Por Caba cu Vandalismo
“SEMPER hende a considerá vandalismo di tiener un expresion di falta di respet i hostilidad pa cu adulto i nan normanan,” e autornan Jane Norman i Myron W. Harris ta splica. Aunke hopi hóben ta kere cu no por haci nada pa drecha e situacion, “un di cada 3 ta pensa cu por frena vandalismo di tiener si mayornan presta mas atencion na nan yunan, i si tienernan no tabata asina fadá,” e autornan ta informá. Aunke lo por reducí vandalismo dor di tene hóbennan ocupá i si mayornan tin mihó control riba nan, esei riba su mes ta yega n’e causanan básico?
Hopi hóben, ora nan ta nan so, no ta problemático. Tog, den grupo of na par, nan por purba hala atencion dor di haci malu of haci co’i kens. Esei tabata e caso cu Nelson, kende hopi bes, bou di influencia di droga of alcohol tabata expresá su rabia i malcontentu mediante actonan di vandalismo. José, impulsá dor di predicashinan den Iglesia Católico tocante reforma agrario i derecho laboral, a haña cu e tabatin cu participá den welga i vandalismo organisá como un medio di protesta. Sin embargo, tantu Nelson como José a haña algu muchu mas mihó cu disturbio of vandalismo.
Algun Causa Mas Profundo di Vandalismo
Laga nos examiná mas djacerca e motibu pakico algun hóben ta cometé vandalismo. Hopi adolesente ta confundí i ta “describí mundu como un lugá bruhá, loco, yen di hende loco.” Tog, contrario na loke algun hende ta kere, un informe a bisa: “Tienernan tá preocupá cu e curso di nan bida. Nan ta mas interesá cu loke adultonan ta kere.” Sea cu e ta conciente of no, un hóben enbolbí den vandalismo por ta expresando asina su frustracionnan profundo, su problemanan crónico of su necesidadnan cu no a ser satisfacé. Segun e estudio mencioná na cuminsamentu, “ni un di [esnan] entrevistá a defendé of hustificá vandalismo, ni sikiera esnan cu [a] participá den dje.”
Kisas masha poco bes un hóben ta tende un palabra di aprecio of di animacion. Siendo cu educacion ta birando mas i mas importante i mas trabou ta rekerí un grado haltu di conocimentu specialisá of abilidad técnico, e hóben por sintié intimidá. Ademas, mayornan, maestronan, of nan pareunan por ta masha crítico i exigente, i ta pone e énfasis riba loke e hóben ta logra i no riba loke e ta como persona. Hopi hóben ta rebelá of cometé vandalismo simplemente pasobra nan ta decepcioná cu nan mes. Amor i atencion dje mayornan lo no reducí tal angustia bastante?
Bo por a nota cu aunke cierto autoridadnan aparentemente a stop di purba controlá skirbimentu riba muraya i otro tipo di delincuencia, por lo general ciudadanonan preocupá ainda ta spera pa maestronan i personal di scol controlá vandalismo. Relacioná cu aplicacion di ley, The World Book Encyclopedia ta bisa: “Vandalismo ta castigabel cu boet of encarcelacion. Algun gobiernu local tin ley cu ta tene mayornan responsabel pa vandalismo cu nan yunan cometé. Pero mayoria acto di vandalismo no ta ser castigá. Aplicacion di ley ta difícil den casonan asina, i e costo di mayoria acto individual di daño no ta suficiente grandi pa hustificá accion legal.” Un informe a mustra cu 3 porciento so di violadónan di ley a yega di ser gará.
Probablemente lo bo ta di acuerdo cu ser un bon mayor por ta e mihó manera pa atacá un dje causanan básico di delincuencia. Pero ora bida di famia ta deteriorá, comunidad ta sufri. Profesora Ana Luisa Vieira de Mattos, di Universidad di São Paulo, Brazil, ta bisa cu algun dje motibunan pa problemanan bou di hóbennan ta “supervision swak di parti di mayornan, falta di regla, falta di comunicacion, negligencia, indiferencia of apatia.”
Den nos tempu nos a mira sigur un cumplimentu di Jesus su palabranan: “Debí na e aumento di maldad, e amor di mayoria lo fria.” (Mateo 24:12) I ken lo nenga cu e palabranan skirbí na 2 Timoteo 3:1-4 ta resultando berdad? Apostel Pablo a skirbi: “Sabi esaki, cu den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecidu, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios.” E solo echo cu nos ta biba entre hende cu tin e característicanan ei ta contribuí na delincuencia. Pero no tin motibu pa entregá. Comunidadnan en general no a logra caba cu vandalismo, pero nos por haña hende cu a logra cambia nan mes estilo di bida. Ya nan no tin mal manera ni no ta descabeyá mas. Nan a stop cu vandalismo.
Guia Sano pa Hóbennan
Kico a yuda vandalista i otro hendenan cambia nan personalidad? Aunke por parce increibel pa algun educadó i mayor, Bijbel ta duna guia excelente i oportuno. Dor di siguié, ex-vandalistanan a ser impulsá pa obedecé e ley specífico aki di Dios: “Bo no mag sigui tras dje multitud pa finnan malbado.” (Exodo 23:2) E berdad dje Palabra di Dios tocante cierto creencia i doctrina cu nunca promé nan no a comprendé, a atraé hopi hende, i loke nan a siña tabatin bon efecto riba nan. Considerá e experencia di José, un hóben na São Paulo. El a lanta ta kere den uso di imágen den adoracion. Ora el a siña cu Dios tin un nomber, Jehova, i cu E no ta aprobá adoracion di imágen, José a haci cambionan p’e por a haci loke ta bon den bista di Dios.—Exodo 20:4, 5; Salmo 83:18; 1 Juan 5:21; Revelacion 4:11.
