Mustra Aprecio Profundo pa Privilegionan di Sirbishi Sagrado

NOS no mester mira asignacionnan di sirbishi sagrado como algu gewoon. Ora cu sacerdotenan den Huda di antigwedad a desplegá indiferencia pa cu nan privilegionan relacioná cu e tempel di Jehova, el a censurá nan severamente. (Malakías 1:6-14) I ora algun persona den Israel a urgi e nazareonan pa no tuma nan responsabilidadnan relacioná cu sirbishi sagrado mashá na serio, Jehova a reprendé e israelitanan hacidónan di picá aki. (Amos 2:11-16) Cristiannan berdadero tambe ta participá den sirbishi sagrado, i nan ta tuma esaki hopi na serio. (Romanonan 12:1) E sirbishi sagrado aki tin hopi faceta, i nan tur ta importante.

Tempu Jesus tabata riba tera ainda huntu cu su siguidónan, el a entrená nan pa ta proclamadónan dje Reino di Dios. Cu tempu nan mensahe lo a yega te n’e partinan mas lehano di tera. (Mateo 28:19, 20; Echonan 1:8) Nan ta cumpli cu e predicacion aki cu asta mas urgencia den e último dianan dje sistema actual di cosnan.

Tur Testigo di Jehova ta participá den e trabou aki. Cientos di miles di nan ta haña goso dor cu nan por participá trahando como pionero. Pa satisfacé e necesidad den e trabou mundial, miles di ruman a haci nan mes disponibel p’e trabou special di tempu completo na Betel, den e trabou biahero como superintendente di circuito i di distrito of den sirbishi di misionero. Kico esaki por exigí di parti di esnan cu kier continuá den tal sirbishi special?

Ora Situacionnan Familiar Urgente Ta Exigí Atencion

Generalmente, promé cu un persona iniciá cu sirbishi special di tempu completo, e tin cu haci cierto ahustenan den su circunstancianan. No ta tur hende por haci esaki. Kisas e ta bira imposibel dor cu un persona tin obligacionnan bíblico caba. Pero, kico ta sosodé ora esnan cu ya caba ta den sirbishi special haña nan confrontá cu debernan urgente di famia, kisas cu ta trata di mayornan di edad avansá? Principionan i conseho bíblico manera esnan cu ta sigui, ta duna guia necesario.

Henter nos bida mester drei rond di nos relacion cu Jehova. (Eclesiástes 12:13; Marco 12:28-30) Nos tin cu mustra aprecio profundo pa cosnan sagrado cu a ser confiá na nos cuido. (Lucas 1:74, 75; Hebreonan 12:16) Na un ocasion, Jesus a bisa un homber cu mester a haci cambio den e manera cu el a pone prioridad, cu su deber ta p’e ocupá su mes completamente cu e trabou di declará e Reino di Dios. Ta parce cu e homber tabatin intencion di posponé e actividad ei te despues cu su tata a muri. (Lucas 9:59, 60) Di otro banda, Jesus a exponé e pensamentu robes di cualkier persona cu a pretendé di a dedicá tur cos na Dios i p’esei no a “haci ni un solo cos mas pa su tata of su mama.” (Marco 7:9-13) Apostel Pablo tambe a mustra riba e responsabilidad serio di percurá pa ‘esnan cu ta di nos mes,’ incluso mayor i welonan.—1 Timoteo 5:3-8.

Esaki ta nificá cu ora surgi situacionnan familiar urgente, cu esnan den sirbishi special ta obligá di bandoná nan asignacion pa bai cuida miembronan di famia? E contesta ta dependé di hopi factor. E ta un decision personal. (Galationan 6:5) Hopi ruman a sinti cu, apesar cu nan tabata atesorá nan asignacion, lo ta mihó pa nan ta cerca nan mayornan i percurá e cuido necesario pa nan. Di con? E necesidad por tabata crucial, kisas no tin ningun otro miembro di famia cu por a yuda of e congregacion local kisas no por a percurá loke tabata necesario. Algun ruman a logra traha pionero miéntras nan ta duna e cuido ei. Otronan por a drenta sirbishi special di tempu completo atrobe, despues cu nan no mester a duna cuido mas. Sin embargo, den hopi caso, tabata posibel pa trata cu e situacion di otro manera

Cargando Nan Responsabilidad

Ora cu debernan urgente surgi, algun ruman den sirbishi special di tempu completo a logra duna atencion na esnan den necesidad, sin cu nan mester a bandoná nan asignacion. Considerá djis un par di ehempel for dje gran cantidad.

