Mi A Mira “Esun Menor” Bira “un Nacion Poderoso”

MANERA WILLIAM DINGMAN A RELAT’E

Tabata aña 1936; e lugá, Salem, Oregon, Merca. Mi tabata na un reunion di Testigonan di Jehova. E pregunta a lanta: “Unda e multitud grandi ta?” (Revelacion 7:9, “King James Version”) Mi tabata e único hende nobo, di manera cu nan tur a mustra dede riba mi i a bisa: “At’ei!”

MEIMEI di década ’30, tabatin relativamente poco hende entre Testigonan di Jehova cu tabatin e speransa bíblico di biba pa semper riba tera den Paradijs. (Salmo 37:29; Lucas 23:43) Cosnan a cambia dramáticamente desde e tempu ei. Pero lagá mi conta tocante e sucesonan cu a hiba na mi presencia n’e reunion ei na Salem, Oregon.

Mi tata tabata aboná riba The Golden Age, nomber anterior cu e revista Spierta! tabatin. Tempu mi tabata un tiener, mi tabata gusta les’é, i mi a keda convencí cu e tabata contené berdad bíblico importante. P’esei un dia mi a manda un cupon cu a aparecé parti patras di un Golden Age. El a ofrecé e lector 20 foyeto, un buki i nomber dje congregacion di Testigonan di Jehova mas cerca. Ora mi a ricibí e literatura, mi a bai di cas pa cas i a laga tur e foyetonan i tambe e buki.

E tempu ei ningun hende no a studia Bijbel cu mi. Eigenlijk, nunca mi a papia cu un Testigo di Jehova. Pero awor, cu e adres dje Salon di Reino mas cerca den man, mi a stuur 40 kilometer bai Salem, Oregon, pa asistí na un reunion. Tabata ei, ora mi tabatin solamente 18 aña di edad, cu mi a ser distinguí como “e multitud grandi.”

Aunke mi no tabatin prácticamente ningun preparacion p’e ministerio, mi a cuminsá predicá cu Congregacion Salem. Mi a ser animá pa incluí tres punto básico den mi testificacion. Di promé, cu Jehova ta Dios; di dos, cu Jesucristo ta su Rey nombrá; i di tres, cu e Reino ta e único speransa p’e mundu. Mi a trata na compartí e mensahe ei na tur porta.

Despues di a asociá cu Testigonan di Jehova na Salem pa dos aña, mi a bautisá dia 3 di april, 1938. E Testigonan na Salem tabata encantá pa mira vários di nos di “e multitud grandi” ser bautisá. Na februari 1939, mi a bira pionero, of minister di tempu completo. Na december dje aña ei, mi a aceptá un invitacion pa muda pa Arizona, caminda tabatin un necesidad mas grandi pa proclamadónan di Reino.

Trabou di Pionero na Arizona

E trabou di Testigonan di Jehova tabata nobo na Arizona, i tabatin hopi malcomprendimentu tocante nos. P’esei ora Merca a drenta Guera Mundial II, nos a pasa den hopi persecucion. Por ehempel, tempu mi tabata sirbi na Stafford, Arizona, na 1942, tabatin papiá cu lo bai tin atake contra nos di parti di un grupo di mormon. Pa casualidad ami cu mi partnernan pionero tabata biba pegá cu e cas di un obispu mormon cu tabata respetá nos i cu a bisa: “Si misioneronan mormon tabata mes activo cu e Testigonan, Iglesia Mormon lo a bai dilanti.” P’esei den iglesia el a bisa bon cla kico e ta pensa: “Mi ta tende cu tin papiá pa forma un atake contra e mucha hombernan Testigo. Wel, mi ta biba pegá cu e mucha hombernan ei, i si tin atake, lo bai tin un scopet net riba e curá. E scopet ei lo ser usá—no contra e Testigonan, sino contra e atacantenan. Pues si boso kier atacá, boso sa kico pa spera.” E atake no a bini nunca.

Durante mi tres añanan na Arizona, nos a ser arestá i encarcelá vários biaha. Un biaha nan a cerá mi pa 30 dia. Pa contrarestá e persecucion policial den nos ministerio, nos a forma loke nos a yama un escuadron buladó. E Testigo encargá cu e grupo a bisa nos: “Manera nos nomber ta, asina nos ta. Nos ta cuminsá cinc’or of seis’or di mainta, laga un tratado of foyeto na tur porta, i despues nos ta bula bai.” Nos “escuadron buladó” a cubri basta un pida di e estado di Arizona. Sin embargo, finalmente el a ser disolvé pasobra e forma di predicá ei no a permití nos duna yudansa na esnan interesá.

