Sigui Cana den Jehova Su Caminda

“Spera den Jehova i warda su caminda, i lo e halsa bo pa tuma posesion dje tera.”—SALMO 37:34.

1, 2. Kico cana den Jehova su caminda a encerá pa rey David, i kico esei ta rekerí di nos awe?

“HACI mi conocé e caminda den cua mi mester cana, pasobra na abo mi a hisa mi alma.” (Salmo 143:8) Awe, di henter curason, cristiannan ta ripití e palabranan ei di rey David. Nan kier agradá Jehova sinceramente i cana den su caminda. Kico esaki ta encerá? Pa David, esei a nificá cumpli cu e ley di Dios. El a encerá confia den Jehova i no den aliansa cu e nacionnan. Sí, el a nificá sirbi Jehova lealmente i no sirbi e diosnan dje pueblonan bisiña. Pa cristiannan, cana den Jehova su caminda ta enbolbé mas.

² Na promé lugá, awe, cana den Jehova su caminda ta nificá ehercé fe den e sacrificio di rescate di Jesucristo, reconociend’e como “e caminda i e berdad i e bida.” (Juan 3:16; 14:6; Hebreonan 5:9) E ta nificá tambe cumpli cu “e ley di e Cristo,” cu ta encerá mustra amor na otro, specialmente na Jesus su rumannan ungí. (Galationan 6:2; Mateo 25:34-40) Esnan cu ta cana den Jehova su caminda ta stima su principio i mandamentunan. (Salmo 119:97; Proverbionan 4:5, 6) Nan ta apreciá mashá nan privilegio precioso di participá den e ministerio cristian. (Colosensenan 4:17; 2 Timoteo 4:5) Oracion ta un parti regular di nan bida. (Romanonan 12:12) I nan ta ‘vigilá cuidadosamente p’e manera cu nan ta cana no ta manera hende imprudente sino manera hende sabí.’ (Efesionan 5:15) Nan sigur no ta sacrificá rikesa spiritual pa bentaha material temporal of pa placer carnal ilícito. (Mateo 6:19, 20; 1 Juan 2:15-17) Ademas, lealtad na Jehova i confiansa den dje ta vital. (2 Corintionan 1:9; 10:5; Efesionan 4:24) Pakico? Pasobra nos situacion ta basta similar na esun di Israel di antigwedad.

E Necesidad pa Confiansa i Lealtad

3. Pakico lealtad, fe i confiansa lo yuda nos sigui cana den Jehova su caminda?

³ Israel tabata un nacion chikitu rondoná pa bisiñanan hostil cu tabata participá den ceremonianan inmoral den nan adoracion di ídolo. (1 Crónicanan 16:26) Ta Israel so tabata sirbi Jehova, e único Dios berdadero i invisibel, i el a exigí pa nan pega na normanan moral haltu. (Deuteronomio 6:4) Awe tambe, ta algun miyon hende so ta adorá Jehova. Nan ta biba den un mundu di casi seis mil miyon hende kende nan normanan i punto di bista religioso ta masha diferente for di esnan cu nan tin. Si nos ta entre e poco miyones ei, nos tin cu vigilá contra influencianan cu ta manda nos den e caminda robes. Con? Lealtad na Jehova Dios, fe den dje, i un confiansa firme cu lo e cumpli cu su promesanan, lo yuda. (Hebreonan 11:6) Esaki lo prevení nos di pone confiansa den e cosnan cu mundu ta spera ariba.—Proverbionan 20:22; 1 Timoteo 6:17.

4. Di con e nacionnan ta den “scuridad mentalmente”?

⁴ Apostel Pablo a mustra con diferente cristiannan mester ta for di mundu ora el a skirbi: “Esaki, pues, mi ta bisa i ta duna testimonio den Señor, pa boso no sigui cana mescos cu e nacionnan tambe ta cana den e inutilidad di nan mente, miéntras nan ta den scuridad mentalmente, i alehá for dje bida cu ta pertenecé na Dios pa causa dje ignorancia cu ta den nan, pa causa dje insensibilidad di nan curason.” (Efesionan 4:17, 18) Jesus ta “e berdadero lus.” (Juan 1:9) Ken cu ta rechas’é of cu ta pretendé di kere den dje pero cu no ta obedecé “e ley di e Cristo,” ta “den scuridad mentalmente.” En bes di cana den Jehova su caminda, nan ta “alehá for dje bida cu ta pertenecé na Dios.” Pa sabí cu nan por kere cu nan ta, segun norma di mundu, nan tin ‘ignorancia den nan’ pa loke ta e único conocimentu cu ta hiba na bida, conocimentu di Jehova Dios i di Jesucristo.—Juan 17:3; 1 Corintionan 3:19.

