Mi Bida Como Leproso—Gososo i Spiritualmente Bendicioná

MANERA ISAIAH ADAGBONA A RELAT’E

Mi a lanta na Akure, Nigeria. Mi famia tabata planta yams, bacoba, casabe i cacao. Mi tata no tabata kier pa mi bai scol. E di cu mi: “Cunukero bo ta. Niun hende lo pidí bo un dia pa lesa yams.”

TOG, mi tabata kier a siña lesa. Anochi, mi tabata para scucha na bentana di un cas caminda algun mucha tabata ricibí les di un maestro privá. Esei tabata na 1940 ora mi tabatin mas o ménos 12 aña di edad. Ora e tata dje muchanan mirá mi, e tabata gritá mi i core cu mi. Pero mi tabata sigui bai bek. Tin biaha e maestro no a bini, i mi tabata sluip drenta i wak den e bukinan dje muchanan huntu cu nan. Algun biaha nan tabata lagá mi fia nan bukinan. Asina mi a siña lesa.

Mi Ta Djoin e Pueblo di Dios

Cu tempu mi a haña un Bijbel i mi tabata les’é regularmente promé cu mi bai drumi. Un anochi mi a lesa Mateo capítulo 10, cu ta mustra cu hende lo odia i persiguí Jesus su disipelnan.

Mi a corda cu Testigonan di Jehova tabata bini mi cas i cu nan a ser tratá masha malu. Esei a duná mi un idea cu esaki kisas ta e pueblo cu Jesus a papia di dje. E siguiente bes cu e Testigonan a bishitá nos cas, mi a haña un revista for di nan. Ora mi a cuminsá asociá cu nan, mi a bira e blanco di bofon. Sin embargo, mas hende a purba desanimá mi, mas convencí i gososo mi a bira cu mi a haña e religion berdadero.

Loke realmente a impresioná mi tocante e Testigonan tabata cu, distinto di otro gruponan religioso den mi área, nan no a mescla nan adoracion cu e custumber i tradicionnan dje religion local pagano. Por ehempel, aunke mi famia tabata bai misa anglicano, mi tata tabatin un santuario p’e dios yoruba Ogun.

Despues cu mi tata a muri, ta ami lo mester a heredá e santuario. Mi no tabata kier e, ya cu mi tabata sa cu Bijbel ta condená idolatria. Cu yudansa di Jehova mi a progresá spiritualmente, i na december 1954, mi a bautisá.

Mi Ta Haña Lepra

Anteriormente e aña ei, mi a ripará cu mi pianan tabata hincha i cu mi a perde heful den nan. Ora mi para riba carbon cayente, mi no tabata sinti dolor. Despues di un tempu, mi a haña yaga corá na mi frenta i lipnan. Ni ami ni mi famia tabata sa ta ki malesa mi tabatin; nos a pensa cu tabata ecsema. Mi a bishitá 12 dokter di yerba buscando cura. Finalmente un di nan a bisa nos cu tabata lepra.

Ki un shok esei tabata! Mi a keda masha preocupá i no tabata drumi bon. Mi tabata haña pesadia. Pero mi conocimentu di e berdad di Bijbel i dependencia riba Jehova a yudá mi mira futuro cu confiansa.

Hende a bisa mi mama cu si mi bai cerca un medium spiritista pa ofrecé sacrificio, lo mi cura. Mi a nenga di bai, sabiendo cu un acto asina lo a desagradá Jehova. Sabiendo cu mi tabata determiná pa no bai, mi mama su amiganan a sugirié p’e coge un nechi di kola i mishi cu mi frenta cuné. Despues e por a presentá e nechi di kola n’e medium spiritista pa usa den sacrificionan na mi fabor. Mi no tabata kier tin nada di haci cu esei i mi a bisa mi mama esei. Finalmente el a legumai di purba enbolbé mi den religion pagano.

Pa ora cu mi a bai hospital, ya e lepra tabata den un estado avansá. Mi a haña yaga rond mi curpa. Na hospital nan a duná mi remedi, i gradualmente mi cueru a bira bon atrobe.

Nan A Kere cu Mi A Muri

Pero mi problemanan tabata leu di terminá. Mi pia drechi a haña un infeccion serio, i na 1962 mester a amput’é. Despues dje operacion, mi a haña complicacionnan médico. E dokternan no a verwagt cu lo mi keda na bida. Un pastor misionero blancu a bin duná mi e santoli. Mi tabata muchu débil pa papia, pero un verpleegster a bis’é cu mi ta un Testigo di Jehova.

E pastor di cu mi: “Bo kier cambia i bira católico pa bo por bai shelu?” Esei a poné mi hari den mi mes. Den oracion mi a pidi Jehova forsa pa contestá. Cu hopi esfuerso mi a logra bisa: “No!” E pastor a bira lomba cana bai.