Scol di Galad i Sirbishi Special

Na december 1942, mi tabata un dje vários pioneronan na Arizona cu a ricibí un carta di invitacion pa un scol nobo di misionero cu Testigonan di Jehova tabata estableciendo. Na cuminsamentu e scol tabata yama Colegio Bíblico di Galad di Watchtower. Despues e nomber a cambia pa Scol Bíblico di Galad di Watchtower. E campus tabata situá casi 4.800 kilometer leu, pegá cu e stad di Ithaca den nort di estado New York.

Despues di un bishita breve na Oregon, na januari 1943, vários di nos grupo di pionero a bandoná e calor dje Desierto di Arizona den un bus di Greyhound. Vários dia despues nos a yega na nos destinacion i topa cu sneu di un winter na parti nort di estado di New York. E scol a habri dia 1 di februari, 1943, ora su presidente, Nathan H. Knorr, a bisa den su discurso inaugural n’e shen studiantenan: “NO ta e propósito dje colegio aki pa ekipá boso pa ser ministernan ordená. Boso ta ministernan caba i ta activo den e ministerio pa añanan. . . . E curso di studio n’e colegio ta p’e propósito exclusivo di prepará boso pa ta ministernan mas cualificá den e teritorionan na cua boso ta bai.”

Na principio mi a sintí mi incómodo na Galad pa motibu cu mi a haña poco educacion seglar. Pero e instructornan tabatin hopi comprension pa mi, i mi a bin disfrutá masha tantu di mi studionan. Nos klas a gradua despues di cincu luna di entrenamentu intensivo. Despues di esei, algun di nos a ser mandá n’e sede mundial di Testigonan di Jehova na Brooklyn, New York, caminda nos a ricibí mas entrenamentu pa prepará nos pa sirbi den e trabou biahero como superintendente di circuito. Mi promé asignacion tabata na North i South Carolina.

E tempu ei, e superintendente di circuito tabata casi constantemente di biahe. Nos tabata keda un dia cu un congregacion chikitu of dos dia si e tabata unu grandi. Mayoria congregacion e tempu ei tabata chikitu. Pues despues di pasa un dia completo, i hopi biaha kedando lantá casi te meianochi pa haci bishita i contestá pregunta, mi tabata lanta rond di cinc’or e siguiente dia pa biaha p’e siguiente congregacion. Mi a sirbi den e trabou di circuito pa rond di un aña, i despues mi a traha pionero pa un tempu na Tennessee i New York.

Pa Cuba i Despues pa Puerto Rico

Na mei 1945, mi a ser mandá huntu cu vários otro ruman, na mi promé asignacion di misionero den estranheria: Cuba! E mésun anochi cu nos a yega Havana, capital di Cuba, nos a sali traha cu revista. Nos a keda Havana te ora nos por a haña un cas na Santa Clara. Nos compensacion mensual tabata apénas US$ 25 pa persona pa tur nos necesidadnan, incluyendo cuminda i huur. Nos a traha cama i mueble cu e materialnan cu tabata disponibel i a usa caha di apel pa pone paña doblá aden.

E siguiente aña mi a ser asigná n’e trabou di circuito. E tempu ei henter Cuba tabata un solo circuito. Debí cu e superintendente di circuito promé cu mi tabatin pia largu i tabata gusta cana, e rumannan tabatin cu literalmente core pa ten’é bij. Evidentemente nan a pensa cu ami lo ta mescos, di manera cu nan tabatin tur cos planeá pa mi bishita. Nan tur no tabata sali den sirbishi mes dia sino tabata dividí den grupo i tabata traha cu mi beurt pa beurt. E promé dia un grupo a bai cu mi na un teritorio leu; e siguiente dia un otro grupo a hibá mi un otro teritorio leu asina, etcétera. Na fin dje bishita mi tabata agotá, pero mi a disfrutá di dje. Mi tin grato recuerdo dje congregacion ei.

Pa 1950 nos tabatin mas cu 7.000 publicadó di Reino na Cuba, rond di e mésun cantidad cu México tabatin. Na juli dje aña ei, mi a asistí n’e congreso internacional Aumento di Teocracia na Yankee Stadium, New York City. Despues di esei, mi a ricibí un asignacion di misionero nobo, na Puerto Rico. Entre e misioneronan nobo for di klas 12 di Galad tabatin Estelle i Thelma Weakley, kendenan a compañá mi riba e vuelo pa Puerto Rico.

