Un Ocasion Gososo—Graduacion dje di 104 Klas di Galad

“AWE ta un dia gososo, i nos tur ta contentu.” Cu e palabranan ei Carey Barber, miembro dje Cuerpo Gobernante di Testigonan di Jehova, a habri e ocasion festivo di graduacion dje di 104 klas dje Scol Bíblico di Galad di Watchtower dia 14 di mart 1998. E auditorio di 4.945 persona a ser invitá pa cuminsá e ocasion cantando cantica di Reino number 208, titulá “Un Cantica di Alegria.”

Conseho Práctico pa Keda Gososo

E parti di apertura dje programa, un seri di cincu discurso corticu basá riba Bijbel, a duna algun conseho práctico riba con pa mantené e spiritu gososo cu a dominá e dia di graduacion.

Joseph Eames dje Departamento di Redaccion, a duna e promé discurso. El a papia riba e tema “Imitá e Spiritu di Esnan Leal,” basá riba e relato bíblico di 2 Samuel capítulo 15 i 17, unda Absalom, yu di David, a conspirá pa kita e reino cu Dios a duna su tata dor di instigá un rebelion. Sin embargo, tabatin esnan cu a keda leal na David, e rey ungí di Jehova. Ki les e misioneronan nobo por siña for di esaki? “Unda cu bo bai den bo asignacion di misionero, promové lealmente e spiritu di cooperacion i respet pa autoridad teocrático. Yuda otronan haci mescos,” Ruman Eames a concluí.

Despues a sigui David Sinclair riba e programa, kende a describí dies rekisito, mencioná na Salmo 15, pa ser huésped den ‘e tent di Jehova.’ Su discurso, titulá “Keda Como Huésped den Bo Tent di Misionero,” a animá e studiantenan cu ta gradua pa aplicá e salmo aki na nan asignacion di misionero, caminda nan lo ta huésped. Ruman Sinclair a resaltá e importancia di biba tur ora segun e normanan di Dios. E resultado? Salmo 15:5 ta declará: “Esun cu ta haci e cosnan aki nunca nan lo pon’é tambaleá.”

John Barr, miembro dje Cuerpo Gobernante, a sigui i a hala atencion n’e efecto fortalecedor cu cantamentu na reunionnan cristian tin. Pero cua ta e cantica mas gososo cu ta ser cantá rond mundu awe? Esei ta e bon nobo dje Reino Mesiánico di Dios. Kico tur e cantamentu, of predicacion tocante e Reino aki ta hibando na dje? E di dos cuplet di cantica number 208 ta bis’é brevemente: “Dor di yudansa i bon siñansa, hopi ta bira n’e Creador. Nan melodia di alegria ta resoná tur caminda awor!” Sí, tur dia mas o ménos mil disipel nobo ta bautisá. Ruman Barr a concluí: “No ta maraviyoso pa pensa, rumannan, cu boso ta ser mandá na teritorionan pa topa e clase di hende cu lo ta wardando hustamente pa tende boso cantica di alabansa?”

“Scucha na Bos di Experencia” tabata e título dje discurso cu James Mantz dje Departamento di Redaccion a duna siguientemente. El a mustra cu tin cos cu hende por siña solamente di experencia personal. (Hebreonan 5:8) No obstante, Proverbionan 22:17 ta animá nos pa ‘incliná nos oido i tende e palabranan di esnan sabí,’ of esnan cu a gana experencia. E studiantenan cu ta gradua por siña hopi for di esnan cu a bai promé cu nan. “Nan sa con pa negoshá cu doñonan di establecimentunan local. Nan sa ki áreanan dje stad pa evitá debí na peligernan físico of moral. Nan sa kico ta ofendé e hendenan local lihé. E misioneronan di hopi tempu sa kico bo mester pa bo por tin goso i éxito den bo asignacion,” Ruman Mantz a bisa.

Papiando riba e tema “Apreciá Bo Asignacion Teocrático,” Wallace Liverance, secretario dje Scol di Galad, a splica cu miéntras algun misionero, manera apostel Pablo, Timoteo i Barnabas, a ricibí nan asignacion for di Dios mediante spiritu santu of un manifestacion milagroso, misioneronan entrená na Galad ta ser asigná na un lugá den e campo mundial dor di “e esclabo fiel i discreto.” (Mateo 24:45-47) El a compará asignacion dje misioneronan cu e lugánan na cua Gídeon a asigná su hombernan cu mester a bringa contra e madianitanan. (Huesnan 7:16-21) “Apreciá bo asignacion teocrático di misionero. Mescos cu e soldánan di Gídeon ‘a keda para cada un den su lugá,’ mira bo asignacion como bo lugá. Tene fe cu Jehova por usá bo mescos cu el a usa e treshen hombernan di Gídeon,” Ruman Liverance a insta.

