Dios Ta Mi Refugio i Fortalesa

MANERA CHARLOTTE MÜLLER A RELAT’E

“Siguramente bo nuebe añanan di sufrimentu bou di Hitler ta elogiabel,” e hues comunista a bisa. “Bo realmente tabata contra guera, pero awor bo ta contra nos movementu di pas!”

E TABATA refiriendo na mi encarcelacion anterior dor dje nazinan i na socialismo na República Democrático Aleman. Na promé instante mi a keda boca yen di djente, pero despues mi a contestá: “Un cristian no ta lucha pa berdadero pas den e mésun manera cu otro hende ta haci. Mi simplemente ta purba sigui e mandamentu bíblico pa stima Dios i mi próhimo. E Palabra di Dios ta yudá mi mantené pas cu palabra i accion.”

Riba e dia ei, 4 di september, 1951, e comunistanan a sentenciá mi na ocho aña den prizon—un aña ménos cu e régimen nazi a duná mi.

Ora nos como Testigonan di Jehova tabata ser persiguí dor di socialistanan nacional i e comunistanan, mi a haña consuelo den Salmo 46:1: “Dios ta pa nos un refugio i fortalesa, un yudansa cu por ser hañá fácilmente durante angustia.” Jehova so a duná mi e fortalesa pa wanta, i mas mi a absorbá su Palabra, mas fuerte mi a bira.

Fortalecé pa Futuro

Mi a nace na 1912 na Gotha-Siebleben na Turingia, Alemania. Maske mi mayornan tabata protestant, mi tata tabata buscando e berdad di Bijbel i un gobiernu hustu. Ora mi mayornan a mira e “Foto-Drama di Creacion,” nan a keda emocioná.a Tata a haña loke e tabata buscando—e Reino di Dios.

Tata i Mama, huntu cu nos, seis ruman, a renunciá for dje iglesia dia 2 di mart, 1923. Nos tabata biba na Chemnitz na Saxony, i ei nos a asociá cu e Studiantenan di Bijbel. (Mi ruman homber i dos di mi ruman muhernan a bira Testigo di Jehova.)

N’e reunionnan di Studiantenan di Bijbel, textonan di Bijbel i berdadnan precioso a afectá mi profundamente, i esakinan a yena mi curason yong cu felicidad. Specialmente tabatin e instruccion cu nan a duna nos como hóbennan cristian, mas cu 50 di nos, riba diadomingo, i cua ami cu mi ruman muher Käthe a ricibí pa un tempu. Den nos grupo tabatin e hóben Konrad Franke, kende a organisá excursionnan i tabata practicá cantamentu cu nos. Mas despues, for di 1955 pa 1969, Ruman Franke a sirbi como superintendente dje sucursal di Watch Tower na Alemania.

Añanan ’20 tabata añanan turbulento, algun biaha asta den e pueblo di Dios. Siendo cu algun ruman no a aceptá E Toren di Vigilancia mas como “alimento n’e debido tempu,” nan tabata contra e actividad di predicá di cas-pa-cas. (Mateo 24:45) Esaki a hiba na apostasia. Pero tabata net e “alimento” aki cu a duna nos e fortalesa cu nos tabatin mester di dje asina desesperadamente n’e tempu ei. Por ehempel, tabatin e artículonan di Toren di Vigilancia “Bendicioná Ta Esnan Sin Miedu” (1919) i “Ken Lo Onra Jehova?” (1926) Mi tabata kier a onra Jehova mediante actividad yen di curashi, di manera cu mi a distribuí hopi di Ruman Rutherford su buki i foyetonan.

Na mart 1933, mi a bautisá como Testigo di Jehova. Den e mésun aña ei, nos trabou di evangelisá a ser prohibí na Alemania. N’e bautismo, Revelacion 2:10 a ser ofrecé como conseho pa futuro: “No tene miedu di loke boso ta bai sufri. Mira! E Diabel lo sigui tira algun di boso den prizon pa boso ser poní na prueba plenamente, i pa boso por tin tribulacion dies dia. Resultá di ta fiel te na morto mes, i lo mi duna boso e corona di bida.” Mi a meditá profundamente riba e versículo aki, sabiendo cu pruebanan difícil tabata sperá mi. Esaki a resultá di ta cierto.

Pa motibu cu nos famia a keda políticamente neutral, vários di nos bisiñanan a mira nos cu sospecho. Despues di un eleccion político, un delegacion di trupanan nazi uniformá a grita dilanti nos cas, “Aki ta biba traidónan!” E artículo “No Teme Nan,” cu a aparecé den e edicion aleman di E Toren di Vigilancia di december 1933, tabata di animacion special pa mi. Mi kier a permanecé un Testigo fiel di Jehova asta bou dje circunstancianan di mas desfaborabel.

