“Jehova” of “Yahweh”?

“MESCLA,” “híbrido,” “abnormal.” Kico por a pone erudito di hebreo bíblico usa palabranan asina pisá? E cuestion ta si “Jehova” ta e pronunciacion corecto dje nomber di Dios. E controversia aki ta andando pa mas cu shen aña caba. Awe, ta parce cu mayoria erudito ta preferá e palabra di dos sílaba “Yahweh.” Pero, di berdad e pronunciacion di tres sílaba, “Jehova” ta asina “abnormal”?

Principio dje Controversia

Segun Bijbel, Dios mes a revelá su nomber na humanidad. (Exodo 3:15) Evidencia bíblico ta mustra cu Dios su sirbidónan di ántes a usa e nomber ei libremente. (Génesis 12:8; Rut 2:4) Otro nacionnan tambe tabata conocé e nomber di Dios. (Hosué 2:9) Esaki tabata e caso foral despues cu e hudiunan cu a bolbe di exilio na Babilonia, a bini den contacto cu hende di hopi nacion. (Salmo 96:2-10; Isaías 12:4; Malakías 1:11) The Interpreter’s Dictionary of the Bible ta bisa: “Tin bastante evidencia di cu despues dje periodo cu e hudiunan tabata exiliá, nan religion a atraé hopi stranhero.” Sin embargo, rond di promé siglo E.C., a lanta un cierto supersticion tocante e nomber di Dios. Cu tempu, hudiunan no solamente a stop di usa e nomber di Dios abiertamente, sino algun asta a prohibí mes pa us’é. I p’esei e pronunciacion corecto a bai perdí—of no ta asina?

Ki Importancia un Nomber Tin?

Na e idioma hebreo, nan ta skirbi e nomber di Dios יהוה. Generalmente hende ta yama e cuater letternan aki cu bo ta lesa di drechi bai robes, e Tetragramaton. Hopi nomber di hende i sitionan mencioná den Bijbel ta consistí di un abreviacion dje nomber divino. Ta posibel cu e nombernan personal aki lo por duna nos algun clave pa sa con nan tabata pronunciá e nomber di Dios?

Segun George Buchanan, profesor emérito na e Seminario Teológico di Wesley na Washington, D.C., Merca, e contesta ta sí. Profesor Buchanan ta splica: “Den tempu antiguo, hopi bes mayornan tabata duna yunan nomber di nan dios. Esei ta nificá cu nan lo a pronunciá e nomber di nan yu manera nan lo a pronunciá e nomber dje dios. E Tetragramaton tabata parti di nomber di hende, i semper nan tabata usa e vocal meimei.”

Considerá algun ehempel di nombernan personal cu Bijbel ta mencioná i cu ta incluí un forma abreviá dje nomber di Dios. Jonatan cu ta aparecé den Bijbel hebreo como Yoh·na·thán of Yehoh·na·thán, ta nificá “Yaho of Yahowah a duna,” segun profesor Buchanan. Profeta Elías su nomber hebreo ta ʼE·li·yáh of ʼE·li·yá·hu. Segun profesor Buchanan, e nomber ta nificá: “Mi Dios ta Yahoo of Yahoo-wah.” Asina tambe, e nomber hebreo pa Jehósafat ta Yehoh-sha·fát, cu ta nificá “Yaho a husga.”

Si nos pronunciá e Tetragramaton den dos sílaba como “Yahweh,” nos ta omití e zonido dje vocal o for dje nomber di Dios. Pero den e decenas di nomber bíblico cu ta incorporá e nomber divino, e zonido dje vocal meimei ta aparecé den tantu e forma original como den esun abreviá dje nomber, manera den Jehonatan i Jonatan. P’esei, relacioná cu e nomber divino, profesor Buchanan ta bisa: “Den ningun caso no a omití e vocalnan oo of oh. Tin biaha a usa e abreviacion ‘Ya,’ pero nunca nan a usa ‘Ya-weh.’ . . . Ora a pronunciá e Tetragramaton den un sílaba, a usa ‘Yah’ of ‘Yo.’ Ora a pronunci’é den tres sílaba, lo e tabata ‘Yahowah’ of ‘Yahoowah.’ Ora nan a abrevi’é, e tabata como ‘Yaho.’”—Biblical Archaeology Review.

E comentarionan aki ta yuda nos comprendé e declaracion dje erudito hebreo di siglo 19, Gesenio den su buki titulá Hebrew and Chaldee Lexicon to the Old Testament Scriptures: “Opinion di esnan cu ta pensa cu יְהוָֹה [Ye-ho-wah] ta e pronunciacion corecto [dje nomber di Dios], no ta completamente sin base. Den e forma aki e sílabanan abreviá יְהוֹ [Ye-ho] i יוֹ [Yo], cu cua hopi nomber personal ta cuminsá, por haña un splicacion mas satisfactorio.”

Sin embargo, den e introduccion di su traduccion recien di The Five Books of Moses, Everett Fox ta señalá: “Tantu e intentonan anterior como esnan recien pa recobrá e pronunciacion ‘corecto’ dje nomber hebreo [di Dios] no tabatin éxito; ni e nomber ‘Jehova’ cu nos ta tende de bes en cuando, ni esun cu eruditonan a standarisá, ‘Yahweh,’ no por ser probá definitivamente como tal.”

Sin duda, debatenan escolástico lo continuá. Hudiunan a stop di pronunciá e nomber dje Dios berdadero promé cu e masoretanan a desaroyá e sistema di marca pronunciacion di vocal. P’esei, no tin un forma definitivo pa proba cua vocalnan tabata entre e consonantenan YHWH (יהוה). Tog, nomber dje personahenan bíblico mes, di cua e pronunciacion corecto nunca a bai perdí, ta duna un clave palpabel pa haña sa e pronunciacion antiguo dje nomber di Dios. Debí n’e echo aki, por lo ménos algun erudito ta di acuerdo cu tog e pronunciacion “Jehova” no ta dje “abnormal” ei.

[Plachi na página 31]

“Jehova” ta e pronunciacion mas comun dje nomber di Dios