Ta Diabel Ta Duna Nos Malesa?

MALESA NO MESTER A EXISTI NUNCA. Dios a crea nos pa biba pa semper den salú perfecto. Ta un criatura spiritual, Satanas, a trece enfermedad, dolor i morto riba e famia humano ora el a haci nos promé mayornan, Adam cu Eva, peca.—GENESIS 3:1-5, 17-19; ROMANONAN 5:12.

ESEI kier men cu tur malesa ta e resultado directo di algu cu un persona den mundu di spiritu ta haci? Manera e artículo anterior a mencioná, hopi hende ta pensa asina. Wela di Owmadji ta un di nan. Pero, ta berdad cu e diarea di Owmadji, un enfermedad cu tin bes por ta fatal pa mucha chikitu den zonanan tropical, a bini dor di spiritu invisibel?

E Rol di Satanas

Bijbel ta contestá e pregunta aki bon cla. Na promé lugá, e ta mustra cu spiritu di nos antepasadonan no por afectá hende bibu. Ora hende muri, “nan no ta conciente di nada en absoluto.” Nan no tin un spiritu cu ta sigui biba despues cu nan muri. Nan ta drumí den graf, caminda “no tin trabou ni formacion di proyecto ni conocimentu ni sabiduria.” (Eclesiástes 9:5, 10) Di ningun manera mortonan no por duna hende bibu malesa!

Pero Bijbel ta revelá cu mal spiritu ta existí sí. E promé rebelde den henter universo tabata e criatura spiritual conocí awor como Satanas. Otro spiritunan a uni cuné, i nan a haña e nomber ‘demoño.’ Satanas i e demoñonan por causa malesa? Esei a yega di sosodé. Algun dje curacionnan milagroso cu Jesus a haci, a encerá sacamentu di demoño for dje persona enfermo. (Lucas 9:37-43; 13:10-16) Sin embargo, mayoria dje curacionnan cu Jesus a haci, a enbolbé malesanan cu no tabata causá directamente dor di demoño. (Mateo 12:15; 14:14; 19:2) Awe tambe, por lo general, malesanan ta bini di causanan natural, no sobrenatural.

Kico di bruha? Proverbionan 18:10 ta sigurá nos: “E nomber di Jehova ta un toren fuerte. Den dje e hustu ta core drenta i ta ser duná proteccion.” Santiago 4:7 ta bisa: “Oponé e Diabel, i lo e hui di boso.” Sí, Dios por protehá su sirbidónan fiel for di bruha i tur otro poder oculto. Esei ta un dje cosnan cu e palabranan aki di Jesus ta implicá: “E berdad lo haci boso liber.”—Juan 8:32.

Algun hende lo por puntra: ‘Kico di Job? No ta un mal spiritu a dun’é malesa?’ Sí, Bijbel ta bisa cu ta Satanas a causa Job su malesa. Pero e caso di Job tabata un excepcion. Pa basta tempu Job tabatin Dios su proteccion contra atake directo di demoño. Pero e ora ei Satanas a reta Jehova pa atacá Job, i dor cu tabatin cuestionnan di hopi peso den wega, Jehova a kita su proteccion parcialmente for di su adoradó den e caso specífico aki.

Pero Dios a pone límite. Ora el a permití Satanas afligí Job, Satanas tabatin mag di kita Job su salú temporalmente, pero e no tabatin mag di mat’é. (Job 2:5, 6) Cu tempu, Job su sufrimentu a caba, anto Jehova a recompens’é abundantemente pa su integridad. (Job 42:10-17) Entre tantu, e principionan cu Job a proba cu su integridad ta registrá pa hopi tempu caba den Bijbel, i nan ta bisto pa tur hende. No tin mester di un otro experimento manera esun ei.

Con Satanas Ta Traha?

Casi den tur caso, e único relacion cu tin entre Satanas i enfermedad di hende, ta e echo cu ta Satanas a tenta e promé pareha humano pa nan cai den picá. No ta e cu su demoñonan ta causa delaster un malesa. Pero Satanas ta masha capas sí di purba influenciá nos pa tuma decisionnan bobo cu por comprometé nos fe. I esei lo por hiba na problema di salú. E no a haci bruha pa Adam cu Eva, ni e no a asesiná nan, ni dal nan cu un enfermedad. El a persuadí Eva pa desobedecé Dios, i Adam a sigui Eva den su curso di desobedencia. Enfermedad i morto tabata un parti dje consecuencia.—Romanonan 5:19.