5. Aunke e lus dje berdad ta briya den mundu, pakico e curason di hopi hende no ta respondé?

⁵ Tog, e lus dje berdad ta briya den mundu! (Salmo 43:3; Filipensenan 2:15) “Berdadero sabiduria mes ta sigui sclama duru den caya mes.” (Proverbionan 1:20) Aña pasá, Testigonan di Jehova a dedicá mas cu mil miyon ora na papia cu nan próhimo tocante Jehova Dios i Jesucristo. Cientos di miles di hende a respondé. Pero nos mester keda sorprendí cu hopi otro hende no a respondé? No. Pablo a papia di “e insensibilidad di nan curason.” Egoismo of amor pa placa ta pone cu e curason di algun no ta respondé. Otronan ta ser influenciá dor di religion falsu of dor dje punto di bista di mundu cu ta asina prevalente awe. Experencia doloroso di bida a pone hopi hende bira lomba pa Dios. Otronan ta nenga di cumpli cu e normanan moral elevá di Jehova. (Juan 3:20) Curason di un persona cu ta cana den Jehova su caminda por perde heful relacioná cu e cosnan aki?

6, 7. Maske e israelitanan tabata adoradó di Jehova Dios, na ki ocasionnan nan a kita for di Jehova, i pa ki motibu?

⁶ Manera Pablo a mustra, esaki ta net loke a sosodé cu Israel di antigwedad. El a skirbi: “E cosnan aki a bira nos ehempel, pa nos no ta personanan cu ta deseá cosnan perhudicial, mescos cu nan a deseá nan. Ni laga nos no bira idólatra, manera algun di nan; net manera ta pará skirbí: ‘E pueblo a sinta pa come i bebe, i nan a lanta pa dibertí nan mes.’ Ni laga nos no practicá fornicacion, manera algun di nan a cometé fornicacion, solamente pa cai, bintitres mil di nan den un dia.”—1 Corintionan 10:6-8.

⁷ Pablo ta referí promé n’e ocasion ora Israel a adorá un bisé di oro na pia di ceru Sínai. (Exodo 32:5, 6) Esaki tabata un desobedencia directo dje mandamentu divino cu nan a bai eens pa obedecé djis un par di siman promé. (Exodo 20:4-6; 24:3) Despues, Pablo ta referí n’e tempu ora Israel a buig na Baal huntu cu e yu muhernan di Moab. (Númeronan 25:1-9) Adoracion di bisé tabata caracterisá pa entrega na excesonan flagrante, esta “dibertí.”a Adoracion di Baal tabata bai compañá cu inmoralidad sexual flagrante. (Revelacion 2:14) Pakico e israelitanan a cometé e picánan aki? Pa motibu cu nan a laga nan curason “deseá cosnan perhudicial”—sea e idolatria of e prácticanan inmoral cu a bai compañá cuné.

8. Kico nos por siña for dje experencianan di Israel?

⁸ Pablo a indicá cu nos mester siña un les for dje sucesonan aki. Siña ki les? Wel, bo no ta pensa mes cu un cristian ta bai buig dilanti un bisé di oro of un dios moabita di antigwedad. Pero kico di inmoralidad of di entrega na satisfaccion propio desenfrená? Esakinan ta comun awe, i si nos permití un deseo pa nan crece den nos curason, nan lo bin para meimei di nos cu Jehova. E resultado lo ta mescos cu si nos a cometé idolatria, esta, nos ta alehá for di Dios. (Compará cu Colosensenan 3:5; Filipensenan 3:19.) Sí, Pablo ta concluí su consideracion dje sucesonan ei exhortando compañeronan creyente: “Hui di idolatria.”—1 Corintionan 10:14.

