Tur Kehamentu Ta Malu?

Cua iritacionnan ta mas doloroso cu esnan di cua nos no por keha?—Markes De Custine, 1790-1857.

DOS aña largu el a wanta intimidacion sexual na man di un colega di trabou. Ora el a protestá, a contest’é cu palabranan di abusu i hende a ignor’é deliberadamente. E tension wantá paden a cuminsá afectá su salú, pero kico e por a haci? Mescos tambe, un alumno cu tabata e mihó di su klas a ser expulsá debí cu su concenshi no a permitié tuma parti den ehercicionan di artenan marcial cu tabata obligatorio n’e scol. Tur dos a sinti cu inhusticia a ser hací contra nan, pero nan mester a keha? Si nan hacié, nan por a spera un alivio of esei solamente lo a haci e situacion mas pió?

Kehonan manera esakinan i otronan ta comun awe, foral ya cu nos ta biba meimei di hende imperfecto den un mundu cu ta ménos di lo ideal. Kehamentu ta encerá henter e escala for di expresá pasivamente e malcontentu, pena, dolor of rencor pa cu un situacion te na alegacionnan formal contra un persona of grupo. Mayoria hende ta preferá di evitá kehamentu i confrontacion; sin embargo, semper bo mester keda ketu? Kico ta e punto di bista di Bijbel?

E Efectonan Negativo Riba Bo Mes i Otronan

No tin duda cu un spiritu di kehamentu crónico ta perhudicial, i Bijbel ta conden’é. Un kehadó lo causa daño físico i spiritual pa su mes i iritacion pa esnan cu ta su tópico di keho. Refiriendo na un esposa kehoso, e proverbio bíblico ta bisa: “Un dak cu ta lek cu ta core cu bo den e dia di un awaceru constante i un esposa pleitista ta comparabel.” (Proverbionan 27:15) Foral kehamentu dirigí contra Jehova of un di su percuracionnan ta malu. Ora e nacion di Israel a keha tocante e mana percurá milagrosamente durante nan biahe di 40 aña dor di desierto, yamand’e “pan despreciabel,” Jehova a manda colebra venenoso pa castigá e kehadónan irespetuoso, i hopi a muri.—Númeronan 21:5, 6.

Ademas, Jesus a consehá su siguidónan, pa no keha tocante “e pida yerba secu” di faltanan cu nos ta mira cerca nos próhimo, sino pa ta bon conciente di e “biga” mas grandi di faltanan cu nos mes tin. (Mateo 7:1-5) Den mésun direccion, Pablo a condená husgamentu (un forma di kehamentu) di otronan como “inexcusabel . . . siendo cu abo cu ta husga ta practicá e mésun cosnan.” E spiertamentunan aki contra kehamentu mester impulsá nos pa evitá di ta innecesariamente crítico i desaroyá un spiritu di keha.—Romanonan 2:1.

Tur Kehamentu Ta Ser Condená?

Nos mester concluí anto, cu tur forma di keho tin cu ser condená? No, no ta asina. Bijbel ta indicá cu tin hopi inhusticia den e mundu defectuoso aki den cua nos ta biba cu debidamente ta exigí pa ser coregí. Den un ilustracion, Jesus a mencioná un hues inhustu cu di mala gana a efectuá husticia na un biuda oprimí di manera cu e biuda lo ‘no a sigui bini i dal e te cu e caba cuné.’ (Lucas 18:1-8) Den algun aspecto nos tambe tin cu persistí den nos kehonan te ora cu e malecho ser rectificá.

Dor di animá nos pa pidi den oracion p’e Reino di Dios bini, Jesus no a insta nos pa reconocé e deficiencianan dje mundu actual i pa ‘sclama’ na Dios pa un solucion? (Mateo 6:10) Ora e “gritu di keho” tocante e maldad di antiguo Sódoma i Gomora a yega n’e oreanan di Jehova, el a manda su mensaheronan pa “mira si nan [a] actua nan tur huntu conforme cu e sclamacion tocante dje” i pa trece un solucion. (Génesis 18:20, 21) P’e alivio di esnan cu a keha cerca Jehova, el a rectificá e situacion despues dor di destruí e dos stadnan i nan habitantenan inmoral.

E Congregacion Cristian

Lo mester ta distinto entre rumannan den e congregacion cristian? Aunke cristiannan ta hende imperfecto, nan ta haci esfuerso sincero pa sirbi Dios den pas i unidad. Sin embargo, lo lanta situacionnan entre nan cu ta duna motibu pa un grado di keho i cu ta rekerí un solucion. Den e promé siglo, un situacion a lanta den e congregacion di esnan ungí djis despues di Pentecoste. Hopi cristian recien combertí a keda den Jerusalem pa haña mas instruccion i animacion. Nan tabata compartí e cuminda cu tabatin disponibel. Sin embargo, “un murmuracion a lanta di parti dje hudiunan di abla griego contra e hudiunan di abla hebreo, pasobra nan biudanan tabata ser pasá por haltu den e distribucion diario.” En bes di condená e kehadónan aki i yama nan causadónan di problema, e apostelnan a tuma accion pa rectificá e situacion. Sí, esnan den e congregacion cu tin cu supervisá asuntunan lo scucha humildemente na kehonan razonabel, hací cu e debido respet i actitud, i lo actua riba nan.—Echonan 6:1-6; 1 Pedro 5:3.

Keha Cerca e Autoridad Competente

Bo a ripará for dje ehempelnan ariba cu kehonan mester ser hací cu e debido actitud i na e autoridad competente? Por ehempel, lo no tin sentido pa keha cerca polis tocante un belasting muchu haltu of cerca un hues tocante bo enfermedadnan físico. Asina tambe, lo ta inapropiado pa keha tocante un situacion sea paden of pafó dje congregacion cerca un persona cu no tin ni e autoridad ni e abilidad pa yuda.

Den mayoria pais awe, tin tribunalnan i otro autoridadnan competente na cua bo por apelá cu speransa di logra un midí di alivio. Ora e alumno mencioná na principio dje artículo aki a hiba su keho na tribunal, e huesnan a dicta fayo na su fabor, i el a ser tumá bek cu un despensa for dje scol. Di igual manera, e empleada cu a ser intimidá sexualmente a haña alivio via un bond di muhernan cu ta traha. El a ricibí un despensa dje administracion di scol. Su doñonan di trabou a dal pasonan pa stop e intimidacion sexual.

Sin embargo, nos no mester spera cu tur keho lo tin e mésun resultado. Rey sabí Sálomon a comentá realísticamente: “Loke ta trocí no por ta hací regt.” (Eclesiástes 1:15) Nos ta haci bon di reconocé cu algun asuntu simplemente tin cu warda pa Dios rectificá nan na su mes debido tempu.

[Plachi na página 31]

Ancianonan ta scucha i actua riba kehonan razonabel