Pakico Cumpli cu Bo Promesanan?

“VOTA p’e hende cu ta primintí ménos; lo e desapuntá bo ménos,” segun e awor defuntu consehero presidencial, Bernard Baruch. Den e mundu djawe ta parce cu hende ta haci promesa pa keda sin cumpli cu nan. Por ta voto matrimonial, acuerdo comercial, of promesa pa dedicá mas tempu n’e yunan. Tur caminda hende a lubidá e dicho conocí cu “primintí ta debe.”

Claro cu hopi hende ta haci promesa sin intencion mes di cumpli cu nan. Otronan ta duna nan palabra sin pensa promé i despues nan no por cumpli cuné, of ta hala atras djis pasobra esaki ta resultá di ta e curso mas fácil pa sigui.

En berdad por ta difícil pa cumpli cu un promesa ora circunstancianan imprevisto presentá. Pero keda sin cumpli ta causa ègt hopi daño? Bo mester tuma bo promesanan na serio? Un consideracion breve di Jehova Dios su ehempel lo yuda nos mira pakico nos mester pensa seriamente riba e asuntu aki.

Jehova Ta Cumpli cu Su Promesanan

Nos ta adorá un Dios kende su nomber mes ta estrechamente ligá cu e cumplimentu di su promesanan. Den tempu bíblico hopi bes un nomber tabata bisa algu dje persona. Esaki ta e caso cu e nomber Jehova tambe, cu ta nificá “E Ta Causa pa Yega di Ser.” Pues e nomber divino ta encerá e idea cu Dios lo cumpli cu su promesanan i efectuá su propósitonan.

Di acuerdo cu su nomber, Jehova a cumpli cu tur promesa cu el a haci n’e antiguo nacion di Israel. Relacioná cu e promesanan aki, rey Sálomon a reconocé: “Bendicioná sea Jehova, cu a duna un lugá di descanso na su pueblo Israel di acuerdo cu tur loke el a primintí. Ni un solo palabra di tur su bon promesa cu el a primintí pa medio di Moises su sirbidó, a faya.”—1 Reynan 8:56.

Jehova ta asina digno di confiansa cu apostel Pablo por a razoná: “Ora Dios a haci su promesa na Abraham, siendo cu e no por a hura pa ningun mas grandi, el a hura pa su mes.” (Hebreonan 6:13) Sí, e nomber i persona di Jehova mes ta un garantia cu lo e no kibra su promesanan, ni maske cuantu ta cost’é. (Romanonan 8:32) E echo cu Jehova ta cumpli cu su promesanan ta duna nos un speransa cu ta manera un anker pa nos alma, esta, nos bida.—Hebreonan 6:19.

Jehova Su Promesanan i Nos Futuro

Nos speransa, nos fe i nos bida mes, tur ta dependé riba e cumplimentu di Jehova su promesanan. Ki speransa nos ta carga? “Tin shelu nobo i un tera nobo cu nos ta spera segun [Dios] su promesa, i den esakinan husticia lo tin cu biba.” (2 Pedro 3:13) Tambe e Scritura ta duna nos base pa tene fe cu “lo bai tin un resureccion di tantu e hustunan como e inhustunan.” (Echonan 24:15) I nos por ta sigur cu tin algu mas cu e bida actual aki. Sí, loke apostel Juan ta yama “e cos primintí” en realidad ta “e bida eterno.” (1 Juan 2:25) Pero e promesanan di Jehova den su Palabra no ta limitá na futuro. Nan ta duna nificacion na nos bida di tur dia for di awor aki.

E salmista a canta: “Jehova ta cerca tur hende cu ta inbok’é, . . . i lo e tende nan sclamacion pa yudansa.” (Salmo 145:18, 19) Tambe Dios ta sigurá nos cu “e ta dunando poder na esun cansá; i esun sin energia dinámico e ta haci abundá den pleno potencia.” (Isaías 40:29) I ta ki un consuelo pa sa cu ‘Dios lo no laga nos ser tentá mas ayá di loke nos por soportá, sino cu huntu cu e tentacion lo e percurá tambe p’e salida’! (1 Corintionan 10:13) Si nos a experenciá e cumplimentu di cualkier un dje promesanan aki personalmente, nos sa cu nos por tin pleno confiansa den Jehova. En bista dje beneficionan cu nos ta saca for dje hopi promesanan cu Dios ta haci i cumpli cuné, con nos mester mira nos promesanan na dje?

