Pakico Kere den Jesucristo?

“ASTA hopi hende cu no ta cristian ta kere cu E tabata un maestro grandi i sabí. Sigur-sigur e tabata un dje hombernan di mas influencia cu a yega di biba.” (The World Book Encyclopedia) Ken “E” ta? Jesucristo, fundadó di cristianismo.

Pero, apesar di loke e enciclopedia ta bisa, pa cientos di miyones di hende di Oriente i di otro lugá, Jesucristo ta desconocí, djis un nomber cu kisas nan ta corda for di buki di scol. Asta den iglesianan di cristiandad, tin teólogo i miembro di clero cu ta bisa cu nos realmente no conocé Jesus, i nan ta lanta duda tocante e autenticidad dje cuater relatonan existente di su bida (e Evangelionan) hañá den Bijbel.

E escritornan di Evangelio lo por a inventá e historia di bida di Jesus? Di ningun manera! Despues cu e historiadó bon conocí, Will Durant, a analisá e relatonan di Evangelio, el a skirbi: “Pa algun hende simpel den un solo generacion inventá un personalidad asina poderoso i atractivo, cu principio asina elevá i cu un vision asina inspirador di hermandad humano, lo ta un milager hopi mas increibel cu cualkier milager mencioná den e Evangelionan. Despues di dos siglo di crítica textual di Bijbel, e cuadro general dje bida, personalidad i siñansa di Cristo, ta keda razonablemente claro i ta forma e rasgo mas fasinante den e historia di hende di West.”

Tog, tin hende ta haña cu Jesucristo no ta digno di nan atencion pa motibu di loke su supuesto siguidónan a haci. ‘Nan a tira atombom riba Nagasaki,’ algun hapones lo bisa. ‘I Nagasaki tabatin mas cristian cu mayoria stad na Hapon.’ Pero bo por culpa un dokter pa e enfermedad di un pashent si e pashent no sigui instruccion dje dokter? Pa hopi tempu, mayoria hende cu ta pretendé di ta cristian a ignorá Jesus su recept pa vence e enfermedadnan di humanidad. Pero, Jesus a duna e remedi pa nos problemanan di tur dia i tambe p’e sufrimentu di humanidad rond mundu. P’e motibu ei nos ta invitá bo pa lesa e siguiente artículo i mira pa bo mes ki clase di hende e tabata.