Tempu i Eternidad—Kico Nos Sa di Nan Realmente?

“TEMPU ta parce di ta un dje experencianan humano mas misterioso,” segun un enciclopedia. Sí, ta casi imposibel pa definí tempu den términonan simpel. Nos por bisa kisas cu tempu “ta transcurí,” “ta pasa,” “ta bula,” i asta cu nos mes ta moviendo den “e coriente di tempu.” Pero nos no sa ègt di kico nos ta papiando.

Hende a definí tempu como e “distancia entre dos suceso.” Pero nos experencia ta parce di bisa nos cu tempu ta independiente di suceso; e ta parce di pasa, sea cu algu ta sosodé of no. Segun un filósofo, eigenlijk tempu no ta existí pero e ta simplemente algu cu hende ta imaginá. Loke gran parti di nos experencia ta basá ariba por ta djis un producto di nos imaginacion?

Bijbel Su Punto di Bista di Tempu

Bijbel no ta duna ningun definicion di tempu. Esei ta indicá cu tal bes e ta fuera di hende su abilidad pa comprend’é completamente. E ta manera e expansion interminabel di espacio, cu tambe nos ta haña difícil pa comprendé. Tempu, aparentemente, ta un dje cosnan cu Dios so por comprendé completamente, pasobra e so ta “for di tempu indefiní pa tempu indefiní.”—Salmo 90:2.

Maske Bijbel no ta definí tempu, e ta papia sí di tempu como un realidad. Pa cuminsá, Bijbel ta bisa nos cu Dios a crea e “lusnan di shelu,” esta, solo, luna i strea, pa marca tempu, pa “sirbi como señal i pa temporada i pa dia i aña.” Hopi suceso registrá den Bijbel ta firmemente establecí den e coriente di tempu. (Génesis 1:14; 5:3-32; 7:11, 12; 11:10-32; Exodo 12:40, 41) Tambe Bijbel ta papia di tempu como algu cu nos mester usa den un manera sabí, pa nos por ta den fila pa ricibí e bendicion di Dios di un eternidad di tempu: e prospecto di biba pa semper.—Efesionan 5:15, 16.

Bida Eterno Ta Lógico?

Mes frustrante cu ta pa comprendé kico tempu realmente ta, pa hopi hende e idea di bida eterno, of biba pa semper, ta un misterio grandi. Kisas un motibu pa esaki ta cu semper nos experencia cu tempu tabata conectá cu e ciclo di nace, crece, bira bieu i muri. Di manera cu nos a cuminsá asociá pasamentu di tempu cu e proceso di bira bieu. Aparentemente pa hopi hende, cualkier otro punto di bista ta un violacion dje concepto di tempu. ‘Pakico hende mester ta un excepcion compará cu tur otro criatura bibiente pa loke ta e proceso di bira bieu?’ nan lo puntra.

Cu e forma di razoná aki, hopi bes hende ta pasa por haltu dje echo cu riba hopi tereno e ser humano ya caba ta un excepcion compará cu sobrá creacion. Por ehempel, bestia no tin e abilidadnan intelectual cu hende tin. Maske kico otro algun individuo ta pretendé, bestia no ta bira mas creativo cu loke nan instinto ta impulsá nan pa haci. Tampoco nan no tin don artístico ni e capacidad pa mustra amor i aprecio cu hende ta poseé. Si hende a haña asina tantu mas dje cualidad i abilidadnan aki cu ta haci bida significativo, pakico no por ta cu nan a haña tambe mas tempu ora ta trata di bida mes?

Di otro banda, no ta straño cu palu, cu no por pensa, ta biba den algun caso miles di aña, miéntras cu hende inteligente por biba como promedio 70 pa 80 aña so? No ta un contradiccion cu tortuga, cu no tin abilidad creativo ni artístico, por biba mas cu 200 aña, miéntras cu hende, dotá ricamente cu e abilidadnan aki, ta biba muchu ménos cu mitar di esei?

Aunke hende no por comprendé tempu i eternidad completamente, tog e promesa di bida eterno ta un speransa bon fundá den Bijbel. E término “bida eterno” ta aparecé casi 40 bes den dje. Pero si e propósito di Dios ta pa hende biba pa semper, pakico e no a cumpli ainda? Nos lo trata e pregunta aki den e siguiente artículo.