Cumpliendo cu Nos Promesanan na Dios

Sin duda, nos dedicacion na Dios ta e promesa mas importante cu nos por haci. Dor di dal e paso aki, nos ta demostrá cu nos kier sirbi Jehova pa semper. Aunke Dios su mandamentunan no ta pisá, dor cu nos ta biba den e mal sistema di cosnan aki, kisas no ta semper fácil pa haci su boluntad. (2 Timoteo 3:12; 1 Juan 5:3) Pero una bes cu nos a ‘pone man na ploeg’ i a bira sirbidó dedicá di Jehova i disipel di su Yu, Jesucristo, hamas nos mester wak patras n’e cosnan di mundu cu nos a laga atras.—Lucas 9:62.

Ora nos ta haci oracion na Jehova, nos por sinti nos impulsá pa primintié cu nos lo lucha pa vence un debilidad, cultivá un cierto cualidad cristian, of aumentá algun aspecto di nos actividad teocrático. Kico lo yuda nos cumpli cu e promesanan aki?—Compará cu Eclesiástes 5:2-5.

Promesanan sincero ta sali for di curason i mente. P’esei, laga nos pega na nos promesanan na Jehova dor di habri nos curason na dje den oracion, expresando nos temor, deseo i debilidadnan francamente. Ora nos ta haci oracion tocante un promesa, esei lo fortalecé nos determinacion pa cumpli cuné. Nos por mira nos promesanan na Dios manera debe. Ora e debenan ta grandi, nos tin cu paga nan gradualmente. Mescos tambe, hopi promesa cu nos ta haci na Jehova lo tuma tempu pa cumpli cu nan. Pero dor di dun’é loke nos por regularmente, nos ta mustra cu nos ta men loke nos ta bisa, i lo e bendicioná nos di acuerdo cu esei.

Nos por demostrá cu nos ta tuma nos promesanan na serio dor di haci oracion tocante nan cu frecuencia, tal bes tur dia. Esaki lo mustra nos Tata celestial cu nos ta sincero. Esei lo sirbi tambe como un recordatorio regular. David a laga un bon ehempel pa nos den esaki. Den cantica, el a suplicá Jehova: “Tende, sí, o Dios, mi sclamacion di ruego. Presta atencion, sí, na mi oracion. . . . Lo mi alabá bo nomber cu melodia pa semper, pa mi por paga mi votonan dia tras dia.”—Salmo 61:1, 8.

Cumpli cu Nos Promesanan Ta Edificá Confiansa

Mescos cu nos no mag tuma promesanan hací na Dios como algu leve, nos no mag tuma esnan hací na compañeronan cristian tampoco como algu leve. Nos no mester trata Jehova un manera i nos rumannan un otro manera. (Compará cu 1 Juan 4:20.) Den su Sermon Riba Ceru, Jesus a bisa: “Simplemente laga boso palabra Sí nificá Sí, boso No, no.” (Mateo 5:37) Un manera pa ‘obra loke ta bon pa cu esnan relacioná cu nos den fe’ ta di haci sigur cu nos palabra ta semper confiabel. (Galationan 6:10) Cada promesa cu nos cumpli cuné ta edificá confiansa.

Hopi bes, e daño causá dor di keda sin cumpli ta bira mas grandi ora ta trata di placa. Sea ta pa paga un fiansa bek, duna un servicio of cumpli cu un acuerdo comercial, un cristian mester ten’é na su palabra. Esaki ta agradá Dios i ta fortalecé e confiansa mutuo cu ta asina esencial pa rumannan “biba huntu den unidad.”—Salmo 133:1.

Sin embargo, keda sin cumpli cu acuerdo por causa daño n’e congregacion i tambe n’e individuonan cu ta directamente enbolbí. Un superintendente biahero ta comentá: “Hopi bes desacuerdonan comercial—cu ta bini casi semper ora un partido pensa cu e otro partido no a cumpli cu su parti—ta bira conocimentu público. Como resultado, rumannan ta tuma parti pa otro, i e ambiente den e Salon di Reino por bira tenso.” P’esei ta masha importante pa considerá cuidadosamente cualkier acuerdo cu nos cera i pone e asuntu riba papel!a

Tambe nos mester ehercé cautela ora di bende producto costoso, of ora di recomendá cierto inversionnan, foral si personalmente nos ta saca ganashi for dje transaccion. Mescos tambe, ta necesario pa tene masha cuidou pa no exagerá e beneficionan di cierto artículo of productonan di salú of pa primintí dividendo irealístico riba inversionnan. Amor mester impulsá cristiannan pa splica cabalmente cualkier rísico enbolbí. (Romanonan 12:10) Ya cu mayoria ruman no tin muchu experencia den negoshi, nan por confia nos conseho djis pasobra nos ta relacioná cu nan den fe. Lo ta masha lamentabel si nos pone nan perde e confiansa aki!