Na un ocasion, tempu cu e nacion di Israel tabata kampeer menasantemente cerca dje frontera di Moab, e rey di Moab a contratá Balam, un profeta infiel, p’e maldicioná nan. Balam a purba maldicioná Israel, pero el a faya, pasobra e nacion tabata bou di Jehova su proteccion. Despues e moabitanan a purba seducí Israel pa cometé idolatria i inmoralidad sexual. Nan táctica tabatin éxito, i Israel a perde Jehova su proteccion.—Númeronan 22:5, 6, 12, 35; 24:10; 25:1-9; Revelacion 2:14.

E suceso antiguo aki ta siña nos un les importante. Adoradónan fiel di Dios tin yudansa divino pa protehá nan contra atake directo di mal spiritu. Sin embargo, Satanas por purba haci un hende comprometé su fe. E por purba seducié p’e cometé inmoralidad. Of e por purba spant’é manera un leon cu ta grita, p’e actua na un manera cu ta pon’é perde Dios su proteccion. (1 Pedro 5:8) P’esei apostel Pablo ta yama Satanas “esun cu tin e medio pa causa morto.”—Hebreonan 2:14.

Owmadji su wela a purba persuadí Hawa pa usa diferente tipo di amuleto pa proteh’é contra enfermedad. Kico lo a sosodé si Hawa a bai di acuerdo? Lo a bira bisto cu e no tabatin un confiansa completo den Jehova Dios, i lo e no por a confia riba su proteccion mas.—Exodo 20:5; Mateo 4:10; 1 Corintionan 10:21.

Satanas a purba usa persuasion cerca Job tambe. No tabata basta cu el a kita su famia, su rikesa i su salú for di dje. Ademas, Job a haña masha mal conseho cerca su casá. El a bisa Job: “Plega Dios i muri!” (Job 2:9) Despues, tres “amigu” a bishit’é, i huntu nan a purba convencé Job cu su malesa a bini dor di su mes falta. (Job 19:1-3) Asina, Satanas a probechá di Job su situacion débil pa purba desanim’é, i swak su confiansa den Jehova su husticia. Tog Job a keda tene na Jehova como su único speransa.—Compará cu Salmo 55:22.

Nos tambe lo por bira deprimí ora nos ta malu. Den un situacion asina, Satanas ta cla pa purba pone nos actua di un manera cu lo pone nos fe na peliger. P’esei, ora nos enfrentá malesa, ta importante pa nos keda corda cu probablemente, e berdadero causa di nos sufrimentu ta e imperfeccion cu nos a heredá, no un influencia oculto. Corda, Isaac e homber fiel, a bira ciegu hopi aña promé cu su morto. (Génesis 27:1) E causa tabata su edad haltu; no mal spiritu. Raquel a muri ora di duna lus, i no dor di Satanas, sino dor di debilidad humano. (Génesis 35:17-19) Cu tempu, tur e hendenan fiel di pasado a muri, no como resultado di bruha ni maldicion, sino dor dje imperfeccion cu nan a heredá.

Si nos pensa cu spiritu invisibel tin di haber directamente cu delaster un malesa cu bini riba nos, esei por ta un trampa. E por pone nos biba cu miedu di spiritu. Anto ora nos bira malu, nos lo por sinti nos tentá pa purba calma e demoñonan na lugá di keda leu for di nan. Si Satanas logra spanta nos pa nos recurí na práctica di spiritismo, nos lo ta traicionando Jehova, e Dios berdadero. (2 Corintionan 6:15) Ta un temor respetuoso di Dios mester guia nos, no un miedu supersticioso di su Adversario.—Revelacion 14:7.

Ya Owmadji tin e mihó proteccion posibel contra mal spiritu. Segun apostel Pablo, Dios ta considerá cu e ta “santu,” dor cu su mama ta un creyente. E mama por pidi Dios den oracion p’E compañá su yu muher cu Su spiritu santu. (1 Corintionan 7:14) Tal conocimentu exacto tabata un bendicion pa Hawa. Dor di esei, e tabata sa di busca bon tratamentu médico pa Owmadji, na lugá di confia den amuleto.

Vários Causa di Malesa

Mayoria hende no ta kere den spiritu. Ora nan bira malu, si nan tin cen nan ta bai dokter. Claro, un hende por bai dokter i tog keda sin cura. Dokter no por haci milager. Pero hopi hende supersticioso cu lo por a cura, ta bai dokter ora ta lat caba. Nan ta purba e métodonan basá riba supersticion promé, anto ora eseinan keda sin duna resultado, nan ta bai dokter como e último recurso. Hopi di nan ta muri sin tin nodi.