Un pareha cu ta sirbiendo n’e sede mundial di Testigonan di Jehova a drenta sirbishi di Betel na 1978, despues cu ya caba nan a traha e trabou di circuito i di distrito. E asignacion dje ruman homber ta enbolbé responsabilidadnan di bastante peso den e organisacion teocrático. Pero su mayornan tambe tabatin mester di yudansa. E pareha betelita aki a biaha tres pa cuater bes pa aña—rond di 3.500 kilometer bai i bin—pa cuida nan mayornan. Nan mes a traha un cas pa satisfacé e necesidadnan dje mayornan. Nan a biaha bai cerca nan mayornan ora esakinan a bira malu di ripiente. Pa un 20 aña nan a dedicá casi tur nan dianan di vakansi na e responsabilidad aki. Nan ta stima i onra nan mayornan, pero tambe nan ta atesorá nan privilegio di sirbishi sagrado.

Un otro ruman homber tabatin 36 aña trahando como superintendente biahero ora el a hañ’é confrontá cu loke e ta describí como un dje situacionnan mas desafiante den su bida. Su suegra di 85 aña di edad, un fiel sirbidó di Jehova, mester a bai biba cerca un hende cu por a yud’é. N’e tempu ei, mayoria di su yunan a pensa cu nan lo no por a tum’é den nan cas. Un miembro di famia a bisa e superintendente biahero cu e i su casá mester a bandoná nan sirbishi i percurá pa e mama na fabor dje famia. Pero e pareha no a bandoná nan sirbishi precioso ni tampoco nan a neglishá necesidad dje mama. E siguiente nuebe añanan, mayoria tempu el a pasa huntu cu nan. Na principio nan a biba den un caravana, despues den vários apartamento cu e circuitonan a percurá. Pa periodonan largu, e ruman homber, cu e tempu ei tabata superintendente di distrito, a sigui biaha cumpliendo cu su asignacionnan miéntras su esposa a keda cerca su mama pa percurá p’e haña un cuido amoroso henter dia. Tur siman despues dje reunion di diadomingo, e esposo tabata biaha distancianan largu bek pa bai yuda nan. Hopi hende cu tabata sa dje situacion a mustra aprecio profundo pa loke e pareha tabata haciendo. Cu tempu otro miembro di famia tambe a sinti nan motivá pa duna cierto yudansa. Miles di hende dje pueblo di Jehova ta sigui beneficiá dje sirbishi dje pareha aki cu a mustra sacrificio propio, dor cu nan a pega na nan privilegio di sirbishi special di tempu completo.

Cu Cooperacion di Famia

Ora vários miembro di famia ta reconocé e balor di sirbishi special di tempu completo, kisas nan por cooperá di tal manera cu por lo ménos algun di nan por participá den dje.

Un spiritu asina di cooperacion den famia ta loke a yuda un pareha canades cu ta sirbi como misionero na West Africa. Nan no a djis spera cu nada lo sosodé, ni no a sinta warda, te cu un emergencia a presentá. Sino, promé cu nan a bai e Scol Bíblico di Galad di Watchtower, como preparacion pa sirbishi den estranheria, e esposo a sinta cu su ruman homber mas yong i papia tocante e cuido di nan mama den caso cu e bira malu of mester di yudansa. Demostrando su amor pa nan mama i tambe aprecio pa balor dje trabou di misionero, e ruman homber a bisa: “Awor aki mi tin un famia i yu. Mi no por bai masha leu i haci loke abo sí por. P’esei si algu pasa Mami, ami lo percurá p’e.”

