Cumpliendo cu Mi Promesa di Sirbi Dios

MANERA FRANZ GUDLIKIES A RELATA

Di mi peloton di mas cu shen soldá, cuater persona so a keda bibu. Ora mi a haña mi cara-cara cu morto, mi a cai na rudia i a primintí Dios: ‘Si mi sobrebibí e guera, lo mi sirbi bo pa semper.’

MI A haci e promesa ei 54 aña pasá, na april 1945, tempu mi tabata soldá den e ehército aleman. Tabata djis promé cu fin di Guera Mundial II, i e ehército soviético tabata dirigí un atake intensivo i tabata avansá den direccion di Berlin. Nos trupanan tabata posicioná cerca di e stad Seelow, na oriya di riu Oder, ménos cu 65 kilometer for di Berlin. Einan nan a bombardiá nos di dia i anochi cu un yobida di bala di artileria, i casi nan a caba cu mi peloton.

Tabata e ora ei cu, pa promé bes den mi bida, mi a perde control i a haci oracion cu awa na wowo na Dios. Mi a corda un texto di Bijbel cu mi mama, un muher temeroso di Dios, a cita hopi bes: “Yama mi den e dia di angustia. Ami lo libra bo i abo lo glorificá mi.” (Salmo 50:15) Einan den trinchera i temiendo pa mi bida, mi a haci Dios e promesa mencioná ariba. Con mi por a cumpli cuné? I con bin mi a bira miembro dje ehército aleman?

Mi A Lanta na Lituania

Na 1918, durante Guera Mundial I, Lituania a declará su independencia i a establecé un sistema gubernamental democrático. Mi a nace na 1925 den e distrito di Memel (Klaipėda) cerca di laman Báltico. Net un aña promé cu mi a nace, nan a haci e distrito un parti di Lituania.

Ami cu mi cincu ruman muhernan tabatin un infancia felis. Mi tata tabata nos amigu íntimo, semper e tabata haci cosnan huntu cu nos. Nos mayornan tabata miembro dje Iglesia Evangélico, pero nan no tabata bai misa pasobra e hipocresia dje pastor a disgustá Mama. Tog, e tabata stima Dios i su Palabra, Bijbel, i e tabata les’é cu smak.

Na 1939, Alemania a capturá e parti di Lituania unda nos tabata biba. Anto, na principio di 1943, nan a yama mi pa servicio militar den ehército aleman. Mi a ser heridá den un dje batayanan, pero despues cu mi a recuperá, mi a bolbe n’e Frente Oriental. P’e tempu ei, e rumbo dje guera a cambia i e alemannan tabata bati retirada dilanti dje ehército soviético. Tabata e ora ei cu mi a scapa di morto na wowo di angua, manera mi a relatá na principio.

Cumpliendo cu Mi Promesa

Durante guera, mi mayornan a muda bai Oschatz, Alemania, djis zuidoost di Leipzig. Debí n’e destruccionnan cu e guera a laga atras, tabata difícil pa localisá nan. Pero esta contentu nos a keda ora cu por fin nos tabata huntu atrobe! Poco tempu despues, na april 1947, mi a compañá Mama bai un discurso público cu Max Schubert, un Testigo di Jehova, a duna. Mama tabata kere cu el a haña e religion berdadero, i despues cu mi a asistí na algun reunion, mi tambe a cuminsá kere mescos.

Un poco tempu despues di esei, Mama a cai for di un trapi, i a sufri algun herida cu a hiba na su morto algun luna despues. Ora cu e tabata den hospital, promé cu e muri, el a animá mi calurosamente: “Hopi bes mi a resa pidi pa maske ta un di mi yunan por haña e caminda di Dios. Awor cu mi ta mira cu Dios a scucha mi oracionnan, mi por muri na pas.” Cuantu mi ta anhelá e tempu ora Mama lanta for di morto i haña sa cu su oracionnan a haña contesta!—Juan 5:28.

Dia 8 di augustus 1947, cuater luna so despues cu mi a tende e discurso di ruman Schubert, mi a bautisá na un asamblea na Leipzig como símbolo di mi dedicacion na Jehova Dios. Por fin mi a cuminsá dal paso pa cumpli cu mi promesa na Dios. Djis despues mi a bira pionero, manera ta yama Testigonan di Jehova cu ta predicá tempu completo. N’e tempu ei tabatin casi 400 pionero ta biba n’e parti cu despues a bira e República Democrático Aleman, esta, Alemania Oriental.

E Promé Pruebanan di Fe

Un bisiña na Oschatz a purba lanta mi interes den marxismo, dor di ofrecé mi un studio na universidad cu Estado ta paga si mi djoin e Partido di Unidad Socialista di Alemania (SED). Mi a rechasá e oferta, mescos cu Jesus a haci cu e oferta di Satanas.—Mateo 4:8-10.