Yudansa pa Cana den Jehova Su Caminda

9. (a) Ki yudansa nos ta ricibí pa sigui cana den Jehova su caminda? (b) Cua ta un manera cu nos ta tende e ‘palabra nos tras’?

⁹ Si nos ta determiná pa sigui cana den Jehova su caminda, nos lo no ta sin yudansa. Isaías a profetisá: “Bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:21) Con ‘nos propio oreanan’ ta tende ‘e palabra ei nos tras’? Wel, awe ningun hende no ta tende un bos literal ni ricibí un mensahe personal for di Dios. E “palabra” cu nos ta tende ta bini na nos tur den e mésun manera. Di promé i mas principal, e ta bini mediante e Scritura inspirá, Bijbel, cu ta contené e pensamentunan di Dios i un registro di su trato cu hende. Ya cu nos ta exponí diariamente na ideanan cu ta bini di fuentenan “alehá for dje bida cu ta pertenecé na Dios,” pa por tin un bon salú spiritual, nos tin cu lesa Bijbel i meditá riba dje regularmente. Esaki lo yuda nos evitá “cosnan bano” i pa ta “plenamente competente, completamente ekipá pa tur bon obra.” (Echonan 14:14, 15; 2 Timoteo 3:16, 17) Esei lo fortalecé nos, fortificá nos i yuda nos ‘haci nos caminda exitoso.’ (Hosué 1:7, 8) P’esei, Jehova su Palabra ta urgi: “Awor, o yunan, scucha mi; sí, felis ta esnan cu ta warda mi mes caminda. Scucha disiplina i bira sabí, i no mustra ningun negligencia.”—Proverbionan 8:32, 33.

10. Cua ta un di dos manera cu nos ta tende e ‘palabra nos tras’?

¹⁰ E ‘palabra nos tras’ ta bini tambe pa medio di “e esclabo fiel i discreto,” cu ta suministrá “alimento n’e debido tempu.” (Mateo 24:45-47) Un manera cu e ta suministrá e alimento aki ta den publicacionnan imprimí basá riba Bijbel, i den añanan recien e suministro di alimento aki tabata abundante. Por ehempel, e revista Toren di Vigilancia a refiná nos comprendimentu di profecia. E revista aki a animá nos pa perseverá den e trabou di predicá i haci disipel apesar di apatia creciente. El a yuda nos evitá trampanan, i el a urgi nos pa desaroyá bon cualidad cristian. Cuantu nos ta atesorá tal alimento n’e debido tempu!

11. Splica un di tres manera cu nos por tende e ‘palabra nos tras.’

¹¹ Tambe e esclabo fiel i discreto ta suministrá alimento mediante nos reunionnan regular. Esakinan ta encerá reunionnan local di congregacion, dos reunion pa aña na nivel di circuito, i congresonan mas grandi un bes pa aña. Cua cristian fiel no ta balorá reunionnan asina? Nan ta un yudansa vital pa sostené nos pa cana den Jehova su caminda. Ya cu hopi ruman tin cu pasa basta tempu na trabou of na scol den compania di esnan cu no tin mésun creencianan cu nan, asociacion cristian regular literalmente ta salba bida. Reunionnan ta duna nos un bunita oportunidad “pa incitá otro na amor i na obranan excelente.” (Hebreonan 10:24) Nos stima nos rumannan, i nos gusta asociá cu nan.—Salmo 133:1.

12. Ki determinacion Testigonan di Jehova tin, i con nan a expres’é recientemente?

¹² Fortalecí p’e alimento spiritual ei, awe casi seis miyon hende ta cana den Jehova su caminda, i miyones di otro hende mas ta studiando Bijbel pa siña con pa haci esei. E echo cu nan ta poco na cantidad compará cu e miles di miyones dje poblacion dje tera ta desanimá of debilitá nan? Sigur cu no! Nan ta determiná pa sigui haci caso dje ‘palabra nan tras,’ haciendo e boluntad di Jehova lealmente. Como un manifestacion público dje determinacion aki, e delegadonan n’e Congresonan di Distrito i Internacional 1998/1999 “Dios Su Caminda di Bida,” a adoptá un resolucion cu ta expresá nan posicion sincero. Aki ta sigui e texto dje resolucion ei.