Un pareha cu ta sirbi na Sur América a ricibí hopi cooperacion di parti di famia dje esposa pa cuida su mama cu tabata birando grandi. Un di su ruman muhernan cu su esposo a percurá pa e mama te n’e momento cu e ruman muher a haña un malesa mortal. Kico awor? Pa kita tur preocupacion, su sua a skirbi: “Miéntras ami i e muchanan ta na bida, nunca boso lo tin cu bandoná boso sirbishi di misionero.” Mas yudansa di famia a bini ora un otro ruman muher i su esposo a bandoná nan cas i a bin biba cerca e mama pa nan por a cuid’é. I nan a haci esei te n’e mama su morto. Ki un excelente spiritu di cooperacion! Nan tur a yuda pa apoyá e sirbishi di misionero.

Mayornan Cu Ta Duna Jehova Libremente

Hopi biaha mayornan ta demostrá un aprecio remarcabel pa sirbishi sagrado. Nan mes yunan ta entre nan posicionnan di mas balioso cu cua nan por onra Jehova. (Proverbionan 3:9) Hopi mayor cristian ta animá nan yunan pa drenta e sirbishi di tempu completo. I algun di nan ta pensa manera Hana, kende a duna su yu Samuel na sirbishi di Jehova “te na tempu indefiní,” esta, pa “tur e dianan di su existencia.”—1 Samuel 1:22, 28.

Un mama asina a skirbi su yu muher na Africa: “Nos ta gradicí Jehova pa e privilegio maraviyoso cu bo tin. Mas mihó nos no por kier.” I na un otro ocasion el a bisa: “Pa nos, ser separá for di otro ta en berdad un sacrificio, pero ta ki un goso pa mira con Jehova ta cuidá bo!”

Despues cu el a repasá e vários situacionnan cu a presentá den cua nan mester a percurá cuido pa su mayornan di edad, un misionero na Ecuador a skirbi: “Mi ta kere cu e yudansa di mas grandi cu ami cu mi esposa por a ricibí, ta oracion di mi tata. Despues di su morto mi mama a conta nos: ‘No a pasa ni un dia sin cu bo tata a pidi Jehova den oracion pa permití boso dos keda den boso asignacion.’”

Un pareha di mas edad na California, Merca, tabata contentu cu un di nan yu hombernan ta den e sirbishi di tempu completo. E yu homber ei cu su casá tabata na Spaña ora e mama a muri. Otro miembronan di famia a pensa cu mester a haci areglonan pa percurá p’e tata. Dor cu nan tur tabata ocupá cu trabou seglar i criamentu di yu, nan a sinti cu nan no por a aceptá e responsabilidad ei. Mas bien, nan a haci un apelacion fuerte riba e pareha cu tabata den sirbishi special di tempu completo, pa regresá cas i percurá p’e tata. Sin embargo, e tata, aunke e tabatin 79 aña di edad, ainda tabata disfrutá di un bon salú, i tambe e tabatin un bista spiritual cla. Durante un reunion di famia, despues cu vários persona a duna nan opinion, e tata a lanta para i a bisa cu un bos firme: “Mi kier pa nan regresá Spaña i sigui haci nan trabou.” Nan a haci esei, pero tambe nan a yud’é den formanan palpabel. Actualmente nan ta asigná na Spaña den e trabou di circuito. Desde e dia dje reunion di famia, otro miembronan di famia ta mustra aprecio pa e trabou cu e pareha ta haciendo den estranheria. Despues di algun aña un dje otro yu hombernan a tuma e tata den su cas pa cuid’é te dia cu el a muri.

