Planea di Antemano pa Nos Sernan Kerí

E HISTORIA tristu di Annie a sali recientemente den un korant africano. Annie su casá tabata comerciante. El a muri na 1995, lagando atras 15 vehículo, vários cuenta na banco, rond di 4.000 dollar na cen cash, un pacus, un bar i un cas cu tres kamber. Loke e no a laga atras tabata un testament.

Segun e informe Annie su sua a gara e propiedad i e placa i a saca Annie cu su seis yunan for di nan cas. Desampará, e i su yunan ta biba awor cerca su ruman homber. Cuater dje muchanan mester a kita for di scol, ya cu no tin placa pa paga scol ni uniform.

Annie a apelá na un corte superior, cu a dicta cu e mester haña bek algun propiedad, incluso un vehículo. Pero e no a haña nada bek. E tin cu bai corte atrobe pa busca un órden pa forsa su sua cumpli cu e decision dje corte superior.

Pakico Pensa Riba Morto?

E historia di Annie ta ilustrá loke por sosodé ora un cabes di famia keda sin planea p’e posibilidad cu e por cai muri. Ora di morto, tur hende ta “laga nan medio di mantencion pa otronan.” (Salmo 49:10) Ademas, e mortonan no tin control riba loke ta sosodé cu nan posesion. (Eclesiástes 9:5, 10) Pa un hende tin algu di bisa den loke ta sosodé cu su pertenencianan, e tin cu regla cosnan promé cu morto.

Maske nos tur sa cu nos por muri inesperadamente, hopi hende ta keda sin haci percuracion di antemano pa nan sernan kerí cu ta keda atras. Aunke nos consideracion lo enfocá riba cierto gruponan cultural na Africa, problemanan similar ta existí den otro partinan di mundu.

Si bo ta traha un testament of ta percurá pa otro areglo legal den caso di morto ta un asuntu personal. (Galationan 6:5) Sin embargo, lo bo por puntra: ‘Pakico un homber cu na bida ta stima i cuida su casá i yunan, tog no ta haci ningun percuracion pa nan bienestar den caso cu e muri?’ Un motibu principal ta cu mayoria di nos no ta gusta pensa riba e posibilidad cu nos por muri, ménos ainda planea pa morto. De facto, nos no por premirá e dia di nos morto, manera Bijbel ta bisa: “Boso no sa con boso bida lo ta mañan. Pasobra boso ta un neblina cu ta presentá pa poco tempu anto ta disparcé.”—Santiago 4:14.

Ta práctico pa planea p’e posibilidad cu bo por cai muri. Esei ta demostrá tambe interes amoroso pa esnan cu bo ta laga atras. Si nos no regla nos asuntunan, otronan lo haci esei. Kisas hende cu nunca nos a topa lo dicidí en cuanto nos pertenencianan i areglonan pa entiero. Bou di circunstancianan asina den algun pais, gobiernu ta dicidí ken lo haña nos placa i propiedad. Na otro partinan, famianan ta dicidí, i hopi bes e decisionnan aki ta bai compañá cu pleitu cu ta fomentá rencor den e famia. Ademas, loke otronan dicidí kisas ta leu for di loke nos lo a deseá.

Cohementu di Propiedad

E biuda ta esun cu ta sufri mas ora su casá muri. Ademas dje pena di a perde su casá, hopi bes e ta bira víctima di cogementu di propiedad. Esaki nos a describí mas promé den e caso di Annie. Parti dje motibu pakico hende ta coge propiedad tin di haber cu e manera cu nan ta mira e esposa. Den algun cultura nan no ta considerá e esposa como parti di famia dje homber. Den un sentido e ta un hende straño cu un ora pa otro por regresá na su famia of bolbe casa i drenta un otro famia. Na contraste, segun e razonamentu di algun cultura, un homber su rumannan i mayornan nunca lo bandon’é. Si e muri, su famia ta kere cu loke tabata di dje ta pertenecé na nan, no na su esposa i yunan.

Esposonan cu no ta confia nan asuntunan na nan esposa ta promové tal pensamentu. Mike a discutí su asuntunan di negoshi solamente cu su ruman hombernan. Nan tabata sa ki propiedad e tabatin, pero su esposa tabata sa masha tiki di su asuntunan financiero. Ora Mike a muri, su ruman hombernan a bini cerca dje i a exigí un placa cu su esposo tabata spera di un debedó. E esposa no tabata sa di esei mes. Despues, nan a coge e mashinnan di copia i di type cu su esposo a cumpra p’e. Cu tempu, su ruman hombernan a tuma e cas over i tur cos den dje. Nan a forsa e biuda aki i su yu muher chikitu bandoná nan cas, hibando solamente nan pañanan.

“Nan Dos Lo Bira un Solo Carni”

Esposonan cristian ta stima nan esposa i ta considerá nan digno di confiansa. Hombernan asina ta tuma na pechu e conseho bíblico: “Esposonan mester ta stimando nan esposa mescos cu nan mes curpa.” E hombernan aki ta bai di acuerdo tambe cu e declaracion inspirá pa Dios: “Un homber lo bandoná su tata i su mama i lo pega na su esposa, i nan dos lo bira un solo carni.”—Efesionan 5:28, 31.

Esposonan piadoso tambe ta di acuerdo cu apostel cristian Pablo, kende a skirbi: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia di cas, el a nenga e fe i ta pió cu un persona sin fe.” (1 Timoteo 5:8) Na armonia cu e principio aki, si un esposo cristian a planea un biahe largu, lo e haci sigur di soru pa su famia ta bon cuidá miéntras e ta afó. Di igual manera, no ta razonabel cu e ta haci percuracion pa su esposa i yunan den caso cu e muri? No ta solamente práctico, sino tambe amoroso pa prepará pa un tragedia inesperá.

