Con Angel Por Yuda Bo

E PALABRA di Dios ta confirmá existencia di angel. E ta bisa nos cu tin miyones i miyones dje criaturanan spiritual aki. Jehova Dios su sirbidó Daniel a haña un vision di cosnan celestial di cua el a skirbi: “Tabatin mil di miles cu a sigui sirbi [Dios], i dies mil bes dies mil cu a sigui para net su dilanti.”—Daniel 7:10.

Tuma nota cu e declaracion di Daniel ta bai mas aleu cu djis bisa cu tin hopi angel. Tambe e ta indicá cu angelnan ta sirbi Dios. Nan ta su sirbidónan. Na armonia cu esaki, e salmista a canta: “Bendicioná Jehova, o boso angelnan di dje, poderoso den potencia, cu ta cumpli cu su palabra, dor di scucha n’e bos di su palabra. Bendicioná Jehova, boso tur ehércitonan di dje, boso ministernan di dje, cu ta haci su boluntad.”—Salmo 103:20, 21.

Bijbel ta splica tambe cu angelnan no a cuminsá nan bida como hende riba tera. Jehova a crea angel den shelu asta promé cu el a crea tera. Ora Dios a ‘funda e tera, tur e yunan angelical di Dios a grita den aplauso.’—Job 38:4-7.

Angelnan ta criaturanan spiritual—invisibel, poderoso i inteligente. Den Bijbel, e palabra hebreo mal·ákh i e término griego ág·ge·los ta ser traducí como “angel” ora nan ta indicá un criatura spiritual. E palabranan aki ta aparecé casi 400 bes den Bijbel. Tur dos tin e mésun nificacion, esta, “mensahero.”

Encuentro cu Angel

No tin duda cu angelnan ta mensahero. Tal bes bo conocé e relato bíblico tocante e tempu ora angel Gabriel a aparecé na Maria. El a bisa Maria cu aunke e tabata bírgen, lo el a duna lus na un yu homber cu mester a yama Jesus. (Lucas 1:26-33) Tambe un angel a aparecé na algun wardadó cu tabata pafó den cunucu. El a anunciá: “A nace na boso awe un Salbador, cu ta Cristo e Señor.” (Lucas 2:8-11) Di manera similar, angelnan a entregá mensahe na Agar, Abraham, Lot, Jacob, Moises, Gídeon, Jesus i otronan cu Bijbel ta papia di dje.—Génesis 16:7-12; 18:1-5, 10; 19:1-3; 32:24-30; Exodo 3:1, 2; Huesnan 6:11-22; Lucas 22:39-43; Hebreonan 13:2.

Algu notabel ta cu tur e mensahenan aki cu angel a transmití tabata na armonia cu e realisacion dje propósitonan di Dios i no necesariamente dje hendenan enbolbí. Angelnan a aparecé como representante di Dios, segun su boluntad i orario. No ta hende a manda yama nan.

Nos Mester Pidi Angelnan Yuda Nos?

Ta bon pa pidi angelnan yuda nos den tempu di angustia? Si ta asina, nos lo tin gana di sa nomber di un angel cu por yuda nos mihó. Consecuentemente, algun buki comercial tin lista di supuesto nombernan di hopi angel, huntu cu nan rango, título i tareanan. Un buki tin un lista di loke e ta yama e “top dies celestial,” e “angelnan mas conocí den e mundu occidental.” Huntu cu e lista ta bini e conseho pa cera bo wowo, ripití nomber dje angel poco-poco vários biaha, hala rosea profundo, hala rosea poco-poco, i “habri bo mes pa posibel contacto cu nan.”

Na contraste, Bijbel ta duna nos nomber di solamente dos dje angelnan fiel di Dios, Miguel i Gabriel. (Daniel 12:1; Lucas 1:26) Posiblemente, e motibu pa duna e dos nombernan aki tabata pa mustra cu cada angel ta un persona spiritual único cu un nomber, no djis un energia of forsa impersonal.

Ta notabel cu algun angel a nenga di revelá nan nomber na hende. Ora Jacob a puntra un angel pa bis’é su nomber, e no kier a hacié. (Génesis 32:29) Ora Hosué a pidi un angel cu a acerk’é pa identificá su mes, el a djis bisa cu e tabata e “prins dje ehército di Jehova.” (Hosué 5:14) Ora e mayornan di Samson a puntra un angel pa su nomber, el a bisa: “Pakico precis bo tin cu puntra tocante mi nomber, ora cu e ta un nomber maraviyoso?” (Huesnan 13:17, 18) Dor di no duna un lista di nomber di angel, Bijbel ta protehá nos contra duna indebido onor i adoracion na angel. Manera nos lo mira, Bijbel no ta manda nos pidi nan yudansa tampoco.

Acudí na Dios

Bijbel ta bisa nos tur loke nos tin cu sa tocante asuntunan den e region spiritual. Apostel Pablo a skirbi: “Tur Scritura ta inspirá di Dios i ta probechoso pa siña . . . p’e homber di Dios por ta plenamente competente, completamente ekipá pa tur bon obra.” (2 Timoteo 3:16, 17) Si Dios tabata kier pa nos sa nomber di hopi angel, lo el a revelá esakinan den su Palabra, Bijbel. I si Dios tabata deseá pa instruí nos con pa drenta den contacto cu angel i papia cu nan den oracion, lo el a percurá e informacion ei den e Scritura.