Un dia den april 1949, dos polis a bini na mi trabou i nan a duna mi ordu pa bai cu nan. Nan a hiba mi n’e oficina local di servicio di inteligencia soviético, unda a acusá mi di ta traha pa capitalistanan den Occidente. Nan a bisa cu mi por a proba cu mi ta inocente, dor di sigui cu mi trabou di cas-pa-cas, pero cu mi tabatin cu informá nan di tur hende cu a papia malu di Union Soviético of di SED i di ken cu a bishitá e reunionnan di Testigonan di Jehova. Ora mi a nenga di cooperá, nan a cera mi den un cel. Despues, nan a hiba mi dilanti loke a parce di ta un corte militar. Mi sentencia: 15 aña di trabou forsá na Siberia!

Mi a keda calmu, i esei a impresioná e oficialnan. Anto nan a bisa mi cu mi sentencia lo keda na vigor, pero cu lo tabata suficiente si un bes pa siman, mi bin raportá te dia mi ta cla pa cooperá cu nan. Dor cu mi kier a haña conseho cerca Testigonan mas madurá, mi a biaha bai Magdeburg, unda e sucursal di Sociedad Watch Tower tabata situá e tempu ei. Ya cu mi tabata bou di vigilancia, e biahe no tabata unu fácil. Ernst Wauer, kende tabata traha den e Departamento Legal na Magdeburg, a bisa mi: “Lucha i lo bo vence. Comprometé bo mes, i nan lo vence bo. Esei ta loke mi a siña den campo di concentracion.”a E conseho ei a yuda mi cumpli cu mi promesa di sirbi Dios.

Prohibicion i Aresto Atrobe

Na juli 1950, mi a ser recomendá pa sirbi como superintendente biahero. Sin embargo, dia 30 di augustus, polis a tene un razia riba nos tereno i edificionan na Magdeburg, i nan a prohibí nos di predicá. Esei a cambia mi asignacion. Ami cu Paul Hirschberger mester a traha cu un 50 congregacion, nos mester a pasa dos of tres dia cerca cada un, i yuda e rumannan organisá nan mes pa cumpli cu nan ministerio bou di prohibicion. Den e lunanan cu a sigui, polis a hera di arestá mi seis biaha!

Tabatin un persona cu a infiltrá den un congregacion, i a traicioná nos na Stasi, e Servicio di Siguridad di Estado. P’esei, na juli 1951, cincu homber cu scopet den man a arestá ami cu Paul riba caya. Despues, ora nos a pensa bek na loke a sosodé, nos por a ripará cu nos no a dependé riba e organisacion di Jehova manera mester tabata. Nos ruman hombernan di mas edad a consehá nos pa nunca no biaha huntu. Demasiado confiansa den nos mes a pone cu nos a perde nos libertad! Ademas, nos no a considerá di antemano kico nos lo bisa si nan arestá nos.

Mi so den cel, cu awa na wowo mi a roga Jehova p’e yuda mi pa mi no traicioná mi rumannan of comprometé mi fe. Despues mi a pega soño, i di ripiente e stem di mi amigu Paul a spierta mi. E kamber unda Stasi tabata interogu’é tabata net riba mi cel. Como cu tabata un anochi calor i húmedo, e porta di balcon tabata habrí, i leu ayá mi por a scucha tur cos. Despues, ora nan a interogá mi, mi a contestá mésun cos, loke a sorprendé e oficialnan. Mama su texto faborito cu ta bisa “yama mi den e dia di angustia. Ami lo libra bo,” a sigui bini na mi mente i e tabata animá mi mashá.—Salmo 50:15.

Despues dje interogacion, ami cu Paul a pasa cincu luna den aresto preventivo den e prizon di Stasi na Halle i despues na Magdeburg. Na Magdeburg, de bes en cuando mi tabata haña un bista di nos facilidadnan di sucursal cu e tempu ei tabata cerá. Mi a deseá di por tabata traha einan en bes di ta den prizon! Na februari 1952 nan a anunciá nos sentencia: “10 aña di prizon i 20 aña sin derecho civil.”

Mi A Mantené Fe den Prizon

Durante cierto tempu di nan condena, Testigonan di Jehova cu a haña un sentencia di por lo ménos dies aña tabatin un identificacion special na nan paña. Nan tabatin un banchi corá cosé na un pia di carson i tambe na un manga di camisa. Pa avisá e wardadónan di prezu cu nos tabata criminalnan peligroso, parti pafó n’e porta di nos cel tambe tabatin un pida carton rondó corá pegá.

Di berdad e autoridadnan tabata considerá nos como e criminalnan di mas malu. Nos no tabatin mag di tin Bijbel den nos poder, pasobra, manera un wardadó di prezu a splica: “Un Testigo di Jehova cu un Bijbel den su man, ta mescos cu un criminal cu un scopet den su man.” Pa nos por a coleccioná partinan di Bijbel, nos a lesa e obranan dje escritor ruso, Leo Tolstoy, kende a cita textonan di Bijbel hopi bes den su bukinan. Nos tabata siña e textonan aki for di cabes.

