Pakico Asina Poco Tempu?

TEMPU. Kisas ta difícil pa nos definí e palabra exactamente, pero nos sa sí cu nunca nos no ta parce di tin suficiente tempu. Nos sa tambe cu e ta pasa bai lihé. Eigenlijk, hopi bes nos ta keha cu “tempu ta bula.”

Tog, ta bisto cu e poëta ingles Austin Dobson a yega mas cerca dje berdad ora el a bisa na 1877: “Bo di cu tempu ta bai? Ai no! Ai di nos, Tempu ta keda, ta nos ta bai.” Ya a pasa casi 80 aña desde cu Dobson a muri na 1921; i tempu a sigui.

Tempu na Abundancia

Bijbel ta bisa nos dje Creador di humanidad: “Promé cu e cerunan mes a nace, of cu abo a producí e tera i e tereno productivo manera cu dolor di parto, sí di tempu indefiní pa tempu indefiní bo ta Dios.” (Salmo 90:2) Of manera The New Jerusalem Bible ta traducié, “di eternidad pa eternidad bo ta Dios.” Pues tempu lo dura mes tantu tempu cu Dios mes ta dura, esta, pa semper!

Na contraste skerpi cu Dios, kende tin un eternidad di tempu na su disposicion, nos ta lesa di hende: “Pasobra tur nos dianan a yega na nan fin den bo furia; nos a caba nos añanan mescos cu un fluister. Riba nan mes e dianan di nos añanan ta setenta aña; i si debí na poder special nan ta ochenta aña, sin embargo nan insistencia ta den afan penoso i cosnan perhudicial; pasobra e tin cu pasa bai lihé, i nos ta bula bai.”—Salmo 90:9, 10.

Pakico bida ta asina corticu awe, siendo cu Bijbel ta siña bon cla cu Dios su propósito ta pa hende biba pa semper? (Génesis 1:27, 28; Salmo 37:29) Na lugá di un bida ilimitá manera tabata e propósito di Dios, pakico asta bou di e mihó condicionnan, hende ta biba como promedio, ménos cu 30.000 dia? Pakico hende tin asina poco tempu? Ken of kico ta responsabel pa e situacion lamentabel aki? Bijbel ta duna contesta cla i satisfactorio.a

Cada Bes Ménos Tempu

Hende di edad lo confirmá cu den décadanan recien aña ta pasa mas lihé. Un periodista, dr. Sybille Fritsch, a señalá cu aunke durante e último 200 añanan, un siman di trabou a baha di 80 ora bira 38 ora, “tog esaki no a stop nos di keha.” El a splica: “No tin tempu; tempu ta oro; ansha pa haña tempu ta manera ansha pa rosea; un bida agitá.”

Inventonan nobo a habri oportunidad i posibilidadnan cu e generacionnan anterior no a ni soña di dje. Pero mas posibilidad hende haña di participá den vários actividad, mas grandi ta nan frustracion ora tempu no yega pa haci tur. Awendia, den hopi parti di mundu, hende tin un bida druk, coriendo di un keaser pa otro. Tata tin cu sali bai traha 7:00 di mainta, Mama tin cu hiba yu scol 8:30 di mainta, Welo tin cita cu dokter 9:40, i nos tur mester ta cla pa un reunion importante 7:30 di anochi. Den e corementu pa alcansá un keaser tras di otro, no ta sobra muchu tempu pa relahá. I nos ta keha dje rutina di tur dia, dje cansancio.

No Ta Nos So Tin Tiki Tempu

Dios su Adversario, Satanas e Diabel, esun kende su intriga a corta hende su duracion di bida, awor a bira víctima di su mes maldad. (Compará cu Galationan 6:7, 8.) Papiando dje nacementu dje Reino Mesiánico den shelu, Revelacion 12:12 ta duna nos motibu pa speransa ora e bisa: “P’e motibu aki alegrá, shelu i boso cu ta biba den dje! Ai di tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.”

Segun cronologia bíblico confiabel i cumplimentu di profecia di Bijbel, awor aki nos ta biba na fin dje “periodo di tempu corticu” ei. Ki un goso pa sa cu pronto Satanas su tempu lo caba completamente! Una bes cu e ser kitá for di caminda, hende obediente lo ser restorá na perfeccion, i nan por haña e bida eterno cu tabata Jehova su propósito pa nan na cuminsamentu. (Revelacion 21:1-4) Falta di tempu lo no ta un problema mas.

Bo por imaginá bo kico lo nificá haña bida eterno, sí, biba pa semper? Hamas e cosnan cu bo no tabatin tempu di haci lo preocupá bo atrobe. Si bo tin mester di mas tempu, tin mañan, of otro siman, of otro aña—de facto, un inmenso eternidad tin bo dilanti!

Usa e Tempu cu Nos Tin Awor den un Manera Sabí

Realisando cu su tempu pa influenciá hende ta limitá, Satanas ta purba tene hende asina ocupá cu nan no tin tempu pa scucha e bon nobo dje Reino establecí di Dios. P’esei, nos ta haci bon di obedecé e conseho divino: “Vigilá cuidadosamente p’e manera cu boso ta cana no ta manera hende imprudente sino manera hende sabí, cumprando e tempu oportuno pa boso mes, pasobra e dianan ta malu. P’e motibu aki, stop di bira irazonabel, sino sigui percibí loke ta e boluntad di Jehova.”—Efesionan 5:15-17.

Ta ki vital pa den un manera sabí nos usa nos tempu p’e cosnan di mayor importancia en bes di dispidié cu actividadnan inútil cu no ta trece beneficio duradero! Nos mester cultivá e mésun actitud cu Moises tabatin ora el a haci peticion na Jehova cu e palabranan sincero aki: “Mustra nos exactamente con pa conta nos dianan di tal manera cu nos por trece un curason di sabiduria aden.”—Salmo 90:12.

Ta cierto cu den e mundu djawe tur hende ta ocupá. No obstante, Testigonan di Jehova ta urgi bo fuertemente pa dedicá algu di bo tempu precioso na siña tocante e rekisitonan di Dios pa gana bida eterno bou di mando di su Reino. Si bo dedicá un ora pa siman na studia Bijbel sistemáticamente, ‘percibiendo loke ta e boluntad di Jehova,’ esei lo por permití bo experenciá personalmente e cumplimentu dje palabranan aki: “Apartá di loke ta malu i haci loke ta bon, i biba asina te na tempu indefiní. E hustunan mes lo poseé e tera, i nan lo biba pa semper riba dje.”—Salmo 37:27, 29.

[Nota]