Interes den Hende Ta Resultá den Goso

E Toren di Vigilancia a comentá un biaha: “En bes di edificá nos interesnan i nos bida rond dje artefacto i aparatonan sofisticá cu e mundu aki ta producí, cosnan cu no tin garantia cu nan lo sigui existí, ta cuantu mas mihó i sabí pa haci hende nos interes real i siña haña goso genuino den haci cos pa otronan.” Na armonia cu esei, Ruman Mark Noumair, un dje instructornan dje Scol di Galad, a considerá cu un grupo di studiante nan experencianan den sirbishi di veld i a comentá: “Mustrando interes personal den otronan ta loke lo haci boso bon misionero.”

Clavenan pa Goso den e Campo Stranhero

Kico ta algun clave pa éxito i goso den e trabou di misionero? Ruman Charles Woody dje Departamento di Sirbishi i Harold Jackson, ex-misionero na Latino América i un asistente dje Comité di Siñansa, a entrevistá miembronan di diferente Comité di Sucursal cu tabata asistiendo n’e di nuebe klas dje scol pa personal di sucursal. Ata aki un ehempel dje conseho cu esakinan tabatin di ofrecé:

Albert Musonda di Zambia a remarcá: “Ora e misionero tuma iniciativa pa acercá i saludá e rumannan, esei ta fomentá un hopi bon spiritu pasobra e rumannan lo cera mas cu e misionero, i e misionero lo cera mas cu nan.”

Rolando Morales di Guatemala a sugerí cu ora hende amigabel ofrecé misioneronan nobo algu di bebe, nan por contestá cu amabilidad i cu tacto: “Mi ta nobo den e pais aki. Lo mi kier tum’é, pero mi curpa no tin e defensa natural cu bo curpa tin. Mi ta spera cu un dia mi por acept’é, i lo mi ta contentu pa haci esei.” Kico ta e beneficionan dje tipo di contesta aki? “Hende lo no sinti nan ofendí, i e misioneronan lo ta amabel cu otronan.”

Kico por yuda misioneronan wanta den nan asignacion? Ruman Paul Crudass, graduado dje di 79 klas di Galad, kende ta sirbiendo na Liberia p’e último 12 añanan, a haci e observacion aki: “Mi sa cu ta berdad cu mayornan ta sinti falta di nan yunan. Pero tin biaha e misionero ta purba custumbrá cu e pais, e ambiente, e cultura i e pueblo. E por haña gana di bai cas bek. Si e haña un carta for di cas cu ta bisa, ‘Nos ta sinti hopi falta di bo; nos no sa kico nos lo haci sin bo,’ esei kisas ta tur loke e mester pa paketá su cosnan i bai cas. Ta masha importante p’e parientenan cu ta aki awe corda esei.”

Despues dje entrevistanan, Theodore Jaracz, miembro dje Cuerpo Gobernante, a duna e discurso final dje programa. Su tema tabata: “Mantené e Reino na Promé Lugá den Bo Bida.” Con e misioneronan por mantené nan bista fihá i no ser distraí for di nan trabou? El a animá nan pa nan tin un programa di studio personal di Bijbel, cu lo yuda nan tene interesnan di Reino na promé lugá den bida. Tambe tabatin e recordatorio oportuno aki: “Algun misionero a neglishá studio personal pa motibu cu nan a haña nan demasiado ocupá cu aparatonan electrónico sofisticá, E-mail i computer. Nos mester tin e sano huicio pa keda balansá den e uso di cualkier herment i no dedicá demasiado tempu na algu cu lo por kita tempu for di nos studio personal dje Palabra di Dios.”

Despues dje discurso di Ruman Jaracz a bini e presentacion dje diplomanan i lesamentu di un carta di aprecio di parti dje klas. E representante dje klas a expresá e sintimentunan di nan tur asina aki: “Nos a mira evidencia palpabel dje amor cu Jesus a bisa lo caracterisá su disipelnan, i esaki a sigurá nos cu sin importá unda nos ta, tin un organisacion caluroso i amoroso, manera un mama, ta apoyá nos. Cu un respaldo asina, nos ta cla pa bai n’e partinan mas leu dje tera.” Esei tabata un conclusion conmovedor di un dia gososo di graduacion p’e di 104 klas di Galad.

[Kuadro na página 24]

Estadísticanan dje Klas

Cantidad di pais representá: 9

Cantidad di pais na cua nan a ser asigná: 16

Cantidad di alumno: 48

Cantidad di pareha casá: 24

Edad promedio: 33

Promedio di aña den e berdad: 16

Promedio di aña den e ministerio di tempu completo: 12

[Plachi na página 25]

E di 104 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan di robes pa drechi den cada rij.

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Plachi na página 26]

Algun ruman cu tabata instructor dje di 104 klas: (di robes) W. Liverance, U. Glass, K. Adams, M. Noumair