Promé cu nan a arestá mi na 1951, mi a comprometé cu Elsa Riemer. E tabata bishitá mi den prizon mas tantu posibel i un bes pa luna e tabata manda un pakete di cuminda pa mi. E tabata sconde cuminda spiritual tambe den su paketenan. Un biaha, el a yena algun soseshi cu artículonan di Toren di Vigilancia. Hopi bes e wardadónan di prezu tabata corta e soseshinan pa wak si tabatin algu scondí den nan, pero e biaha aki e pakete a yega na fin di un dia di trabou, i nan no a chek e.

N’e tempu ei, ami cu Karl Heinz Kleber tabata compartí un cel chikitu cu tres prizonero cu no tabata Testigo. Con nos por a lesa E Toren di Vigilancia sin cu nan a mira nos? Wel, nos a haci como si fuera nos tabata lesa un buki, pero den dje nos tabatin e artículonan di Toren di Vigilancia scondí. Nos a pasa e cuminda spiritual balioso aki tambe pa otro Testigonan den prizon.

Miéntras nos tabata den prizon nos a probechá tambe di oportunidadnan pa conta otro hende tocante e Reino di Dios. Mi a keda mashá emocioná di mira un prizonero cu tabata cerá huntu cu mi, bira creyente como resultado di esei.—Mateo 24:14.

Regreso n’e Ministerio di Tempu Completo

Despues cu mi a pasa casi seis aña tras di trali, mi a haña mi libertad dia 1 di april 1957. Ménos cu dos siman despues, mi a casa cu Elsa. Ora Stasi a tende cu mi a haña libertad, nan tabata busca un excuus pa bolbe hinca mi den prizon. Pa evitá esei, ami cu Elsa a crusa frontera i a bai biba na Berlin Occidental.

Ora nos a yega Berlin Occidental, Sociedad kier a sa kico tabata nos plannan. Nos a splica cu un di nos lo a bai traha pionero miéntras cu e otro lo a bai traha trabou seglar.

“Con boso lo haña e idea di boso tur dos traha pionero?” nan a puntra nos.

Nos a contestá: “Si esei ta posibel, nos lo cuminsá mesora.”

Di manera cu, tur luna nos tabata haña un contribucion chikitu pa yuda sostené nos, i nos a cuminsá sirbi como pionero special na 1958. Esta un goso nos tabatin di mira personanan cu ken nos a studia Bijbel, cambia nan bida pa bira sirbidó di Jehova! E siguiente dies añanan den sirbishi di pionero special a siña nos traha hopi uní como esposo i esposa. Semper Elsa tabata na mi lado, asta ora mi tabata drecha e auto. Nos tabata lesa, studia i haci oracion huntu.

Na 1969, nos a ser asigná n’e trabou di circuito, i tur siman nos tabata bishitá un congregacion diferente pa sirbi e necesidad dje rumannan den e congregacion ei. Josef Barth, un ruman experenciá den e trabou di circuito, a duna mi e conseho aki: “Si bo kier tin éxito den bo asignacion, djis sea un ruman pa e rumannan.” Mi a purba aplicá e conseho ei. Como resultado, nos tabatin un relacion masha caluroso i armonioso cu nos compañeronan Testigo. Esaki a haci fácil pa duna conseho ora tabata necesario.

Na 1972, dokternan a diagnosticá cu Elsa tin cancer i nan a oper’é. Despues, el a haña reumatismo tambe. Aunke dolor tabata com’é, tog e tabata compañá mi tur siman, sirbiendo e congregacionnan, i traha cu e ruman muhernan den e ministerio tantu cu e tabata por.

Nos A Ahustá Nos Necesidadnan

Na 1984, mi suegronan tabatin mester di cuido constante, p’esei nos a sali for di e trabou di circuito pa yuda cuida nan te dia cu nan a muri cuater aña despues. (1 Timoteo 5:8) Anto na 1989, Elsa a bira hopi malu. Felismente, el a recuperá un poco, pero for dje tempu ei ta ami tin cu haci tur trabou di cas. Ainda mi ta siña con pa trata cu un persona cu tin dolor constantemente. Tog, apesar di e tension i afliccion mental i emocional, nos a mantané nos amor pa cosnan spiritual.

Afortunadamente, ainda nos ta riba lista di pionero. Sin embargo, nos a bin comprendé cu loke ta importante no ta e posicion cu nos tin ni cuantu nos por haci, sino e echo cu nos ta keda fiel. Nos kier sirbi nos Dios, Jehova, no djis pa un par di aña, sino pa tur eternidad. Nos experencia a sirbi como un entrenamentu maraviyoso pa futuro. I Jehova a duna nos e forsa pa alab’é asta bou di e circunstancianan di mas difícil.—Filipensenan 4:13.

[Nota]

[Plachi na página 23]

Den e prizon aki na Magdeburg mi tabata cerá

[Rekonosementu]

Gedenkstätte Moritzplatz Magdeburg für die Opfer politischer Gewalt; Foto: Fredi Fröschki, Magdeburg

[Plachi na página 23]

Ora nos a casa na 1957

[Plachi na página 23]

Huntu cu Elsa awe