Solucion dje Enemigu—Prizon

Tabata posibel pa producí E Toren di Vigilancia secretamente na Chemnitz te n’e otoño di 1935. Despues di esei e mashin di duplicá cu tabata ser usá mester a ser hibá na Beierfeld den e Cerunan Ore, caminda el a ser usá pa reproducí literatura te na augustus 1936. Ami cu Käthe tabata plama copianan na rumannan kende nan adres nos a haña for di Tata. Tur cos tabata marcha bon pa un tempu. Pero despues Gestapo a poné mi bou di vigilancia, i na augustus 1936 nan a detené mi na mi cas i a poné mi den detencion, unda mi a spera un huicio.

Na februari 1937, 25 ruman homber i 2 ruman muher—ami mes incluí—a aparecé dilanti un corte special na Saxony. Nan a pretendé cu e organisacion di Testigonan di Jehova tabata subversivo. E rumannan ei cu a reproducí E Toren di Vigilancia a ricibí cincu aña di prizon. Ami a ser sentenciá na dos.

En bes di ser librá despues di a completá mi sentencia, mi a ser detené dor di Gestapo. Nan tabata kier pa mi firma un declaracion cu ta bisa cu lo mi no ta activo mas como un Testigo di Jehova. Mi a nenga firmemente, riba cua e oficial a bira furioso, a bula lanta, i a emití un órden pa hincá mi den detencion. E órden ta ser mustrá riba e potret. Sin ser permití pa mira mi mayornan, mi a ser hibá mesora pa un campo di concentracion chikitu pa hende muher na Lichtenburg riba riu Elbe. Djis despues di esei mi a topa Käthe. E tabata den e campo di concentracion na Moringen for di december 1936, pero ora e campo di concentracion ei a ser cerá, e, huntu cu hopi otro ruman muher, a bini na Lichtenburg. Mi tata tambe a ser detené, i ta te 1945 mi a mir’é atrobe.

Na Lichtenburg

Mi no a ser permití pa djoin e otro Testigonan femenino mesora, ya cu nan a ser castigá pa un of otro motibu. Den un dje salanan, mi a observá dos grupo di prezu—hende muher cu generalmente tabata n’e mesanan i Testigonan cu tabatin cu sinta henter dia riba bankinan i cu no tabata haña nada di come.b

Mi a aceptá di buena gana cualkier asignacion di trabou, cu e speransa di topa cu Käthe di un of otro manera. I esei ta exactamente loke a sosodé. E tabata riba caminda pa trabou cu dos otro prezu ora nos a topa. Yená cu goso, mi a bras’é duru. Pero e guardia femenino a denunciá nos mesora. Nan a interogá nos, i for dje tempu ei padilanti, nan a tene nos deliberadamente separá. Esei tabata sumamente duru.

Dos otro incidente na Lichtenburg a keda grabá den mi memoria. Na un ocasion tur prezu mester a bini huntu den e patio pa scucha un di Hitler su discursonan na radio. Nos como Testigo di Jehova a nenga, ya cu tabatin ceremonianan patriótico enbolbí. Di manera cu e guardianan a dirigí slangnan di paga candela riba nos, muhando nos cu un stral fuerte di awa for di un ‘brandweerput’ i obligando nos como hende muhernan indefenso pa baha for dje di cuater piso te n’e patio. Ei nos tabatin cu para, papa muhá.

Na un otro ocasion ami, huntu cu Gertrud Oehme i Gertel Bürlen, a ser ordená pa decorá e cuartel dje comandante cu lus, ya cu e hacimentu di aña di Hitler tabata acercando. Nos a nenga, reconociendo Satanas su tácticanan di purba maniobrá nos den un situacion pa kibra nos integridad dor di comprometé den cosnan chikitu. Como castigu, cada un di nos cu tabata ruman muher yong tabatin cu pasa e siguiente tres simannan nos so den un cel chikitu i scur. Pero Jehova a keda cerca di nos i, asta den un lugá spantoso asina, a duna prueba cu e ta un refugio.

Na Ravensbrück

Na mei 1939 e prezunan na Lichtenburg a ser transferí p’e campo di concentracion na Ravensbrück. Ei mi a ser asigná n’e labanderia, huntu cu vários otro ruman muher Testigo. Djis despues di cuminsamentu dje guera, nos lo mester a bai coge e bandera swástika, locual nos a nenga di haci. Como resultado, dos di nos, ami cu Mielchen Ernst, a ser poné den e barak penal. Esei tabata un dje formanan di castigu di mas severo i el a nificá cu nos tabatin cu haci trabou duru tur dia, asta riba diadomingo, sea cual sea e weer. Normalmente, e sentencia máximo tabata tres luna, pero nos a keda ei pa un aña. Sin e yudansa di Jehova, mi nunca lo a sobrebibí.