Mi condicion a empeorá te cu e personal di hospital a kere cu mi a muri. Nan a cubri mi cara cu un laken. Pero nan no a hibá mi n’e mortuorio ya cu un dokter of un verpleegster tabatin cu constatá cu mi tabata morto promé. No tabatin ningun dokter na warda, i tur e verpleegsternan a bai un fiesta. P’esei nan a lagá mi pasa anochi riba e afdeling. Ora e dokter a bishitá e pashentnan e siguiente mainta, ningun hende a bini na mi cama pasobra ainda mi tabata tapá i supuestamente morto. Finalmente, un hende a ripará cu e “cadaver” bou dje laken tabata move!

Bon, mi a recuperá, i na december 1963 nan a hibá mi n’e Comunidad Médico pa Leprosonan di Abeokuta den zuidwest di Nigeria. For dje tempu ei mi ta biba einan.

Oposicion Contra Mi Predicacion

Ora mi a yega, tabatin rond di 400 leproso den e comunidad, i ami tabata e único Testigo. Mi a skirbi Sociedad, i nan a respondé mesora dor di manda Congregacion Akomoje bishitá mi. Di manera cu nunca mi a perde contacto cu e rumannan.

Manera cu mi a yega n’e comunidad, mi a cuminsá predicá. E pastor local no tabata contentu cu esei, i el a raportá mi n’e director social cu tabata encargá cu e campamentu. E director social tabata un homber di edad cu a bini for di Alemania. El a bisá mi cu mi no tabatin derecho di siña hende Bijbel pasobra mi no tabatin un educacion ni un certificado pa haci esei; siendo cu mi no tabata cualificá, lo mi por a siña e hendenan cosnan incorecto. Si mi a persistí, lo mi por a ser sacá for dje comunidad i nengá tratamentu médico. E no a lagá mi contestá ni un pia di palabra.

Siguientemente el a emití un ordu cu ningun hende mag studia Bijbel cu mi. Como resultado, esnan cu a mustra interes a stop di bini cerca mi.

Mi a presentá e asuntu na Jehova den oracion, pidiend’e sabiduria i direccion. E siguiente diadomingo, mi a bai e misa bautista n’e comunidad, aunke mi no a participá den e servicionan religioso. Tabatin un espacio di tempu durante misa cu esnan presente por a haci pregunta. Mi a hisa man i puntra: “Si tur bon hende ta bai shelu i tur mal hende ta bai un otro lugá, pakico Isaías 45:18 ta bisa cu Dios a traha e tera p’e ser habitá?”

Hopi hende den e congregacion a cuminsá murmurá. Finalmente, e pastor misionero a bisa cu nos no por caba di comprendé e camindanan di Dios. Cu esei, mi a contestá mi mes pregunta dor di lesa textonan cu ta mustra cu 144.000 hende lo bai shelu, cu e malbadonan lo perecé, i cu hende hustu lo biba pa semper riba tera.—Salmo 37:10, 11; Revelacion 14:1, 4.

Tur hende a bati man como aprecio p’e contesta. E ora ei e pastor a bisa: “Bati man un biaha mas pasobra e homber aki sí conocé Bijbel.” Despues dje misa, algun persona a bini cerca mi i a bisá mi: “Bo sa mas cu e pastor!”

Presion pa Sacá Mi Ta Sigui

Esei a kibra e persecucion, i e hendenan a cuminsá djoin mi atrobe pa studia Bijbel. Sin embargo, ainda tabatin opositor cu a pone presion riba e director social pa core cu mi. Mas o ménos un luna despues dje misa, el a yamá mi i bisá mi: “Pakico bo ta sigui predicá? Na mi pais, hende no ta gusta Testigo di Jehova, i aki ta mescos. Pakico bo ta causá mi problema? Bo no sa cu mi por sacá bo?”

Mi a contestá: “Pai, mi ta respetá bo pa tres motibu. Di promé, pasobra bo ta mas grandi cu mi, i Bijbel ta bisa cu nos mester mustra respet pa cabei blancu. E di dos motibu pakico mi ta respetá bo ta cu bo a bandoná bo pais pa yuda nos aki. E di tres motibu ta cu bo ta bondadoso, generoso i ta asistí esnan afligí. Pero cu ki derecho bo ta kere cu bo por sacá mi? E presidente dje pais no ta saca Testigonan di Jehova. E gobernante tradicional dje region aki no ta saca nos. Asta si bo core cu mi for dje campamentu aki, Jehova lo sigui percurá pa mi.”

Nunca promé mi a papia den un manera asina franco cuné, i mi por a mira cu esei a impresion’é. El a cana bai sin bisa un palabra. Mas despues, ora un hende a kehá mi, frustrá el a contestá: “Ami no ta bai meté mi cu e problema aki mas. Si bo tin un problema cu su predicacion, papia esei cuné!”

