Kiko Angel Ta?
E kontesta ku Beibel ta duna
Angel ta kriatura ku tin mas poder i abilidat ku hende. (2 Pedro 2:11) Nan ta biba den shelu, òf den e region spiritual, ku ta un nivel di eksistensia mas haltu ku e universo físiko. (1 Reinan 8:27; Huan 6:38) Pues, nan ta ser yamá tambe spiritu.—1 Reinan 22:21; Salmo 18:10.
Di unda angel a bini?
Dios a krea angel pa medio di Hesus, kende Beibel ta yama “e promé di tur kreashon.” Beibel ta splika kon Dios a usa Hesus pa logra esei: “Pa medio di [Hesus] tur otro kos a ser kreá, tantu den shelu komo riba tera, kosnan visibel i kosnan invisibel,” inkluso e angelnan. (Kolosensenan 1:13-17) E angelnan no ta kasa ni no ta haña yu. (Marko 12:25) En bes di esei, kada un di “e yu hòmbernan di Dios” a ser kreá individualmente.—Yòb 1:6, Beibel Santu.
Angel a ser kreá hopi tempu pasá, promé ku tera a eksistí. Ora Dios a krea tera, e angelnan a “grita di alegria.”—Yòb 38:4-7, Beibel Santu.
Kuantu angel tin?
Beibel no ta papia di un kantidat spesífiko, pero sí e ta mustra ku nan ta hopi. Por ehèmpel, apòstel Huan a haña un vishon kaminda el a mira sientos di miónes di angel.—Revelashon 5:11, nota.
Tur angel tin nan propio nòmber i personalidat?
Sí. Beibel ta menshoná nòmber di dos angel: Miguel i Gabriel. (Daniel 12:1; Lukas 1:26)a Otro angelnan a rekonosé ku nan tabatin nòmber, pero nan no a bisa nan nòmber.—Génesis 32:29; Huesnan 13:17, 18.
Kada angel tin nan mes personalidat. Ademas, nan por komuniká ku otro. (1 Korintionan 13:1) E angelnan por pensa i por alabá Dios. (Lukas 2:13, 14) Tambe nan tin e libertat pa skohe entre loke ta bon i loke ta malu, manera nos por a mira den e kaso di algun di nan ku a peka i a djòin Satanas e Diabel den su rebelion kontra Dios.—Mateo 25:41; 2 Pedro 2:4.
Angel tin diferente rango?
Sí. E angel ku tin mas poder i outoridat ta Miguel, e arkangel. (Hudas 9; Revelashon 12:7) Serafin ta angelnan di rango haltu ku ta pará banda di e trono di Yehova. (Isaías 6:2, 6) Otro angelnan ku tambe tin posishon haltu ta kerubin, kendenan tin tarea spesial. Por ehèmpel, ta kerubin a vigilá e entrada di e hòfi di Eden despues ku Dios a saka Adam ku Eva for di e hòfi.
Angel ta yuda hende?
Sí, awendia Dios ta usa su angelnan fiel pa yuda hende.
Dios ta usa su angelnan pa guia su sirbidónan den e trabou di prediká e bon notisia di e Reino di Dios. (Revelashon 14:6, 7) E guia akí ta benefisiá tantu esnan ku ta prediká komo esnan ku ta tende e bon notisia.—Echonan 8:26, 27.
E angelnan ta yuda tene e kongregashon kristian liber di influensia di hende malbado.—Mateo 13:49.
E angelnan ta guia i protehá hende ku ta fiel na Dios.—Salmo 34:7; 91:10, 11; Hebreonan 1:7, 14.
Pronto e angelnan lo bringa huntu ku Hesukristu pa libra humanidat di maldat i sufrimentu.—2 Tesalonisensenan 1:6-8.
Kada un di nos tin un angel wardadó?
Aunke e angelnan ta kuida e bienestar spiritual di e sirbidónan di Dios, esaki no nesesariamente ta nifiká ku Dios a asigná un angel wardadó pa kuida i protehá kada kristian.b (Mateo 18:10) E angelnan no ta protehá sirbidónan di Dios kontra tur prueba òf tentashon. Beibel ta mustra ku mayoria di biaha Dios lo ‘perkurá pa e salida’ for di un prueba dunando nos e sabiduria i forsa pa perseverá.—1 Korintionan 10:12, 13; Santiago 1:2-5.
Idea robes tokante angel
Idea robes: Tur angel ta bon.
E bèrdat: Beibel ta papia tokante “forsanan spiritual di maldat” i “e angelnan ku a peka.” (Efesionan 6:12; 2 Pedro 2:4) E angelnan malbado akí ta demoñonan, kendenan a djòin Satanas den rebeldiá kontra Dios.
Idea robes: Angel ta inmortal.
E bèrdat: E angelnan malbado, inkluso Satanas e Diabel, lo ser destruí.—Hudas 6.
Idea robes: Ora hende muri, nan ta bira angel.
E bèrdat: E angelnan no ta hende ku a ser resusitá; nan ta un kreashon di Dios riba nan mes. (Kolosensenan 1:16) Hende ku ser resusitá pa biba den shelu lo risibí bida inmortal for di Dios. (1 Korintionan 15:53, 54) Nan lo tin un puesto mas haltu ku e angelnan.—1 Korintionan 6:3.
Idea robes: Angel a ser kreá pa sirbi hende.
E bèrdat: Angel ta obedesé Dios, no nos. (Salmo 103:20, 21) Asta Hesus a bisa ku lo e pidi Dios yudansa, no e angelnan.—Mateo 26:53.
Idea robes: Nos por hasi orashon na angel i pidi nan yudansa.
E bèrdat: Orashon ta parti di nos adorashon i ta Yehova Dios so nos mester adorá. (Revelashon 19:10) Nos mester hasi orashon solamente na Dios, mediante Hesus.—Huan 14:6.
a Algun tradukshon di Beibel ta usa e nòmber “Lusifèr” na Isaías 14:12, ku algun hende ta pensa ta e nòmber di e angel ku a bira Satanas e Diabel. Sinembargo, e palabra original na hebreo ku nan a usa ta nifiká “esun ku ta bria. E konteksto ta mustra ku e palabra akí ta referí, no na Satanas, pero na e dinastia di Babilonia ku Dios lo a humiá pa su arogansia. (Isaías 14:4, 13-20) E ekspreshon “esun ku ta bria” a ser usá pa ridikulisá e dinastia di Babilonia despues ku el a ser derotá.
b Algun hende a pensa ku e relato den kua Pedro a ser librá for di prizòn ta indiká ku Pedro tabatin su angel wardadó. (Echonan 12:6-16) Sinembargo, ora e disipelnan a referí na “[Pedro] su angel,” kisas tabata debí ku nan a yega na e konklushon robes ku ta un angel ku ta representá Pedro a trese un mensahe pa nan, i no Pedro mes.