Con pa Mantene Goso den Sirbishi di Tempu Completo

CUMPLIMENTU di profecia bíblico ta mustra claramente cu nos ta bibando den e último dianan dje sistema malbado aki. Conciente di esaki, sirbidónan di Jehova ta dedicá tur nan tempu cu ta razonablemente posibel na plama e bon nobo di su Reino. Mas cu 600.000 Testigo di Jehova a haci ahuste den nan bida pa asina participá den sirbishi di tempu completo. Algun di nan ta proclamadónan di Reino di tempu completo yamá pionero. Otronan ta boluntario di Betel na e sede di Sociedad Watch Tower of na un di su sucursalnan. Tin otronan mas cu ta misionero i superintendente biahero.

Bijbel ta indicá cu den e último dianan, lo tin “tempu crítico, duru pa trata cuné.” (2 Timoteo 3:1-5) E manuscrito di Bijbel na griego ta usa un expresion cu por ser traducí “tempu señalá feros.” Pues, ningun hende mester verwagt un bida sin problema den nos tempu. Pa algun minister cristian, e problemanan ta parce asina serio cu kisas nan ta puntra nan mes: ‘Mi por sigui den sirbishi di tempu completo of mi tin cu stop?’

Ki situacionnan por pone un hende reevaluá su situacion como pionero, boluntario di Betel, superintendente biahero of misionero? Tal bes ta existí un problema serio di salú. Kisas un miembro di famia di edad avansá of enfermo tin mester di cuido constante. Por ta un pareha casá ta cuminsá un famia. Ken cu stop di traha den sirbishi di tempu completo pa motibunan asina i debí na obligacionnan bíblico no tin nodi sinti bergwensa pa esei.

Sin embargo, kico si un persona ta planea pa descontinuá sirbishi di tempu completo pa falta di goso? Kisas un pionero ta mira poco reaccion faborabel den su ministerio i ta puntra su mes: ‘Pakico sigui cu mi estilo di bida di sacrificio propio ora cu masha poco hende ta scucha?’ Kisas un boluntario di Betel no ta asina contentu cu su asignacion. Of por ta cu un mal salú persistente, maske e no ta excluí sirbishi di pionero, finalmente ta caba cu un persona su felicidad. Con personanan asina por mantené nan goso? Laga nos considerá loke algun minister experenciá ta bisa.

Enfrentando Decepcion

Anny, kende ta bini di Suisa, a asistí na e Scol Bíblico di Galad di Watchtower na 1950. El a anticipá un asignacion di misionero den un pais no-europeo. Ora el a ser asigná bek na trabou di Betel na Europa, Anny tabata decepcioná. No obstante, el a aceptá su asignacion den e Departamento di Traduccion i ta trahando ei ainda. Con el a superá su decepcion? Anny ta splica: “Tabatin i ainda tin hopi trabou pa haci. Mi sintimentu i preferencianan no ta mes importante cu e trabou.”

Si nos ta decepcioná cu nos asignacion, kisas nos por desaroyá Anny su actitud. Nos preferencia personal no ta lo mas importante. Loke ta mas importante ta pa tur e vários responsabilidadnan asociá cu plamamentu dje mensahe di Reino ser bon manehá. Proverbionan 14:23 ta bisa nos cu “for di tur clase di trabou pisá ta bini un bentaha.” Sin importá ki asignacion nos a ricibí, si nos cumpli fielmente cuné, esei lo contribuí na efectuá e trabou di Reino. I den un trabou asina cu Dios ta duna, por tin gran satisfaccion—sí, goso.—Compará cu 1 Corintionan 12:18, 27, 28.

Sali Bon cu Otronan

Sirbishi di tempu completo ta encerá contacto estrecho cu tur clase di hende—den e ministerio di veld, na Betel, den un cas di misionero of miéntras bo ta bishitá un congregacion tras di otro como superintendente biahero. Pues, goso ta dependé gran parti di sali bon cu otronan. Sin embargo, ta difícil pa sali bon cu otronan den e ‘tempu feros’ cu a ser pronosticá pa e último dianan aki. Con un minister por evitá di perde su goso, asta si un persona a perturb’é? Kisas nos por siña algu for di Wilhelm.

Wilhelm a bira miembro di un famia di Betel na Europa na 1947. Despues di esei, el a traha algun tempu den e trabou di pionero i a sirbi como superintendente biahero. “Si ami cu mi casá mira cosnan cu nos ta pensa no ta bon of cu ta preocupá nos personalmente, nos ta conta Jehova con nos ta sinti, anto ta laga cosnan den su man p’e solucioná,” Wilhelm ta splica.—Salmo 37:5.

