritual necesario ora mi tabata yong.

Persecucion Ta Intensificá

Un dia trempan den 1938, nan a saca ami cu mi ruman muher for di scol i auto di polis a transportá nos pa un scol reformatorio na Stadtroda, rond di 80 kilometer leu. Pakico? Corte a dicidí di kita nos for dje influencia di nos mayornan i combertí nos den muchanan nazi. No a tarda muchu cu e personal encargá cu e scol reformatorio a ripará cu ami cu mi ruman muher tabata respetuoso i obediente, aunke firme den nos neutralidad cristian. E director tabata asina impresioná cu e kier a topa mi mama personalmente. Nan a haci un excepcion i a permití mi mama bishitá nos. Ami cu mi ruman muher i mi mama tabata masha contentu i gradicidu na Jehova pa a permití nos e oportunidad pa ta huntu pa animacion mutuo pa henter un dia. Nos tabatin ègt mester di dje.

Nos a keda den e scol reformatorio pa rond di cuater luna. Despues nan a manda nos bai biba cerca un famia na Pahna. Nan a instruí nan pa tene nos leu for di nos famianan. No tabata permití pa mi mama ni sikiera bishitá nos. Tog, na un algun ocasion, el a haña un manera di topa cu nos. Probechando dje poco oportunidadnan ei, mi mama a haci tur loke tabata na su alcanse pa inculcá den nos un determinacion pa keda fiel na Jehova, sin importá e pruebanan i circunstancianan cu Jehova lo a permití.—1 Corintionan 10:13.

I e pruebanan a bini. Dia 15 di december, 1942, ora mi tabatin solamente 17 aña di edad, Gestapo a gará mi i a hincá mi den un centro di detencion na Gera. Rond di un siman despues, mi mama tambe a ser arestá i a djoin mi den e mésun prizon. Ya cu ainda mi tabata menor di edad, corte no por a husgá mi. Pues ami cu mi mama a pasa seis luna den detencion miéntras corte tabata wardá mi haci 18 aña. Riba e mésun dia cu mi a haci 18 aña, ami cu mi mama mester a presentá dilanti corte.

Promé cu mi a realisá, tur cos a caba. Mi no por a sospechá cu lo mi no a mira mi mama mas. Mi último recuerdo di dje ta di mir’é sintá den corte riba un banki di palu color scur net banda di mi. Nos tur dos a ser hañá culpabel. Mi a ser sentenciá na cuater aña di prizon i mi mama na un aña i mei.

Den e dianan ei tabatin miles di Testigo di Jehova cerá den prizon i camponan di concentracion. Sin embargo, mi a ser mandá na un prizon na Stollberg, caminda mi tabata e único Testigo. Mi a pasa mas cu un aña mi so cerá den un cel, sin embargo, Jehova tabata cu mi. E amor cu mi a cultivá p’e den mi hubentud tabata e clave pa mi sobrebibencia spiritual.

Dia 9 di mei, 1945, despues cu mi tabata den prizon pa dos aña i mei, nos tur den prizon a ricibí bon noticia—guera a terminá! Riba e dia ei mi a ser lagá liber. Despues di a cana pa 110 kilometer, mi a yega cas, literalmente malu di agotamentu i malnutricion. A tumá mi vários luna pa recobrá mi salú.

Manera mi a yega, hopi noticia doloroso a dal mi. Promé tocante mi mama. Despues cu e tabata den prizon pa un aña i mei, e nazinan a pidié firma un documento pa renunciá su fe den Jehova. El a nenga. Di manera cu e Gestapo a hib’é na un campo di concentracion pa hende muher, na Ravensbrück. Ei el a muri di tífus djis promé cu e guera a terminá. E tabata un cristian cu hopi curashi—un luchadó tenas cu nunca a entregá. Ohalá Jehova corda bondadosamente riba dje.

Tambe tabatin noticia tocante mi ruman homber mas grandi, Werner, kende nunca a haci un dedicacion na Jehova. El a djoin e ehército aleman i a ser matá na Rusia. Mi tata? E sí a bin cas, pero lamentablemente, e tabata un dje masha poco Testigonan cu a firma e notorio documento pa renunciá nan fe. Ora mi a mir’é, el a parcé mi di mal genio i mentalmente trastorná.—2 Pedro 2:20.

Un Periodo Corticu di Actividad Spiritual Celoso

Dia 10 di mart, 1946, mi a asistí na mi promé asamblea despues di guera na Leipzig. Tabata hopi emocionante ora nan a anunciá cu un bautismo tabata bai tuma lugá e mésun dia ei! Aunke mi a dedicá mi bida na Jehova hopi aña promé, esaki tabata mi promé oportunidad pa ser bautisá. Hamas lo mi lubidá e dia ei.