Resolucion

13, 14. Ki punto di bista realístico Testigonan di Jehova tin dje situacion di mundu?

¹³ “Nos, como Testigo di Jehova reuní n’e Congreso ‘Dios Su Caminda di Bida,’ di henter nos curason ta di acuerdo cu Dios su caminda ta esun mihó. Sin embargo, nos ta reconocé cu e mayor parti di humanidad awe ta pensa otro. E sociedad humano a experimentá cu cantidad di concepto, filosofia i ideanan religioso pa averiguá cua ta e mihó caminda pa sigui. Un repaso onrado di historia humano i dje condicionnan actual di mundu ta confirmá e berdad dje declaracion formal divino cu ta pará skirbí na Jeremías 10:23: ‘No ta pertenecé na hende cu ta canando pa ni sikiera dirigí su paso.’

¹⁴ Tur dia nos ta mira mas evidencia cu ta confirmá e berdad dje palabranan ei. Mayor parti dje sociedad humano ta despreciá Dios su caminda. Hende ta sigui tras di loke ta parce corecto den nan mes bista, cu consecuencianan trágico: bida di famia kibrá, cu ta laga yunan sin ningun guia; e corementu desenfrená tras di cosnan material, loke ta resultá den un bashí i den frustracion; crímen i violencia sin sentido, di cua un cantidad incontabel di hende ta bira víctima; conflicto i gueranan étnico, cu ta costa bida di un cantidad spantoso di hende; inmoralidad desenfrená cu ta fomentá un epidemia di malesanan transmití sexualmente. Esakinan ta solamente un par dje inmenso cantidad di problemanan complicá cu ta stroba hende di disfrutá di felicidad, pas i siguridad.

15, 16. Relacioná cu Dios su caminda, ki determinacion e resolucion a expresá?

¹⁵ En bista dje situacion tristu di humanidad i di con cerca e ‘guera dje gran dia di Dios Todopoderoso,’ yamá Armagedon ta (Revelacion 16:14, 16), nos como Testigo di Jehova ta declará lo siguiente:

¹⁶ Di promé: Nos ta considerá cu nos ta propiedad di Jehova Dios, como cu nos a dedicá nos mes personalmente i incondicionalmente na dje, i nos lo mantené fe inkebrantabel den Jehova su percuracion dje rescate mediante su Yu, Jesucristo. Nos ta decididu pa cana den Dios su caminda, sirbiendo como su Testigonan i sometiendo nos mes na su soberania, expresá mediante e gobernacion di Jesucristo.

17, 18. Ki posicion Testigonan di Jehova lo sigui mantené pa loke ta normanan moral i e hermandad cristian?

¹⁷ Di dos: Nos lo sigui pega na e normanan moral i spiritual elevá di Bijbel. Nos ta decididu pa no cana mescos cu e nacionnan ta cana den e inutilidad di nan mente. (Efesionan 4:17-19) Ta nos decision pa keda limpi dilanti Jehova i sin mancha dje mundu aki.—Santiago 1:27.

¹⁸ Di tres: Nos lo tene duru na nos posicion bíblico como un hermandad cristian mundial. Nos lo mantené neutralidad cristian entre e nacionnan, i nos lo no permití pa nos cai den e trampa di odio ni division racial, nacional of étnico.

19, 20. (a) Kico mayornan cristian lo haci? (b) Con tur cristian berdadero lo sigui identificá nan mes como disipel di Cristo?

¹⁹ Di cuater: Nos cu ta mayor lo inculcá e caminda di Dios den nos yunan. Nos lo ta un ehempel dje bida cristian, loke ta encerá lesa Bijbel riba un base regular, tene studio di famia i participá di henter alma den actividadnan cristian dje congregacion i den sirbishi di veld.

²⁰ Di cincu: Nos tur lo haci esfuerso pa cultivá e cualidadnan piadoso di cua nos Creador ta un ehempel, i nos lo trata pa imitá su personalidad i su camindanan, mescos cu Jesus a haci. (Efesionan 5:1) Nos ta decididu pa laga tur nos asuntunan tuma lugá cu amor, i dje manera ei identificá nos mes como disipel di Cristo.—Juan 13:35.