Kisas bo mes a ser perturbá dor dje comportacion di un compañero cristian cu a papia cu bo cu falta di respet of sin consideracion. Corda cu nos tur ta trompecá hopi bes den nos abla. (Santiago 3:2) Pues pakico no usa e situacion aki pa hala mas cerca dje “Tendedor di oracion”? (Salmo 65:2) Papia cu Jehova tocante e asuntu, anto lagu’é den su man. Si Dios ta deseá di haci cambio, lo e haci nan. Esnan cu ta biba den un cas di misionero tal bes tin cu tene esaki na mente si tension desaroyá riba e tereno aki, pasobra esaki lo yuda nan mantené nan goso den e sirbishi di Jehova.

Ora Tin Mal Salú

Poco hende semper tin un bon salú. Asta esnan cu ta den nan asina yamá flor di bida por ser afectá cu depresion of malesa. Problema cu salú ta obligá algun pa descontinuá sirbishi di tempu completo, pero despues nan ta haci excelente trabou como publicadónan di Reino. Sin embargo, otronan por sigui den e sirbishi di tempu completo apesar di enfermedad. Por ehempel, considerá Hartmut i Gislind.

Hartmut i Gislind ta un pareha casá cu a sirbi 30 aña como pionero, misionero i den e trabou biahero. Tur dos a sufri di periodonan di enfermedad serio cu tin biaha a laga nan físicamente i emocionalmente agotá. No obstante, nan a haci trabou excelente i tabata den posicion pa animá otronan cu ta pasa pruebanan similar. Ki conseho nan ta duna? “Wak futuro i no pasado. Purba saca lo mihó di tur situacion. Cada dia kisas ta trece solamente un oportunidad pa alabá Jehova. Usa e oportunidad ei i disfrutá di dje.”

Considerá e caso di Hannelore. El a padecé di malesa cu ta bolbe bek cada bes durante su 30 añanan como pionero, misionero, den e trabou biahero huntu cu su esposo i den sirbishi di Betel. Hannelore ta bisa: “Mi ta concentrá riba e cuestion cu Satanas a lanta, esta, cu hende ta sirbi Jehova solamente ora esei ta fácil pa nan haci. Dor di wanta prueba, mi tambe ta yuda mustra cu Satanas ta ekibocá.” Esaki por ta un motivacion fuerte. Corda cu bo lealtad personal na Jehova ora bo ta bou di prueba ta importante p’e.—Job 1:8-12; Proverbionan 27:11.

Ora di purba tuma un decision balansá en cuanto bo salú, considerá dos rasgo di Jesucristo su profecia tocante e conclusion dje sistema di cosnan. Jesus a pronosticá cu lo tin pest den un lugá tras di otro. Tambe e di: “E bon nobo aki dje reino lo ser predicá den tur e tera habitá.” (Mateo 24:3, 14; Lucas 21:11) Jesus tabata sa cu den e último dianan, su siguidónan lo lucha contra malesa. Pero el a realisá cu e trabou di predicá lo ser hibá a cabo no solamente dor di hende cu ta disfrutá di bon salú, sino tambe dor di personanan cu ta experenciá malesa serio. Si nos por sigui den e sirbishi di tempu completo apesar di enfermedad, Jehova lo no lubidá e amor cu nos ta mustra pa su nomber.—Hebreonan 6:10.

Manteniendo Goso Apesar di Apatia Público

Nos actitud por ser afectá p’e manera cu hende ta reaccioná n’e trabou di predicacion dje Reino. “Ta duru pa asta e pioneronan start un combersacion cu un doño di cas,” un minister experenciá a bisa. “Nos tur tin cu lucha pa mantené nos goso.” Sí, apatia público por mengua nos goso den sirbishi di veld. Pues con un pionero cu regularmente ta topa indiferencia por mantené su goso? Ministernan experenciá ta ofrecé e siguiente sugerencianan cu a duna bon resultado.

Apatia ta un desafio, pero e no ta nificá un derota. Riba su mes, indiferencia general no ta un motibu pa descontinuá sirbishi di tempu completo. Si nos apartá suficiente tempu pa studio diligente dje Scritura, nos por mantené nos goso apesar di apatia. Esei ta ‘ekipá nos pa tur bon obra,’ locual ta incluí papia cu esnan cu no ta scucha n’e bon nobo. (2 Timoteo 3:16, 17) Maske hende no kier a scucha profeta Jeremías, esei no a stop e. (Jeremías 7:27) Ora nos ta studia e Bijbel cu yudansa di publicacionnan cristian, nos por beneficiá mashá si nos tuma nota di informacion cu ta fortalecé nos fe i cu ta yuda nos trata cu apatia.