Na 1942, condicionnan pa nos como prezu a aliviá un tiki, i mi a ser asigná pa traha como criá di cas pa un famia SS no muchu leu for dje campamentu. E famia a permití mi un cierto grado di libertad. Por ehempel, un biaha ora mi a sali keiru cu e muchanan, mi a topa Josef Rehwald i Gottfried Mehlhorn, dos prezu cu triángulo lila, cu ken mi por a intercambiá algun palabra di animacion.c

Añanan Difícil Despues di Guera

Ora cu na 1945 e trupanan aliá tabata acercando, e famia pa ken mi tabata traha a hui, i mi tabatin cu compañá nan. Huntu cu otro famianan SS, nan a forma un grupo grandi cu a biaha bai direccion west.

E último par di dianan dje guera tabata caótico i yen di peliger. Finalmente, nos a topa algun soldat mericano cu a permití mi registrá n’e siguiente pueblo como un persona liber. Ken mi a topa ei? Josef Rehwald i Gottfried Mehlhorn. Nan a haña sa cu tur e Testigonan dje campo di concentracion na Sachsenhausen a alcansá Schwerin despues di un marcha di morto yen di peliger. Pues nos tres a coge rumbo p’e pueblo ei, cu tabata rond di 75 kilometer leu. Tabata ki un goso pa topa na Schwerin tur e rumannan fiel ei, sobrebibientenan dje camponan di concentracion, incluyendo Konrad Franke.

Pa december 1945, e situacion den e pais a mehorá te n’e grado cu mi por a biaha cu trein. Di manera cu mi tabata cabes pa cas! Sin embargo, e biahe a incluí pasa tempu drumí riba dak dje wagon i para riba e stepnan. Na Chemnitz, mi a sigui mi caminda for dje stacion di trein p’e lugá unda nos a biba como famia. Pero den e cayanan caminda e trupanan nazi anteriormente a para grita, “Aki ta biba traidónan!” ni un solo cas a sobrebibí. Henter e área residencial a ser destruí completamente. Pero, pa mi alivio, mi a haña Mama, Tata, Käthe, i mi ruman homber i muhernan ainda na bida.

E situacion económico na Alemania despues di guera tabata pésimo. No obstante, congregacionnan dje pueblo di Dios a cuminsá florecé rond Alemania. Sociedad Watch Tower no a spar ningun esfuerso den trata na ekipá nos p’e actividad di predicá. Trabou na Betel na Magdeburg, cua e nazinan a cera, a cuminsá di nobo. Den primavera di 1946, mi a ser invitá pa traha ei i a ser asigná den cushina.

Un Biaha Mas Bou di Prueba i den Custodia

Magdeburg ta den e seccion di Alemania cu a bin bou di control dje comunistanan. Nan a pone nos trabou bou di prohibicion dia 31 di augustus, 1950, i a cera e Betel na Magdeburg. Asina mi sirbishi na Betel a yega na un fin, cua tabata un tempu di entrenamentu balioso. Mi a regresá Chemnitz, determiná asta bou dje comunistanan pa tene un gara firme riba e berdad i pa proclamá e Reino di Dios como e único speransa pa humanidad afligí.

Na april 1951, mi a biaha cu un ruman homber pa Berlin pa recogé copianan di E Toren di Vigilancia. Ora nos a regresá, nos a keda pasmá pa haña e stacion di trein na Chemnitz rondoná pa polis civil. Tabata bisto cu nan tabata sperando nos, i nos a ser arestá inmediatamente.

Ora nos a ser poné den detencion pa spera huicio, mi tabatin documentonan huntu cu mi cu a proba cu mi a ser encarcelá pa vários aña dor dje nazinan. Consecuentemente, e guardianan a tratá mi cu respet. Un dje guardianan principal femenino a bisa: “Boso, Testigonan di Jehova, no ta criminal; boso no ta pertenecé den prizon.”

Un biaha el a bin den mi cel, unda mi tabata cu dos otro ruman muher, i secretamente a pone algu bou di un dje camanan. Kico esei tabata? Su propio Bijbel, cu el a laga nos haña. Na un otro ocasion, el a yama mi mayornan na cas, ya cu nan no tabata biba leu for di prizon. El a haña copianan di E Toren di Vigilancia i poco alimento, a sconde tur cos riba su curpa, i a pasa nan secretamente den mi cel.