Na Pennsylvania, Merca, un ruman homber ungí cu a traha pionero pa rond di 40 aña, tabatin mas cu 90 aña di edad ora su esposa a haña un malesa grave i a muri. E tabatin un yu homber i tres yu muher, ademas di un numeroso cantidad di yu spiritual. Un di su yu muhernan tabatin 40 aña den e sirbishi di tempu completo, i a traha huntu cu su esposo como misionero, den e trabou biahero i na Betel. El a yuda haci areglo pa e tata haña e cuido apropiado. E rumannan local tambe a yuda dor di hib’é reunion na Salon di Reino. Despues, ora cu e yu muher su casá a muri, el a puntra e tata si e tabata kier p’e sali for di Betel i bin cuid’é. E tata tabatin aprecio profundo pa cosnan sagrado, i el a haña cu por a percurá di un otro forma pa su necesidadnan. P’esei el a contestá: “Esei lo ta e cos di mas malu cu lo bo por haci, i lo ta pió ainda si ami permití bo hacié.”

Congregacionnan cu Ta Yuda

Algun congregacion a resultá di gran yudansa, dunando cuido na mayornan di edad avansá dje rumannan cu ta den sirbishi special di tempu completo. Nan tin aprecio special pa esnan cu a dedicá hopi aña na e clase di sirbishi ei. Aunke e congregacionnan aki no por libra e yunan di na responsabilidad bíblico, nan ta haci hopi pa aliviá e carga di tal forma cu no ta necesario p’e yunan bandoná nan asignacion special.

Un pareha for di Alemania a cumpli cu nan asignacion den estranheria pa rond di 17 aña, mayoria tempu como superintendente biahero, ora necesidadnan dje ruman homber su mama di mas edad a bira mas urgente. Tur aña nan a usa nan vakansi pa yud’é. Testigonan cu a biba den cercania tambe a percurá yudansa amoroso. Anto ora e pareha den sirbishi di tempu completo tabata cerca e mama durante un periodo crucial, ancianonan dje congregacion local a haci areglo pa reuní cu nan. Nan tabata bon na altura di loke e pareha tabata haci regularmente pa e mama. Pero tambe nan a reconocé e balor dje sirbishi special den cua e pareha tabata participá. P’esei, e ancianonan a splica di un programa cu nan tin intencion di sigui pa percurá pa e mama i a bisa despues: “Bo no por percurá pa bo mama mas cu bo ta haciendo awor; nos lo yudá bo pa asina bo por keda cumpli cu bo asignacion na Spaña.” P’e último shete añanan, e ancianonan aki a sigui haci esei.

Mescos tambe, un ruman homber cu for di 1967 ta sirbi na Senegal a ricibí hopi apoyo amoroso for dje congregacion na cua su tata a asistí. Ora un problema a presentá, e esposo, cu cooperacion boluntario di su casá, a biaha bai su so Merca pa yuda su mayornan. El a haña cu e mester a keda cerca nan pa vários luna. E situacion tabata ferfelu, pero despues cu el a haci loke tabata na su alcanse, e congregacion a bula aden i a duna yudansa pa asina e por a sigui den sirbishi di misionero. Pa un periodo di mas cu 18 aña, e congregacion a percurá yudansa amoroso den un sin fin di manera, promé pa e tata (asta ora e no tabata reconocé mayoria di nan mas) i despues pa e mama. Esaki a libra e yu homber di su responsabilidad? No; hopi biaha e tabata bin for di Senegal i tabata usa su dianan di vakansi pa yuda tantu cu e tabata por. Pero tabata un goso pa hopi ruman di sa cu nan ta yuda e pareha balente aki keda den sirbishi special di tempu completo na Senegal.

Jesus a bisa cu esnan cu laga tur cos pa causa dje bon nobo lo haña shen biaha mas tantu ruman homber, ruman muher, mama i yunan. (Marco 10:29, 30) Esaki sigur-sigur ta e caso entre sirbidónan di Jehova. Un pareha cu ta sirbi actualmente na Benin, West Africa, a experenciá esaki den un manera special ora dos Testigo den e congregacion di nan mayornan a bisa nan pa no preocupá pa nan mayornan. Nan a agregá: “Boso mayornan ta nos mayornan tambe.”

Sí, tin vários manera den cua nos por mustra cu nos tin aprecio profundo pa privilegionan di sirbishi sagrado. Tin caminda cu abo kisas por mustra esaki asta mas plenamente?

[Plachinan na página 26]

Nan a haci nan mes disponibel pa sirbishi special di tempu completo