21-23. Kico Testigonan di Jehova lo sigui haci, i di kico nan ta convencí?

²¹ Di seis: Sin stop nos lo sigui predicá e bon nobo dje Reino di Dios i haci disipel, i nos lo instruí nan den e caminda di Dios i animá nan pa ricibí mas entrenamentu na e reunionnan di congregacion.—Mateo 24:14; 28:19, 20; Hebreonan 10:24, 25.

²² Di shete: Como individuo i como organisacion religioso, nos lo sigui pone e boluntad di Dios na promé lugá den nos bida. Usando su Palabra, Bijbel, como nos guia, nos lo no desviá ni na banda drechi ni na banda robes, confirmando asina cu e caminda di Dios ta hopi mas superior cu esnan dje mundu. Nos ta decididu pa sigui cana, fiel i leal, den Dios su caminda, awor i pa semper!

²³ Nos ta adoptá e resolucion aki, debí cu nos ta pone pleno confiansa den Jehova su promesa amoroso di cu esun cu haci e boluntad di Dios lo permanecé pa semper. Nos ta adoptá e resolucion aki pasobra nos ta convencí cu biba segun e principionan, conseho i amonestacion bíblico ta e mihó manera di biba awe i ta pone un bon fundeshi pa futuro, di manera cu nos por haña un gara firme riba e berdadero bida. (1 Timoteo 6:19; 2 Timoteo 4:7b, 8) Riba tur cos, nos ta adoptá e resolucion aki pasobra nos stima Jehova Dios cu henter nos curason, alma, mente i forsa!

24, 25. Kico tabata e contesta riba e resolucion proponé, i kico ta e determinacion di esnan cu ta cana den Jehova su caminda?

²⁴ Tur persona presente n’e congreso aki cu ta apoyá e resolucion aki, por fabor, bisa SI!”

²⁵ Cientos di sala i stadion rond mundu a keda resoná ora tur presente den auditorio a contestá un “SI” potente! Testigonan di Jehova no tin duda cu nan lo sigui cana den Jehova su caminda. Nan tin pleno confiansa den Jehova i fe cu lo e cumpli cu su promesanan. Nan ta keda leal na dje, sin importá kico pasa. I nan ta determiná pa haci su boluntad.

“Dios Ta pa Nos”

26. Den ki situacion felis esnan cu ta cana den Jehova su caminda ta?

²⁶ Testigonan di Jehova ta corda e exhortacion dje salmista: “Spera den Jehova i warda su caminda, i lo e halsa bo pa tuma posesion dje tera.” (Salmo 37:34) Nan no ta lubidá Pablo su palabranan animador: “Si Dios ta pa nos, ken lo ta contra nos? Esun cu ni sikiera a spar su mes Yu sino a entregu’é pa nos tur, pakico lo e no duna nos tambe bondadosamente huntu cuné tur otro cos?” (Romanonan 8:31, 32) En berdad, si nos sigui cana den Jehova su caminda, lo e percurá “tur cos ricamente pa nos por disfrutá di nan.” (1 Timoteo 6:17) Ki mihó lugá por tin cu caminda nos ta—canando den Jehova su caminda, banda di nos rumannan stimá. Cu Jehova na nos lado, laga nos ta determiná pa keda ei i pa wanta te na fin, cu pleno confiansa cu na su debido tempu, nos lo mir’é cumpli cu delaster un di su promesanan.—Tito 1:2.

[Nota]

Bo Ta Corda?

◻ Kico ta necesario pa un cristian cana den Jehova su caminda?

◻ Pakico nos tin cu cultivá confiansa den Jehova i lealtad na dje?

◻ Ki yudansa ta disponibel ora nos ta cana den Jehova su caminda?

◻ Duna algun punto sobresaliente dje resolucion adoptá n’e Congresonan “Dios Su Caminda di Bida.”

[Plachi na página 18]

N’e Congresonan Internacional i di Distrito “Dios Su Caminda di Bida” nos a adoptá un resolucion importante