Pascu A Perde Cristo?

“Nunca mi no por a aceptá e festividadnan dje temporada di Pascu. Nan a parcé mi masha inconsistente cu e bida i siñansa di Jesus.”—Mohandas K. Gandhi.

HOPI hende lo no ta niun tiki di acuerdo cu Gandhi. Kisas nan ta puntra nan mes: ‘Ta kico un estadista hindú por sa di un dia di fiesta cristian?’ Pero, nos tin cu admití cu Pascu a plama rond mundu i a afectá tur tipo di cultura. Tur december, ta parce cu hende di tur cultura ta celebrá e dia di fiesta ei.

Por ehempel, rond di 145 miyon asiático ta celebrá Pascu, 40 miyon mas cu un década pasá. I si cu “festividadnan” Gandhi tabata kier men e parti seglar di Pascu moderno, esta, e locura di haci compra na granèl cu nos tur ta observá, ta difícil pa nenga cu hopi bes e aspecto aki dje celebracion ta esun mas prominente. E revista Asiaweek ta remarcá: “Pascu na Asia—for dje lusnan festivo na Hong Kong te na kerstboom grandi den lobinan di hotel na Beijing, te na un pesebre den centro di stad di Singapur—ta un evento principalmente comercial.”

E celebracion moderno di Pascu a perde Cristo for di bista? Oficialmente, hende ta celebrá 25 di december for di siglo cuater E.C., tempu cu Iglesia Católico Romano a asigná e dia ei pa celebracion religioso dje nacementu di Jesus. Pero segun un encuesta recien na Merca, 33 porciento so di esnan cu nan a puntra ta haña cu e nacementu di Cristo ta e aspecto mas importante di Pascu.

Kico abo ta pensa? Bo no ta haña cu tin biaha den tur e propaganda insistente, cumpramentu anshá di regalo, decoracion di palu, ponementu i baimentu di fiesta, mandamentu di tarheta, di un manera of otro nan a laga Jesus afó?

Aparentemente hopi hende ta haña cu un manera pa pone Cristo bek den Pascu ta dor di exhibí un pesebre. Probablemente bo a yega di mira grupo di figura asina cu ta representá e niño Jesus den un pesebre rondoná pa Maria, José, algun wardadó di carné, “tres sabio,” of “tres rey,” algun bue i buricu, i algun mirones. Por lo general nan ta haña cu e pesebrenan aki ta yuda recordá hende dje berdadero nificacion di Pascu. Segun U.S. Catholic, “un pesebre ta duna un cuadro mas amplio cu cualkier solo evangelio por duna, aunke e ta enfatisá tambe e caracter no-histórico dje relatonan aki.”

Pero, con un pesebre por indicá cu e relatonan den Evangelio di Bijbel no ta histórico? Wel, nos tin cu admití cu imágennan chikitu i pintoresco ta duna e nacementu di Cristo un aura di leyenda of cuenta di ada. Ta un mónik a haci e pesebre popular den siglo 13, e tempu ei un asuntu masha modesto. Awe e pesebre, mescos cu asina tantu otro cos asociá cu e dia di fiesta aki, a bira gran negoshi. Na Nápoli, Italia, rijnan di pacus ta bende figura pa pesebre, of presepi, henter aña. Algun dje figuranan mas popular ta representá, no personahe dje Evangelionan, sino hende famoso djawe, manera Prinses Diana, Mama Teresa i e diseñadó di paña Gianni Versace. Otro caminda, hende ta traha presepi di chuculati, mansa i asta di cocolishi. Bo por comprendé anto pakico ta difícil pa mira historia den exhibicionnan asina.

Anto, con e pesebrenan ei por duna “un cuadro mas amplio cu cualkier solo evangelio por duna”? E relatonan di Evangelio no ta berdaderamente histórico? Asta sképticonan intransigente tin cu admití cu Jesus tabata un persona real i histórico. Pues, un tempu e mester tabata un baby real cu a nace den un lugá real. Mester tin un mihó manera pa haña un cuadro amplio dje sucesonan rond di su nacementu cu djis para wak un pesebre!

Tin un manera. Dos historiadó a skirbi relatonan independiente di otro tocante Jesus su nacementu. Si de bes en cuando bo sinti cu pa gran parti hende ta ignorá Cristo den tempu di Pascu, pakico no examiná e relatonan aki pa bo mes? Den nan lo bo haña, no leyenda ni mito, sino un historia fasinante—e berdadero historia dje nacementu di Cristo.

[Rekonosementu pa Potrèt na página 3]

Rand di página 3-6, 8 i 9: Fifty Years of Soviet Art