Asumiendo cu apatia ta un desafio, laga nos examiná nos actitud pa cu esnan na ken nos ta predicá. Di con nan ta indiferente? Por ehempel, na cierto parti di Europa, un motibu pa e apatia general ta e papel deplorabel cu religion falsu a hunga. Hende no ta sinti mas cu religion tin un lugá den nan bida, ni nan no kier tin nada di haci cu religion. Nos mester ta flexibel ora di papia cu hende tocante asuntunan cu ta afectá nan, manera desempleo, salú, crímen, intolerancia, medio ambiente i e menasa di guera.

Den nos palabranan di introduccion na un doño di cas, kisas nos por mencioná un noticia di interes local. Esei ta loke Dietmar a purba ora e tabata predicá den un pueblito caminda e tabatin masha poco éxito. Un residente a mencioná cu e pueblito a experenciá un tragedia e dia promé. Despues di esei, na tur porta Dietmar a expresá duele profundo pa e tragedia. “Di ripiente, e hendenan a cuminsá papia,” el a bisa. “E tragedia tabata e tópico di dia. Mi tabatin hopi combersacion bon e dia ei, debí cu mi a mustra interes den nan bida.”

Nos tin cu duna hende un testimonio di Reino na unda cu nos topa nan. Testificacion informal por ta fructífero i nos por entrená nos mes den e actividad aki dor di usa e sugerencianan cu publicacionnan basá riba Bijbel ta ofrecé. Goso por resultá for di un par di palabra amigabel of dor di laga e revistanan Toren di Vigilancia i Spierta! cu un doño di cas. Si nos a haci rebishita i a cuminsá conducí un studio di Bijbel cu un persona interesá, tal bes e por bisa nos di un otro persona interesá ora nos puntr’é: “Bo conocé cualkier otro hende cu lo tin gana di studia Bijbel?” Esaki lo por hiba na establecé un otro studio di Bijbel. Di tur manera, laga nos ta positivo, dependiendo riba Jehova cu oracion, i no laga apatia desanimá nos.

Animacion for di Otronan

Jürgen i Christiane ta pionero i den e trabou biahero pa mas cu 30 aña. Un biaha nan asignacion a encerá predicá den un área caminda mayoria hende tabata indiferente i cabesura. Cuantu Jürgen i su esposa a anhelá poco animacion! Sin embargo, pa un of otro motibu, otronan den e congregacion no a respondé na nan necesidad.

Pues di experencia Jürgen sa cu “algun pionero ta pasa den tempu difícil. Nan tin mester di mas animacion for di ancianonan i otro publicadónan.” Dios a bisa Moises pa animá i fortalecé Hosué. (Deuteronomio 3:26-28) I cristiannan mester ta un fuente di animacion un pa otro. (Romanonan 1:11, 12) Publicadónan di Reino por animá esnan den sirbishi di tempu completo cu palabranan edificante i dor di compañá nan den e ministerio tempu-tempu.

E Goso di Jehova—Nos Fortalesa

Cristiannan cu a pasa mayor parti di nan bida como pionero of misionero, sirbiendo na Betel of bishitando congregacionnan den e trabou biahero a descubrí cu mayoria problema ta di corto duracion, pero algun ta dura largu. Asta e poco problemanan cu nunca ta parce di caba no mester horta nos di nos goso. Ramon, kende a sirbi den un asignacion den estranheria pa mas cu 45 aña, ta sugerí pa ki ora cu problemanan haci nos tristu, “nos mester pensa riba e hopi bendicionnan cu nos tin i riba e miles di otro hendenan cu ta pasa hopi mas trabou cu nos.” En berdad, rond parti mundu compañeronan creyente ta experenciá sufrimentu i Jehova realmente ta interesá den nos tur.—1 Pedro 5:6-9.

P’esei, anto, si nos circunstancianan personal ta permití nos participá den e sirbishi di tempu completo i keda den dje, laga nos mantené nos goso dor di dependé riba nos Tata celestial. E ta fortalecé su sirbidónan, i nos tur mester corda cu ‘e goso di Jehova ta nos fortalesa.’—Nehemías 8:10.

[Plachi na página 21]

“Mi sintimentu i preferencianan no ta mes importante cu e trabou”

[Plachi na página 22]

“Nos ta conta Jehova con nos ta sinti, anto ta laga cosnan den su man”

[Plachinan na página 23]

“Purba saca lo mihó di tur situacion. Cada dia kisas ta trece solamente un oportunidad pa alabá Jehova”

[Plachi na página 23]

“Dor di wanta prueba, mi tambe ta yuda mustra cu Satanas ta ekibocá”

[Plachinan na página 24]

“Algun pionero ta pasa den tempu difícil. Nan tin mester di mas animacion for di ancianonan i otro publicadónan”

[Plachi na página 24]

“Nos mester pensa riba e hopi bendicionnan cu nos tin”