Na lugá di esei, Jesucristo a siña hende: “Ora bo ta haci oracion, drenta den bo kamber privá i, despues di cera bo porta, haci oracion na bo Tata cu ta den secreto . . . Boso, anto, tin cu haci oracion asina aki: ‘Nos Tata cu ta den shelu, laga bo nomber sea santificá.’” (Mateo 6:6, 9) E punto di bista bíblico ta esaki: Nos no mag yama riba angel ni haci oracion na nan. Mas bien, nos mester acercá e Creador di angel, Dios mes, den oracion. Su nomber no ta un misterio, i nos no tin mester di un miradó di vision pa revel’é. Aunke hende a haci intento pa tapa e nomber divino, e ta aparecé mas cu 7.000 biaha den e registro bíblico. Por ehempel, tabata cu referencia n’e Tata celestial cu e salmista a canta: “Abo, kende su nomber ta Jehova, abo so ta e Haltísimo riba tur e tera.”—Salmo 83:18.

Nunca Jehova ta muchu ocupá pa scucha nos si nos acerk’é den oracion den e manera apropiado. Bijbel ta duna e siguransa aki: “En cuanto Jehova, su wowonan ta pasando rond e tera p’e mustra su forsa na fabor di esnan kende nan curason ta completo pa cuné.”—2 Crónicanan 16:9.

Angel i Moralidad

Contrario na loke hopi biaha medionan di comunicacion ta describí, angelnan no ta husga hende. Esei ta apropiado, pasobra angelnan no ta autorisá pa husga hende. Jehova ta “e Hues di tur,” aunke “el a confia tur e husgamentu n’e Yu,” Jesucristo. (Hebreonan 12:23; Juan 5:22) No obstante, lo ta un ekibocacion pa asumí cu angelnan ta indiferente pa cu e manera cu nos ta hiba nos bida. Jesus a bisa: “Goso ta lanta entre e angelnan di Dios pa un pecadó cu ta repentí.”—Lucas 15:10.

Sin embargo, angelnan no ta djis para wak na cantu. Den pasado, nan a sirbi como ehecutor, cumpliendo cu e huicionan di Dios. Por ehempel, Dios a usa angel contra e egipcionan di antigwedad. Segun Salmo 78:49, “el a pasa na manda riba nan su rabia ardiente, furia i denunciacion i angustia, delegacionnan di angel cu a trece calamidad.” Mescos tambe, Bijbel ta informá cu den un anochi un solo angel a destruí 185.000 soldá asirio.—2 Reynan 19:35.

Di igual manera, den futuro, angelnan lo destruí hende cu dor di nenga di armonisá nan bida n’e normanan hustu di Dios, ta menasá e bienestar di otronan. Jesus lo bini “cu su angelnan poderoso den un vlam di candela, ora e trece vengansa riba esnan cu no conocé Dios i esnan cu no ta obedecé e bon nobo.”—2 Tesalonicensenan 1:7, 8.

Asina e Scritura ta mustra cu semper e angelnan fiel di Dios ta haci su boluntad dor di sigui su instruccionnan i sostené su normanan hustu. Ta claro cu si nos kier p’e angelnan di Dios yuda nos, nos tin cu sa kico ta e boluntad di Dios i haci esfuerso diligente pa cumpli cuné.

Angel Wardadó

Angel ta interesá den hende i ta protehá nan? Apostel Pablo a puntra: “Nan tur [angel] no ta spiritu pa sirbishi público, mandá pa sirbi na fabor di esnan cu lo heredá salbacion?” (Hebreonan 1:14) Ta masha cla cu e contesta riba Pablo su pregunta ta sí.

Pa motibu cu e tres hebreonan Sadrac, Mesac i Abednego a nenga di buig dilanti un imágen di oro construí pa Rey Nabucodonosor di Babilonia, el a laga tira nan den un fornu super cayente. Pero, e candela no a kima e fiel sirbidónan ei di Dios. Ora e rey a wak den e fornu, el a mira “cuater homber físicamente fuerte,” i a bisa cu “e aparencia di esun di cuater [tabata] parce un yu dje diosnan.” (Daniel 3:25) Algun aña despues, Daniel a haña su mes den un cueba di leon pa motibu di su fieldad. E tambe a sali ileso i a declará: “Mi propio Dios a manda su angel i a cera boca dje leonnan.”—Daniel 6:22.

Cu establecimentu dje congregacion di Cristo su siguidónan den e promé siglo E.C., angelnan a aparecé atrobe, librando e apostelnan for di prizon. (Echonan 5:17-24; 12:6-12) I ora Pablo su bida tabata na peliger den laman, un angel a sigur’é cu lo el a yega Roma sano i salbo.—Echonan 27:13-24.

Sirbidónan di Jehova Dios djawe ta plenamente convencí cu Dios su forsanan angelical invisibel ta real i por duna proteccion, manera nan a haci pa Eliseo i su sirbidó. (2 Reynan 6:15-17) Sí, “e angel di Jehova ta stacioná tur rond di esnan cu ta tem’é, i e ta rescatá nan.”—Salmo 34:7; 91:11.

E Mensahe cu Angelnan Ta Declará

Miéntras angelnan tin interes den e bienestar di esnan cu ta sirbi Jehova Dios, nan ta enbolbí tambe den percurá pa hende siña tocante dje i su propósito. Apostel Juan a skirbi: “Mi a mira un otro angel bulando meimei di shelu, i e tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo, bisando cu bos haltu: ‘Teme Dios i dun’é gloria.’”—Revelacion 14:6, 7.

Abo kier sa kico e “bon nobo eterno” aki ta contené? Si ta asina, papia cu Testigonan di Jehova. Nan lo ta contentu pa compartié cu bo.

[Plachinan na página 7]

Un angel cu ta bula meimei di shelu ta declará bon nobo eterno. Abo kier siña dje bon nobo ei?