Custumbernan di Entiero

Esposonan cristian tin cu considerá un otro aspecto dje asuntu aki. Ademas dje pena dje biuda pa a perde su casá, posesionnan i posiblemente asta su yunan, den algun sociedad nan ta fors’é cumpli cu ritonan tradicional di luto. E korant The Guardian di Nigeria ta lamentá cu den algun área, tradicion ta rekerí pa un biuda drumi den e mésun kamber scur cu e cadaver di su esposo. Na otro lugánan, no ta permití biudanan bandoná nan cas pa un periodo di luto di casi seis luna. Durante e tempu ei, nan no mag baña, i ta asta prohibí pa nan laba man promé of despues di come.

Custumbernan asina ta causa problema, foral pa biudanan cristian. Nan deseo pa agradá Dios ta impulsá nan pa evitá custumbernan cu no ta na armonia cu siñansanan di Bijbel. (2 Corintionan 6:14, 17) Sin embargo, un biuda por ser persiguí si e no cumpli cu e custumbernan aki. E lo asta tin cu hui pa su bida.

Tuma Medidanan Legal

Sabiamente Bijbel ta bisa: “E plannan di esun diligente sigur ta resultá den bentaha.” (Proverbionan 21:5) Ki plannan un cabes di famia por haci? Den mayoria sociedad ta posibel pa traha un testament of prepará un documento cu ta declará con mester parti un persona su propiedad den caso di su morto. E documento por incluí detayenan tocante areglonan pa entiero. Tambe e por specificá kico un casá tin cu haci (of no tin cu haci) en coneccion cu custumbernan di entiero i luto.

Un señora cu yama Leah a perde su casá na 1992. E ta bisa: “Mi tin cincu yu—cuater mucha muher i un mucha homber. Mi casá tabata malu pa un tempu promé cu el a muri. Pero asta promé cu el a bira malu, el a skirbi un testament bisando cu e kier pa ami i nos yunan haña tur su posesionnan. Esaki a incluí cen di seguro, un cunucu, bestia di cunucu i un cas. El a firma e testament i a duná mi e. . . . Despues cu mi esposo a muri, e famianan tabata kier un parti di su herencia. Mi a mustra nan cu mi casá a cumpra e cunucu cu su mes placa i cu nan no tabatin derecho di exigí nada. Ora nan a mira e testament skirbí, nan a aceptá esei.”

Papia cu e Famia

Problemanan por presentá si un persona no papia cu su famia tocante su creencia i deseonan. Considerá e caso di un homber kende su famianan a insistí pa su entiero tuma lugá den e pueblito segun e custumbernan local. Ora nan a menasá di mata su biuda i yunan, esakinan tabata obligá di laga su famia cu e curpa. E biuda ta lamentá: “Si mi esposo a bisa sikiera un di su tio of primunan con e tabata kier pa der’é, e famia lo no a insistí riba nan prácticanan tradicional di entiero.”

Den algun sociedad un areglo palabrá ta mes obligatorio cu un documento skirbí. Esaki ta e caso na partinan di Swazilandia, caminda hopi hende tin creencianan cu ta stimulá entiero i proceduranan di luto tradicional. Sabiendo esaki, un homber cristian cu yama Isaac a tene un reunion cu su famianan, cu no tabata Testigo di Jehova, i a bisa nan kico e tabata kier pa sosodé despues di su morto. El a bisa precis cua posesionnan material mester a bai pa ken, i el a splica bon cla con mester a tene su entiero. Despues cu el a muri, cosnan a bai manera el a deseá. Isaac a ricibí un entiero cristian, i su biuda a keda bon cuidá.

Protehá Bo Famia

Loke lo bo haci pa protehá bo famia den caso cu bo muri, ta un asuntu personal, pero un cristian cu yama Edward ta bisa: “Mi tin un pólisa di seguro di bida pa beneficiá e ocho miembronan di mi famia. Mi esposa tambe tin acceso na mi cuenta di banco. Pues si mi muri, e por saca cen for dje cuenta. . . . Mi tin un testament cu lo beneficiá mi famia. Si mi muri, kico cu mi laga atras lo ta pa mi casá i yunan. Mi a traha mi testament cincu aña pasá. Un abogado a prepar’é, mi casá i mi yu homber tin un copia. Den mi testament, mi a specificá cu miembronan di famia fuera di mi casá i yunan no mag di ta enbolbí den decisionnan tocante mi entiero. Mi ta pertenecé n’e organisacion di Jehova. Pues asta si ta un of dos Testigo so tin presente pa dirigí mi entiero, esei lo ta suficiente. Mi a discutí esaki cu mi miembronan di famia fuera di mi casá i yunan.”

Den un sentido, regla asuntunan asina ta un regalo pa bo famia. Naturalmente, planea p’e posibilidad cu bo por cai muri no ta un regalo di chuculati of un buket di flor. Sin embargo, e ta demostrá bo amor. E ta duna prueba cu bo kier ‘percurá pa esnan cu ta miembro di bo famia di cas’ asta ora bo no ta huntu cu nan mas.

[Kuadro/Plachi na página 21]

Jesus A Haci Percuracion pa Su Mama

“Sin embargo, cerca e staca di tormento di Jesus tabata pará su mama i e ruman muher di su mama; Maria esposa di Clopas, i Maria Magdalena. Anto Jesus, ora el a mira su mama i e disipel cu el a stima pará cerca, el a bisa su mama: ‘Muher, mira! Bo yu!’ Despues, el a bisa e disipel: ‘Mira! Bo mama!’ I dje ora ei padilanti e disipel [Juan] a tum’é den su mes cas.”—Juan 19:25-27.

[Plachi na página 22]

Prudentemente hopi cristian ta dal pasonan legal pa protehá nan famia