E Curso di Alfabetisacion

Esnan cu tabata bai e misa bautista n’e campamentu a sigui oponé mi predicacion. Anto mi a haña un idea. Mi a bai cerca e director social i a puntr’é si mi por a cuminsá cu un curso di alfabetisacion. Ora el a puntrá mi cuantu mi kier a cobra, mi a bis’é cu lo mi duna les pornada.

Nan a percurá un local, borchi i krijt, di manera cu mi a cuminsá siña algun di esnan interná lesa. Nos tabatin les tur dia. P’e promé 30 minuutnan, mi tabata siña nan lesa, despues mi tabata conta i splica un relato for di Bijbel. Despues di esei, nos tabata lesa e relato for di Bijbel.

Un studiante tabata un señora yamá Nimota. E tabatin un interes profundo den cosnan spiritual i tabata haci preguntanan religioso na tantu e misa como n’e moské. E no tabata haña contesta riba su preguntanan einan, p’esei e tabata bin puntrá mi. Cu tempu, el a dedicá su bida na Jehova i a bautisá. Na 1966 nos a casa.

Mayoria hende den nos congregacion awe a siña lesa i skirbi den e curso di alfabetisacion ei. Mi no tabatin e sabiduria pa sugerí e curso ei. Sigur Jehova su bendicion tabata evidente. Despues di esei ningun hende a purba stop mi di predicá.

Un Salon di Reino den e Campamentu

P’e tempu cu ami cu Nimota a casa, nos tabata cuater cu tabata reuní regularmente pa studia E Toren di Vigilancia huntu. Pa rond di un aña, nos tabata reuní den e sala caminda nan tabata laba herida di lepra. Anto e director social, cu pa awor aki a bira mi amigu, a bisá mi: “No ta bon pa bo adorá bo Dios den un sala di tratamentu.”

El a bisá mi cu nos por a reuní den un ket bashí dje carpinté. Cu tempu, a transformá e ket ei den un Salon di Reino. Na 1992, cu yudansa dje rumannan den e pueblo, nos a complet’é. Manera bo por mira riba e potret na página 24, nos salon ta un edificio sólido—di pleister i di verf, cu un flur di cement i un bon dak.

Predicacion na Leprosonan

Pa 33 aña caba mi teritorio ta e comunidad di leproso. Con asina predicacion na hende leproso ta bai? Aki na Africa mayoria hende ta kere cu tur cos ta bini di Dios. P’esei ora nan ta sufri di lepra, nan ta kere cu di un manera of otro Dios ta responsabel pa esei. Algun ta profundamente deprimí tocante nan condicion. Otronan ta rabiá i ta bisa: “No papia cu nos tocante un Dios cu ta amoroso i misericordioso. Si esei tabata e caso, e enfermedad aki lo a disparcé!” E ora ei nos ta lesa i razoná riba Santiago 1:13, cu ta bisa: ‘Cu cos malu Dios no ta pone ningun hende na prueba.’ Despues nos ta splica pakico Dios ta permití hende sufri di malesa, i nos ta señalá na su promesa di un tera paradísico caminda ningun hende lo ta malu.—Isaías 33:24.

Hopi a respondé faborablemente n’e bon nobo. For di tempu cu mi a bini e campamentu aki, Jehova a usá mi pa yuda mas cu 30 persona yega na dedicacion i bautismo, tur tabata leproso. Hopi a regresá nan cas despues cu nan a cura, i algun a muri. Awor aki nos tin 18 publicadó di Reino, i rond di 25 hende ta asistí regularmente n’e reunionnan. Dos di nos ta sirbi como anciano, i nos tin un sirbidó ministerial i un pionero regular. Ki contentu mi ta pa mira asina tantu hende awor sirbi Jehova fielmente den e campamentu aki! Tempu mi a bini aki, mi tabatin miedu cu lo mi tabata mi so, pero Jehova a bendicioná mi den un manera maraviyoso.

E Goso di Sirbi Mi Rumannan

Mi a tuma remedi contra lepra for di 1960 te cu mas o ménos cincu aña pasá. Awor mi ta completamente curá, mescos cu e otronan den e congregacion. E lepra a laga su marcanan—mi a perde parti abou di mi pia, i mi no por stret mi mannan—pero e malesa a bai.

Siendo cu mi a cura, algun hende a puntrá mi pakico mi no ta bandoná e campamentu i bai cas bek. Tin vários motibu pakico mi ta keda, pero esun principal ta cu mi kier sigui yuda mi rumannan aki. E goso di cuida Jehova su carnénan ta surpasá cualkier cos cu famia lo por duná mi si mi bolbe bek cerca nan.