Dia 1 di mart, 1947, despues di a traha pionero pa un luna, mi a ser invitá na Betel na Magdeburg. E oficinanan di Sociedad a sufri basta daño di bombardeo. Ki un privilegio tabata pa yuda cu e trabou di reparacion! Despues dje zomer ei mi a ser asigná n’e stad di Wittenberge como pionero special. Algun luna mi a dedicá mas cu 200 ora predicando na otronan tocante e bon nobo dje Reino di Dios. Ki contentu mi tabata pa ta liber atrobe—nada di guera, persecucion, of prizon!

Lamentablemente, e libertad ei no a dura mashá. Despues di guera Alemania a ser dividí, i e área caminda mi tabata biba a cai bou di dominio dje comunistanan. Na september 1950 polis secreto di Alemania Oriental, conocí como Stasi, a cuminsá arestá e rumannan sistemáticamente. E acusacionnan contra mi tabata ridículo. Mi a ser acusá di tabata un spion p’e gobiernu mericano. Nan a mandá mi n’e prizon di Stasi mas pió den e pais, na Brandenburg.

Sosten di Parti di Mi Rumannan Spiritual

Ei e Stasi no a lagá mi drumi den dia. Anto nan tabata interogá mi henter anochi. Despues cu mi a ser someté na e tortura aki pa un par di dia, cosnan a bira pió. Un mainta, en bes di hibá mi bek na mi cel, nan a hibá mi na un di nan notorio U-Boot Zellen (conocí como celnan submarino debí cu nan tabata situá hopi profundo den un kelder). Nan a habri un porta di heru bieu tur na frus i a pidí mi pasa paden. Mi tabatin cu pasa riba un drempel haltu. Ora mi a pone mi pia abou, mi a realisá cu e flur tabata completamente cubrí cu awa. Nan a dal e porta cera cu un zonido skerpi teribel. No tabatin lus ni bentana. Tabata scur scur.

Pa motibu dje vários centimeternan di awa riba e flur, mi no por a sinta, ni drumi, ni pega soño. Despues di a warda pa loke a parce un eternidad, nan a hibá mi bek pa mas interogacion bou di lusnan potente. Mi no sa kico tabata pió—para den awa henter dia den un scuridad casi completo of soportá e rayonan di lus dolorosamente skerpi dirigí directamente riba mi henter anochi.

Na vários ocasion nan a menasá di tirá mi mata. Despues di algun anochi di interogacion, un oficial militar ruso di alto rango a bishitá mi un mainta. Mi a haña e oportunidad pa bis’é cu e Stasi aleman tabata tratá mi mas pió ainda cu e Gestapo nazi. Mi a bis’é cu Testigonan di Jehova tabata neutral bou dje gobiernu nazi i tabata neutral tambe bou dje gobiernu comunista i cu nos no tabata mete den política na ningun parti di mundu. Na contraste cu esei, mi a bis’é, hopi hende cu awor tabata oficialnan Stasi tabata miembronan dje organisacion di Hubentud di Hitler, unda nan probablemente a siña con pa persiguí hende inocente brutalmente. Segun cu mi tabata papia, mi curpa tabata tembla di friu, hamber i agotamentu.

Sorprendentemente, e oficial ruso no a rabia cu mi. Al contrario, el a pone un laken riba mi i a tratá mi den un manera bondadoso. Djis despues di su bishita, nan a hibá mi bek na un cel mas confortabel. Un par di dia despues, nan a entregá mi na corte aleman. Miéntras mi caso tabata pendiente ainda, mi tabatin e privilegio excelente di compartí un cel cu cincu otro Testigo. Despues di a wanta hopi trato cruel, tabata ki refrescante pa haña e asociacion di mi rumannan spiritual!—Salmo 133:1.

Den corte mi a ser pronunciá culpabel di spionahe i sentenciá na cuater aña den un instituto penitenciario. Esei a ser considerá un sentencia leve. Algun dje rumannan a ser sentenciá na mas cu dies aña. Mi a ser mandá na un instituto penitenciario di máximo siguridad. Mi ta kere cu ni un raton no por a gatia drenta of sali for dje prizon ei—asina hermético e sistema di siguridad tabata. Tog, cu yudansa di Jehova algun ruman cu curashi a logra smokkel henter un Bijbel paden. Nos a habrié for di otro i a dividié den bukinan individual i a circul’é entre e rumannan cu tabata prezu.

Con nos a haci esei? Tabata masha difícil. E único biaha cu nos tabata bin den contacto cu otro tabata ora nan tabata hiba nos baña cada dos siman. Na un ocasion, ora mi tabata dal un baño, un ruman a fluister den mi orea cu el a sconde algun blachi di Bijbel den su serbete. Despues di a caba di baña mi mester a coge su serbete en bes di esun di mi.

