Informe di Proclamadonan di Reino

Dios Ta Hacié Crece na Alaska

BOU di un capa di sneu i ijs, un simia chikitu ta warda riba e oportunidad pa desaroyá na madures. Den e tres lunanan corticu cu ta forma e zomer di Alaska, un simia di kolo cu un diameter di 3 milimeter por crece yega te casi 40 kilo! Sí, e pais aki cu un tempu hopi hende a kere ta un tera bashí tapá cu ijs, por producí fruta abundante.

Esaki ta specialmente e caso cu e campo spiritual na Alaska. Aya, den e pais di winternan largu, Testigonan di Jehova ta sigui sembra simia di Reino. Mescos cu den otro partinan dje tera, Dios ta haci e simia crece den curasonnan fértil.—1 Corintionan 3:6, 7.

● Un biaha ora un Testigo hóben cu yama Vanessa tabata den bus di scol, el a observá un colega alumna, Ann, cu semper sa sinta su so. Ann a parce tristu, p’esei Vanessa a invitá Ann pa sinta banda di dje. Nada straño cu Ann tabata tristu! Su mama a muri di un atake di curason, i poco tempu despues, su tata a muri di cancer. P’esei Ann tabata biba cerca famianan na Alaska.

Ora Vanessa tabata den sirbishi di veld un diasabra, el a para na cas di su conocí nobo i a laga e foyeto Dios Realmente Ta Interesá den Nos? cerca dje. E siguiente dialuna na scol, Ann a busca e Testigo hóben. Ann tabatin hopi pregunta tocante Bijbel cu Vanessa por a contestá. “Unda boso tin boso misa?” el a puntra. E anochi ei Ann a asistí na su promé reunion na Salon di Reino.

No a dura mashá p’e huérfano aki di 17 aña haña hopi ‘tata’ cu ‘mama,’ net manera Jesus a primintí. (Mateo 19:29) I tabata ki un ocasion gososo pa mira un Ann contentu i cu un sonrisa simbolisá su dedicacion na Jehova mediante bautismo bou di awa n’e Congreso di Distrito “Mensaheronan di Pas Divino”!

● Den e áreanan remoto dje inmenso region ártico di Alaska—caminda desiertonan ta separá pueblonan cientos di kilometer for di otro, rumannan a usa e avioneta di dos motor di Sociedad Watch Tower pa sembra simia di Reino den mas cu 150 comunidad. Pero crecementu spiritual mediante un studio regular di Bijbel ta dependé riba corespondencia. Ya cu skirbimentu di carta ta un desafio pa hopi hende, un maestro di Bijbel tin cu ser creativo pa por mantené e interes dje studiante bibu. Con e por logra esaki?

Kathy tabata conducí un studio di Bijbel progresivo cu Edna, aunke nan tabata biba mas cu 600 kilometer for di otro! En bes di djis copia e preguntanan for dje material di studio, Kathy tabata pone e preguntanan riba un papel apart i a laga espacio pa Edna yena e contestanan. Despues cu Edna a yena e contestanan, Kathy tabata contestá i agregá comentarionan ora tabata necesario pa clarificá un punto. Kathy ta declará: “Mi tabata apartá diarason anochi pa nos ‘studio,’ i mi a purba tené mi na dje mescos cu lo mi a haci cu cualkier otro areglo pa studio di Bijbel. Tambe mi tabata manda un envelop cu adres i stampia caba pa Edna. Siendo cu post tabata tuma dos siman pa yega, un studio via corespondencia a parce un tiki slow.”

Imaginá bo e emocion ora Kathy i Edna a topa cara-cara n’e congreso di distrito na Anchorage despues di a studia dies luna via post! Tambe e Testigonan tabata contentu di por tabatin den nan auditorio studiantenan di Bijbel i otro personanan interesá for di vários pueblo isolá na Alaska.

Aunke crecementu tin biaha por parce slow, algun “simia chikitu” ta spruit rápidamente ora exponé nan n’e lus dje berdad. Como promedio, tur aña mas cu shen alabadó nobo di Jehova ta ser bautisá na Alaska! Nos ta bisa, “Danki, Jehova,” pa hacié crece!