Ocho aña despues ami cu Estelle a casa den un ceremonia simpel na Bayamón, Puerto Rico, riba plataforma durante e pausa di nos asamblea di circuito. Tantu promé como despues di nos matrimonio, mi a sirbi den e trabou di circuito. Durante nos mas cu dies aña na Puerto Rico, ami cu Estelle a mira un gran aumento—for di ménos cu 500 publicadó te na mas cu 2.000. Nos por a yuda hopi persona yega n’e punto di dedicacion i bautismo, i nos a participá den establecé vários congregacion nobo.

Na december 1960, Milton Henschel dje sede mundial di Testigonan di Jehova na Brooklyn, New York, a bishitá Puerto Rico i a papia cu e misioneronan. El a puntra si algun di nos lo kier a haci nos mes disponibel pa un otro asignacion. Ami cu Estelle tabata entre esnan cu a ofrecé nan mes como boluntario.

Nos Hogar na República Dominicana

Nos asignacion nobo tabata República Dominicana, i nos a fiha 1 di juni, 1961, como nos fecha pa bai. Dia 30 di mei e dictador dominicano, Rafael Trujillo, a ser asesiná, i vuelonan p’e pais a ser cancelá. Pero, pronto tabatin vuelonan atrobe, i nos por a bula pa República Dominicana dia 1 di juni manera nos a planea.

E pais tabata den un estado di agitacion ora nos a yega, i tabatin bastante actividad militar. Nan tabatin miedu cu lo bai tin un revolucion, i soldatnan tabata listra tur hende riba caretera. Nan a para nos na vários punto di control, i na cada un nan a listra nos ekipahe. Nan tabata saca tur cos for di nos maletanan, asta e artículonan di mas chikitu. Esei tabata nos promé experencia na República Dominicana.

Nos a keda den e capital, Santo Domingo, pa vários siman promé cu nos a bai nos promé asignacion na La Romana. Durante e dictadura di Trujillo, nan a bisa e público cu Testigonan di Jehova tabata comunista i cu nan tabata e peor clase di hende. Como resultado, e Testigonan a ser persiguí malamente. Pero, poco poco nos por a caba cu e prehuicio.

Despues di a traha na La Romana pa un tempu corticu, nos a cuminsá sirbi un biaha mas den e trabou di circuito. Anto, na 1964, nos a ser asigná como misionero n’e stad di Santiago. E siguiente aña República Dominicana a experenciá un revolucion, i un biaha mas e pais tabata den un estado di agitacion. Durante e conflicto ei nos a ser transferí na San Francisco de Macorís, un pueblo conocí pa su actividadnan político. No obstante, nos a predicá libremente sin interferencia. Apesar dje intrankilidad político, nos asta a forma un congregacion nobo. Atrabes dje añanan cu a sigui, nos a haña otro asignacionnan promé cu nos a ser reasigná na nos hogar actual na Santiago.

Un cos nos mester bisa: Nos a mira Jehova su bendicion riba e trabou aki na República Dominicana. Ora nos a yega na 1961, tabatin rond di 600 Testigo i 20 congregacion. Awor tin casi 20.000 publicadó cu ta predicá e bon nobo dje Reino di Dios den mas cu 300 congregacion. E prospectonan pa mas aumento ta tremendo, manera e asistencia di 69.908 persona n’e Memorial dje morto di Cristo na 1996 ta mustra. Esei ta rond di tres bes i mei e cantidad di publicadó!

Awor un Nacion Poderoso

Aunke e esena dje mundu ta sigui cambia, e mensahe di Bijbel cu Testigonan di Jehova ta predicá ta keda mescos. (1 Corintionan 7:31) Jehova ainda ta Dios, Cristo ainda ta Rey, i e Reino ta mas bisto cu nunca e único speransa p’e mundu.

Na mésun tempu, un transformacion maraviyoso a tuma lugá entre Jehova su pueblo desde cu mi a asistí n’e reunion aya na Salem, Oregon, mas o ménos 60 aña pasá. E multitud grandi di berdad a bira grandi, yegando mas cu cincu miyon na cantidad. Ta net manera Jehova a profetisá di su pueblo: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.”—Isaías 60:22.

Despues di casi 60 aña den e ministerio di tempu completo, mi ta felis di tin e goso di sigui predicá i siña den mi asignacion como misionero. Ki un privilegio magnífico di por participá den e trabou ei i di por a mira “esun menor” bira “un nacion poderoso”!

[Plachi na página 21]

Huntu cu mi casá, na República Dominicana