Un dje wardadónan di prezu a mira e ruman fluister na mi i a batié malamente cu un klop. Mi mester a core coge e serbete i mescla den e otro prezunan. Afortunadamente nan no a gará mi cu e blachinan di Bijbel. Di otro manera nos programa di alimentacion spiritual lo tabata na peliger. Nos a pasa dor di hopi experencia similar. Semper nos tabata lesa nos Bijbel na scondí i coriendo hopi riesgo. E palabranan di apostel Pedro, “Mantené boso huicio, sea vigilante,” en berdad tabata masha apropiado.—1 Pedro 5:8.

Pa un of otro motibu, e autoridadnan a dicidí di transferí algun di nos bes tras bes di un instituto penitenciario pa otro. Durante un periodo di cuater aña, mi a ser transferí na rond di dies diferente instituto penitenciario. Tog, semper mi por a localisá e rumannan. Mi a bin stima tur e rumannan aki profundamente, i tabata cu hopi tristesa den mi curason cu mi tabata bandoná nan cada biaha cu mi a ser transferí.

Finalmente mi a ser mandá Leipzig, i ei mi a ser poné den libertad. E wardadó di prezu cu a sacá mi liber no a yamá mi ayó sino, mas bien a bisá mi, “Nos lo mirá bo pronto atrobe.” Su mente maligno tabata kier a mirá mi tras di trali atrobe. Hopi biaha mi ta pensa riba Salmo 124:2, 3, cu ta bisa: “Si no tabata pasobra Jehova a resultá di ta pa nos ora hende a lanta contra nos, anto nan lo a guli nos asta bibu, ora nan rabia tabata ardiente contra nos.”

Jehova Ta Libra Su Sirbidónan Leal

Awor mi tabata un homber liber atrobe. Ruth, mi pia di ohochi, i Ruman Herta Schlensog tabata na porta sperando riba mi. Durante tur e añanan di prizon aki, Herta tabata manda un paki chikitu cu cuminda pa mi tur luna. Mi ta kere sigur cu sin e pakinan chikitu ei, lo mi a muri den prizon. Ohalá Jehova corda bondadosamente riba dje.

Desde mi liberacion, Jehova a bendicioná mi cu hopi privilegio di sirbishi. Mi a sirbi atrobe como pionero special, na Gronau, Alemania, i como superintendente di circuito den Alpen aleman. Mas despues mi a ser invitá pa inscribí den e di 31 klas dje Scol Bíblico di Galad di Watchtower pa misionero. Nos graduacion a tuma lugá den Yankee Stadium durante e asamblea internacional di Testigonan di Jehova na 1958. Mi tabatin e privilegio di dirigí mi mes n’e gran multitud di rumannan i relatá algun di mi experencianan.

Despues dje graduacion mi a biaha pa Chile pa sirbi como misionero. Ei mi a sirbi atrobe como superintendente di circuito den e parti mas sur di Chile—mi a ser mandá literalmente n’e partinan mas lehano dje tera. Na 1962, mi a casa cu Patsy Beutnagel, un bunita misionero for di San Antonio, Texas, Merca. Mi a disfrutá di hopi aña maraviyoso di sirbishi na Jehova cuné na mi lado.

Den mi mas cu 70 aña di bida, mi a experenciá hopi momento felis i hopi calamidad. E salmista a bisa: “Hopi ta e calamidadnan di esun hustu, pero Jehova ta libr’é for di nan tur.” (Salmo 34:19) Na 1963, miéntras cu mi tabata na Chile ainda, ami cu Patsy a experenciá e morto trágico di nos yu muher baby. Despues, Patsy a bira masha malu, i nos a muda pa Texas. Ora e tabatin apénas 43 aña di edad, el a muri, tambe bou di circunstancianan trágico. Hopi biaha mi ta pidi Jehova p’e corda bondadosamente riba mi kerida esposa.

Awor, aunke cu mi ta malu i bieu, mi tin e privilegio di sirbi como pionero regular i anciano na Brady, Texas. Ta cierto cu bida no tabata semper fácil, i kisas tin otro pruebanan cu mi tin cu enfrentá ainda. Sin embargo, mescos cu e salmista mi por bisa: “O Dios, bo a siñá mi desde mi hubentud padilanti, i te cu awor mi ta sigui declará bo obranan maraviyoso.”—Salmo 71:17.

[Plachinan na página 23]

(1) Sirbiendo awe como anciano i pionero, (2) cu Patsy, net promé cu nos casamentu (3) den klas di Herr Schneider, (4) mi mama, Teresa, kende a muri na Ravensbrück