Otro hende ta muri un morto prematuro pa motibu di ignorancia. Nan no ta reconocé nan síntomanan, i nan no sa cua pasonan práctico nan mester dal pa evitá di bira malu. Conocimentu ta evitá nos di sufri innecesariamente. Ta remarcabel cu mamanan cu por lesa tin ménos yu ta muri, cu mamanan cu no por lesa. Sí, ignorancia por ta fatal.

Negligencia ta un otro causa di malesa. Por ehempel, hopi hende ta bira malu dor cu nan ta laga insecto cana riba cuminda i despues ta com’é, of dor cu esnan cu ta prepará e cuminda no ta laba man promé. Drumi sin un muskitero den regionnan caminda tin malaria, tambe ta peligroso.a Den asuntunan di salú, hopi bes ta berdad cu “prevení ta mihó cu lamentá.”

Un estilo di bida imprudente a pone hopi miyones di hende bira malu i muri prematuramente. Buracheria, inmoralidad sexual, maluso di droga i uso di tabaco a daña hopi hende su salú. Si un hende ta entregá na e bicionan aki, anto e bira malu, ta bruha un hende a haci p’e? Of, lo ta un mal spiritu a atak’é? No. Ta pa su mes falta e ta malu. Si un hende asina tira falta riba spiritu, ta hui e ta hui di su responsabilidad pa e estilo di bida imprudente cu el a hiba.

Naturalmente, tin cos cu no ta den nos man. Por ehempel, nos lo por drenta den contacto cu microbio cu ta causa malesa, of cu contaminacion. Ta esei a pasa cu Owmadji. Su mama no tabata sa kico a dun’é diarea. Su yunan no sa bira malu mes tantu cu otro muchanan, pasobra e ta tene su cas i su curá limpi, i semper e ta laba man promé cu e prepará cuminda. Pero tur mucha ta bira malu de bes en cuando. Tin rond di 25 diferente infeccion orgánico cu por causa diarea. Casi sigur, nunca nos lo no haña sa ta cua di nan a causa e malesa di Owmadji.

E Solucion Duradero

Enfermedad no ta Dios su falta. “Cu cos malu no por pone Dios na prueba ni e mes no ta pone ningun hende na prueba.” (Santiago 1:13) Si un di su adoradónan bira malu, Jehova ta dun’é apoyo spiritual. “Jehova mes lo sosten’é riba un cama di enfermedad; sigur lo bo cambia henter su cama durante su enfermedad.” (Salmo 41:3) Sí, Dios ta compasivo. E kier yuda nos, no haci nos daño.

De echo, Jehova tin un solucion duradero pa malesa—e morto i resureccion di Jesus. Pa medio dje sacrificio di rescate di Jesus, hende cu e actitud corecto di curason ta ser cumprá for di nan estado pecaminoso, i un dia nan lo tin salú perfecto i bida eterno den e paradijs cu tera lo bira. (Mateo 5:5; Juan 3:16) E milagernan di Jesus tabata un muestra dje berdadero curacion cu e Reino di Dios lo trece. Ademas, Dios lo kita Satanas i su demoñonan. (Romanonan 16:20) Sí, Jehova tin cosnan maraviyoso wardá pa esnan cu ehercé fe den dje. Nos mester djis tene pacenshi i mustra awante.

Miéntras tantu, Dios ta duna nos sabiduria práctico i guia spiritual pa medio di Bijbel i e hermandad mundial di adoradónan fiel. E ta siña nos con pa evitá e bicionan cu ta causa problema di salú, i e ta duna nos amigunan berdadero cu lo yuda nos ora problema presentá.

Pensa riba Job atrobe. E pió cos cu Job lo por a haci ta di bai cerca un curandero! Lo el a perde Dios su proteccion, i keda sin haña tur e bendicionnan cu tabata sper’é despues di su prueba. Dios no a lubidá riba Job, i lo e no lubidá riba nos. “Boso a tende dje awante di Job i a mira e resultado cu Jehova a duna,” manera e disipel Santiago a bisa. (Santiago 5:11) Si nos no entregá nunca, nos tambe lo ricibí bendicionnan maraviyoso na Dios su debido tempu.

Kico a para dje chikitin, Owmadji? Su mama a corda riba un artículo cu a sali den Spierta!, e revista compañero di E Toren di Vigilancia, tocante terapia di rehidratacion oral.b El a prepará algu di bebe pa Owmadji segun e instruccionnan dje artículo. Awor e mucha muher aki ta bon-bon di salú.

[Nota]

[Plachinan na página 7]

Jehova a percurá un solucion permanente p’e problema di malesa