Mi ta masha gradicidu cu mi a conocé Jehova promé cu mi a haña sa cu mi tabatin lepra. Di otro manera, lo mi por a mata mi curpa. Atrabes di añanan, mi a pasa den hopi dificultad i problema, pero no ta e remedinan tabata sostené mi—tabata Jehova. Ora mi meditá riba pasado, mi ta sintí mi gososo; i ora mi pensa riba futuro bou dje Reino di Dios, mi ta sintí mi asta mas gososo.

[Kuadro na página 25]

Datonan Tocante Lepra

Kico E Ta?

E lepra djawendia ta un malesa cu ta ser causá pa un bacteria cu Armauer Hansen a identificá na 1873. Como reconocimentu di su trabou, dokternan ta yama lepra tambe malesa di Hansen.

E bacteria ta daña nervio, wesu, wowo i cierto órganonan. Hopi biaha esun cu tiné ta perde heful den man i pia. Si no detectá e malesa, e por desfigurá cara, man cu pia. Rara bes e ta causa morto.

Tin un Cura?

Hende cu tin formanan ménos grave di lepra ta bira bon sin ningun tratamentu. Por cura casonan mas serio cu remedi.

E promé remedi contra lepra, introducí den añanan ’50, tabata traha slow i a bira mas i mas ineficas pa motibu cu e bacteria di lepra a desaroyá resistencia contra dje. Remedinan nobo a ser desaroyá, i for di cuminsamentu di añanan ’80, un terapia den cua ta usa vários remedi, yamá Multi-Drug Therapy (MDT), a bira e tratamentu comun rond mundu. E tratamentu aki ta combiná e uso di tres remedi: Dapsone, Rifampicin i Clofazimine. Aunke MDT ta mata e bacteria, e no ta drecha e daño hací caba.

MDT ta sumamente eficas den cura e malesa. Consecuentemente, e cantidad di hende cu tin lepra a baha rápidamente for di 12 miyon na 1985 te na rond di 1,3 miyon na mitar di 1996.

Con Contagioso E Ta?

Lepra no ta dje contagioso ei; mayoria hende tin sistemanan inmuno suficiente fuerte pa bringu’é. Esnan cu sí ta ser contagiá cuné, a hañ’é dor cu nan a biba pa un tempu largu den contacto estrecho cu esnan cu ta contagiá.

Dokternan no sa sigur con e bacteria ta drenta e curpa humano, pero nan ta sospechá cu esei ta sosodé via cueru of nanishi.

Futuro Prospectonan

E meta ta pa ‘eliminá lepra como problema di salú público’ pa aña 2000. Esaki ta nificá cu e cantidad di caso di lepra den cualkier comunidad lo no pasa 1 pa cada 10.000 hende. Bou dje Reino di Dios lo e ser eliminá completamente.—Isaías 33:24.

Fuentenan: Organisacion Mundial di Salú; Federacion Internacional di Asociacionnan Anti-Lepra; i Manson’s Tropical Diseases, edicion di 1996.

[Kuadro na página 27]

E Lepra Djawe Ta Mescos Cu Esun den Tempu di Bijbel?

Bukinan médico awe ta definí lepra den términonan exacto; e nomber científico pa e microbio enbolbí ta Mycobacterium leprae. Naturalmente Bijbel no ta un buki médico. E palabranan hebreo i griego cu ta ser traducí como “lepra” den hopi traduccion di Bijbel tin un nificacion muchu mas amplio. Por ehempel, e lepra di Bijbel a producí síntomanan bisto no solamente den hende, sino tambe den paña i casnan, algu cu un bacteria no ta haci.—Levítico 13:2, 47; 14:34.

Ademas, e síntomanan den hende cu ta identificá lepra awe no ta cuadra exactamente cu e descripcion di lepra den tempu di Bijbel. Algun hende ta bisa cu e splicacion por ta sinta den e echo cu caracter di malesa ta cambia cu pasamentu di tempu. Otronan ta kere cu e lepra na cua Bijbel ta referí ta describí un variedad di malesa, cu kisas ta of kisas no ta incluí e malesa cu M. leprae ta causa.

E Theological Dictionary of the New Testament ta declará cu tantu e palabra griego como esun hebreo generalmente traducí como lepra “ta referí n’e mésun enfermedad, of grupo di enfermedad . . . Ta keda e pregunta si e malesa aki ta loke nos awor ta yama lepra. Pero e identificacion médico exacto dje malesa no ta afectá e balor cu nos ta duna n’e relatonan di curacion [di lepra cu Jesus i su disipelnan a efectuá].”

[Plachi na página 24]

E congregacion pafó dje Salon di Reino den e campamentu di leproso

[Plachi na página 26]

Isaiah Adagbona i su esposa, Nimota