Nelson, en bes di tin un experencia frustrante tras di otro den gèng i atakenan violento, a haña un berdadero speransa pa futuro, i esei a dun’é un alivio tremendo. E ta bisa: “Mi famia no ta rechasá mi mas pa motibu cu mi ta den mal compania i ta un drogadicto; awor ami ta esun mas respetá na cas. Hopi bes mi tata sa pidi mi pa consehá mi rumannan mas grandi. For di tempu cu mi a cuminsá studia Bijbel cu Testigonan di Jehova, mi a conocé kico ta goso, pasobra awor bida tin un propósito.” I pa un hóben di stad manera Marco, cu a custumbrá biba den un ambiente violento, siña cu e Reino di Dios lo haci e tera un paradijs a ègt toca su curason.—Revelacion 21:3, 4.
Tuma tambe e caso di un ex-miembro di gèng, bringadó di caya i vandalista. Siendo un huérfano cu un infancia masha tristu, Valter a keda impresioná cu meimei di un sistema corupto i malbado, Dios tin un pueblo. Nan ta haci esfuerso sincero pa aplicá principionan di Bijbel den nan bida, mustrando compasion, consideracion i bondad. Valter ta splica: “Manera Jesus a primintí, awor mi tin un famia grandísimo, ‘ruman homber i ruman muher i mama cu tata.’ Pa loke ta futuro, mi ta anhelá e tempu ora hende lo biba den felicidad i unidad bou dje gobiernu hustu di Dios.”—Marco 10:29, 30; Salmo 37:10, 11, 29.
Algu Mihó cu Protesta
Ademas di mustra consideracion i amor na nan próhimo, e ex-vandalistanan aki a siña “odia loke ta malu.” (Salmo 97:10; Mateo 7:12) Kico di abo? Asta si bo ta djis un persona cu ta sufri dje efectonan di vandalismo cu tin na tur parti, un estudio dje Palabra di Dios lo haci Jehova real pa bo, como un Tata celestial amoroso cu ta interesá den bo. (1 Pedro 5:6, 7) Dios por yuda bo crece spiritualmente, apesar di debilidad personal of pobresa. Esei riba su mes ta un experencia maraviyoso!
Jehova i su Yu, Jesucristo, ta ègt deseá pa tur sorto di hende haña e oportunidad pa siña e berdad di Bijbel. For di awor caba e Palabra di Dios por haci mas cu yuda individuonan stop di cometé vandalismo. E por motivá nan pa haci mas progreso den aplicá principionan divino. Como resultado, nan ta bira miembro di un hermandad internacional conocí pa su limpiesa i bon manera, e congregacion mundial di Testigonan di Jehova. Na armonia cu Efesionan 4:24, e cristiannan sincero aki a “bisti e personalidad nobo cu a ser creá segun e boluntad di Dios den berdadero husticia i lealtad.” Pronto mundu lo ta yen di hende asina, pasobra esakinan ta e úniconan cu lo sobrebibí i biba pa semper.—Compará cu Lucas 23:43.
Un Mundu Nobo sin Vandalismo Ta Posibel
Bo ta kere cu realmente ta posibel pa caba cu vandalismo? Si ta asina, con un cambio trasedental asina lo ser realisá? Pronto e Reino di Dios lo eliminá e sistema malbado aki. Lo tene esnan cu ta habitá e tera responsabel pa cualkier violacion deliberá dje leynan hustu di Dios. (Compará cu Isaías 24:5, 6.) Aunke “transgresornan mes sigur lo ser anikilá huntu,” esnan cu ta stima husticia lo ser librá. “Jehova lo yuda nan i percurá escape pa nan. Lo e percurá escape pa nan for dje malbadonan i lo salba nan, pasobra nan a tuma refugio den dje.”—Salmo 37:38-40.
Cu tur siguransa, lo eliminá e raisnan di vandalismo completamente. I asina tambe lo haci cu tur crímen, opresion, sufrimentu i maldad. Na lugá di eseinan, pas, berdadero husticia, trankilidad i siguridad lo caracterisá bida den e mundu nobo. Isaías 32:18 ta describí loke lo bira realidad den un manera literal: “Mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.” Sí, un paradijs mundial bunita lo ta habitá pa hende cu ta mustra amor i consideracion pa cu otro.
Huntu cu miyones di otro hende, ex-vandalistanan ya caba ta disfrutá di un relacion íntimo cu Jehova Dios. Nan no ta enbolbí mas den actonan di vandalismo. Abo tambe lo laga e Palabra di Dios guia bo na bida den su mundu nobo? Pakico no imitá e salmista di antigwedad cu a skirbi Jehova su declaracion: “Lo mi haci pa bo tin perspicacia i instruí bo den e caminda cu bo mester bai. Lo mi duna conseho cu mi wowo riba bo.”—Salmo 32:8.
[Plachi na página 7]
Atencion i amor di parti di mayornan ta protehá hóbennan