Tin algu cu mi ta gusta recordá. Algun biaha riba diadomingo mainta, nos tabata canta nos canticanan teocrático asina duru cu e otro prezunan tabata aplaudí cada cantica cu gustu.

Fortalesa i Yudansa for di Jehova

Durante e tratamentu den corte dia 4 di september, 1951, e hues a haci e comentario mencioná na cuminsamentu dje artículo aki. Mi a sinta mi sentencia na Waldheim, despues na Halle i finalmente na Hoheneck. Un of dos incidente corticu lo mustra con Dios tabata un refugio i fortalesa pa nos como Testigo di Jehova i con su Palabra a stimulá nos.

N’e prizon na Waldheim, tur ruman muher Testigo tabata bini huntu regularmente den un sala, di manera cu nos por a tene reunionnan cristian. No tabata permití potlot cu papel, pero algun ruman muher a haña algun pida paña i a logra traha un spandoek chikitu cu tabata contené e texto di aña pa 1953, cu a bisa: “Adorá Jehova den adorno santu.”—Salmo 29:2, American Standard Version.

Un dje guardianan femenino a coge nos di sorpresa i a denunciá nos mesora. E cabes dje prizon a bini i a bisa dos di nos ruman muhernan pa tene e spandoek na haltu. “Ken a traha esaki?” el a reclamá. “Kico ta e idea?”

Un dje ruman muhernan kier a confesá i tuma e culpa pa nos, pero rápidamente nos a fluister entre nos mes, bayendo di acuerdo cu nos tur mester carga e responsabilidad. Pues nos a contestá: “Nos a trah’é pa fortalecé nos fe.” E spandoek a ser confiscá, i nan a keda sin duna nos cuminda como castigu. Pero durante henter e interogacion, e ruman muhernan a ten’é na haltu di manera cu nos por a graba den nos mente e texto animador.

Ora e prizon di hende muher na Waldheim a cera, nan a transferí nos na Halle. Aki nan a permití nos ricibí pakete, i kico tabatin cosé den un par di slof cu mi tata a manda pa mi? Artículonan di Toren di Vigilancia! Ainda mi por corda esnan titulá “Amor Berdadero Ta Práctico” i “Mentira Ta Hiba na Perdementu di Bida.” Esakinan i otro artículonan tabata berdadero delicatesse, i ora nos a pasa nan secretamente di un ruman pa otro, cada un a tuma nota pa su mes.

Durante un razia, un dje guardianan a haña mi notanan personal scondí den mi matras. Mas despues, el a yamá mi paden pa interogá mi i a bisa cu e kier a sa explícitamente e nificacion dje artículo “E Prospecto pa Temedornan di Jehova pa 1955.” Como comunista, e tabata profundamente preocupá tocante morto di su lider, Stalin, na 1953, i e futuro a mustra scur. Pa loke ta nos, e futuro lo a trece algun mehoramentu den nos condicionnan den prizon, pero ainda mi no tabata na haltura di esei. Mi a splik’é yen di confiansa cu e prospectonan pa Testigonan di Jehova tabata lo mihó. Pakico? Mi a cita for dje texto principal dje artículo, Salmo 112:7: “Lo e no tin miedu di mal noticia: su curason ta constante, confiando den Jehova.”—AS.

Jehova Ta Keda Mi Refugio i Fortalesa

Despues di un malesa serio, mi a ser lagá liber for di prizon dos aña promé cu mi a completá mi sentencia, na mart di 1957. E oficialnan di Oost Alemania a bolbe pone presion riba mi pa motibu di mi actividadnan den Jehova su sirbishi. P’esei, dia 6 di mei, 1957, mi a probechá dje oportunidad pa hui pa West Berlin, i for di ei mi a muda pa West Alemania.

A dura vários aña promé cu mi a recobrá mi salú físico. Pero te n’e dia djawe ainda mi tin un apetit spiritual saludabel i ta spera cu anticipacion riba cada ehemplar nobo di E Toren di Vigilancia. De bes en cuando, mi ta examiná mi mes. Ainda mi tin inclinacion spiritual? Mi a cultivá cualidadnan excelente? E cualidad probá di mi fe ta un causa di alabansa i onor pa Jehova? Mi meta ta pa agradá Dios den tur cos, di manera cu e ta keda mi refugio i fortalesa pa semper.

[Nota]

[Plachi na página 26]

E oficina SS na Ravensbrück

[Rekonosementu]

Ariba: Stiftung Brandenburgische Gedenkstätten

[Plachi na página 26]

Mi pas pa traha pafó dje campamentu