Pakico Tin Vandalismo?

“MI NO tin nada di bisa.” Nan a skirbi e palabranan aki na letter grandi riba un muraya recien di verf den un bario agradabel di São Paulo. Un acto di vandalismo, lo bo bisa. I skirbimentu riba muraya ta djis un tipo di vandalismo.

Imaginá bo cu vandalista iresponsabel daña bo auto nobo. Of bo ta ripará cu vandalistanan a daña of destruí propiedad público cu ta útil pa hopi hende. Pakico? Sí, pakico? Bo a yega di puntra bo mes pakico tin tantu vandalismo? Den hopi lugá, ta parce cu vandalistanan ta haña deleite den kibra of susha telefon público. Hopi bes transporte público, manera trein of bus, ta nan blanco. Aparentemente, e vandalistanan no tin cunes cu nada. Pero kico tin tras di gran parti dje vandalismo cu nos ta mira of sufri di dje?

Marco,a un hóben di Rio de Janeiro, a keda frustrá despues cu su tim a perde un wega di futbol, asina frustrá cu el a cuminsá tira un bus yen di fanático dje tim ganadó cu piedra. Of pensa riba Claus. Ora e no a haña bon punto na scol, el a rabia asina tantu cu el a tira piedra i kibra bentana. Sin embargo, e cos no tabata “pret” mas ora scol a pidi su tata paga e daño. Un otro hóben, Erwin, tabata bai scol i traha. Hende a mira e cu su pareunan como bon mucha. Sin embargo, nan pasatempu tabata consistí di cometé actonan di vandalismo den e bario. Erwin su mayornan no tabata sa nada di esei. Valter tabata un huérfano cu no tabatin otro opcion sino haci e cayanan di São Paulo su cas. Su mihó amigunan tabata un gèng di vandalista, i e tabata imitá nan den tur cos. El a siña arte marcial tambe. E ehempelnan aki ta mustra cu vandalismo tin diferente cara, i cu loke ta causa vandalismo i e emocionnan enbolbí, ta cada bes diferente.

“Vandalismo por ta un acto di vengansa of un manera di expresá un opinion político. Tin biaha tantu hóben como adulto ta cometé crímen djis pa ‘pret,’” segun The World Book Encyclopedia. Sin embargo, en bes di ta djis un cos pret di hóbennan, vandalismo por ta sumamente destructivo i asta mortífero. Un grupo di hóben kier a “pasa poco pret,” i ora nan a mira un homber drumí, nan a basha un líkido flamabel riba dje i cend’é na candela. E víctima, un indjan, a muri despues den hospital. Segun un informe, “supuestamente e hóbennan a bisa cu nan no a kere cu ningun hende lo wori ya cu vários limosnero a ser kimá riba caya sin cu a tuma ningun accion legal.” Sea vandalismo ta causa víctima of no, e costo financiero i emocional ta incalculabel. Pues, kico por controlá of pone fin na vandalismo?

Ken Por Stop Vandalismo?

Polis i scol por prevení vandalismo? Un problema ta cu kisas autoridadnan ta ocupá cu crímennan mas serio, manera traficacion di droga of casonan di asesinato, mas bien cu delitunan den cua no tin “víctima.” Segun un agente policial, ora un hóben haña su mes den problema, hopi bes e mayornan ta “culpa e muchanan cu e ta cana cuné, of e scol, of polis pasobra nan a gar’é.” Educacion i aplicacion di ley por reducí vandalismo; pero, kico si actitud di mayor no cambia? Un funcionario cu ta atendé cu hóbennan lagá den libertad condicional ta bisa: “Causa dje problema ta un bida laf i oportunidad. [E muchanan ta] keda te lat riba caya i nan no tin nada di haci. I probablemente no tin supervision riba nan, sino nan lo no ta riba caya.”

Aunke hopi caminda vandalismo ta un problema serio, tuma nota con cosnan por bai den otro direccion. E vandalistanan hóben mencioná na cuminsamentu a cambia; awor nan ta evitá conducta antisocial completamente. Kico a haci e ex-delincuentenan aki cambia nan estilo di bida? I, lo bo keda sorprendí si no solamente baha vandalismo, sino tambe caba cuné? Nos ta invitá bo pa lesa e siguiente artículo.

[Nota]