Como cristian, nos no por adoptá prácticanan di negoshi cu ta desonesto of cu ta ignorá e interesnan legítimo di otronan. (Efesionan 2:2, 3; Hebreonan 13:18) Pa haña e fabor di Jehova como ‘huésped den su tent,’ nos mester ta digno di confiansa. ‘Asta si nos a hura loke ta malu pa nos, nos no ta cambi’é.’—Salmo 15:1, 4.

Hues Jefte di Israel a haci un voto cu si Dios dun’é victoria riba e amonitanan, lo e duna Jehova e promé persona cu sali pa top’é despues cu e regresá for di bataya, como un ofrenda kimá. E persona ei a resultá di ta Jefte su único yu, pero e no a hala su palabra atras. Cu e consentimentu sincero di su yu muher, Jefte a ofrec’é pa servicio permanente n’e santuario di Dios, un sacrificio cu sin duda tabata doloroso i costoso den vários sentido.—Huesnan 11:30-40.

Foral superintendentenan di congregacion tin un responsabilidad di tene nan na nan acuerdonan. Segun 1 Timoteo 3:2, un superintendente mester ta “ireprensibel.” Esaki ta e traduccion di un término griego cu ta nificá “incapas pa pone man riba dje, ireprochabel, fuera di reproche.” E ta “implicá no solamente cu e homber tin un bon reputacion, sino cu e ta merecé esei tambe.” (A Linguistic Key to the Greek New Testament) Siendo cu un superintendente mester ta ireprensibel, semper su promesanan mester ta confiabel.

Otro Maneranan pa Cumpli cu Nos Promesanan

Con nos mester mira promesanan cu nos ta haci na esnan cu no ta nos compañeronan cristian? Jesus a bisa: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.” (Mateo 5:16) Dor di duna prueba cu nos ta para tras di nos palabra, nos por atraé otronan na nos mensahe cristian. Apesar dje deterioro mundial den normanan di onrades, ainda mayoria hende ta duna balor na integridad. Un manera pa desplegá amor pa Dios i pa próhimo i pa atraé stimadónan di husticia, ta di cumpli cu nos promesanan.—Mateo 22:36-39; Romanonan 15:2.

Durante nan aña di sirbishi di 1998, Testigonan di Jehova a dedicá mas cu mil miyon ora declarando e bon nobo dje Reino di Dios públicamente. (Mateo 24:14) Si nos no a cumpli cu nos palabra den trato di negoshi of den otro asuntunan, parti dje predicacion aki lo tabata en bano. Ya cu nos ta representá e Dios dje berdad, hende tin rason di spera pa nos actua onradamente. Dor di ser digno di confiansa i onrado, nos ta “dorna e siñansa di nos Salbador, Dios, den tur cos.”—Tito 2:10.

Den nos ministerio, nos tin oportunidad pa cumpli cu nos palabra ora nos bolbe bek pa bishitá esnan cu expresá interes den e mensahe di Reino. Si nos bisa cu nos lo bini bek, nos mester haci esei tambe. Ora nos bolbe bek manera nos a primintí, lo e ta un manera pa ‘no retené loke ta bon for di esnan na ken nos ta deb’é.’ (Proverbionan 3:27) Un ruman muher a splica e asuntu asina aki: “Na vários ocasion, mi a topa individuonan interesá cu a bisa cu un Testigo a primintí di pasa bek pero cu e no a haci esei. Claro cu mi sa cu kisas e doñonan di cas no tabata na cas of cu circunstancianan por a haci imposibel pa bolbe bek. Pero ami lo no kier pa ningun hende bisa esei di mi. P’esei mi ta haci mi máximo esfuerso pa haña e persona na cas atrobe. Mi ta kere cu si mi desapuntá un hende, esei lo reflehá malu riba Jehova i mi rumannan como totalidad.”

Den algun caso, kisas nos no ta sinti nos incliná pa regresá pasobra nos ta concluí cu e persona no ta muchu interesá. E mésun ruman muher ta splica: “Ami no ta purba husga e grado di interes. Experencia a siña mi cu hopi bes e promé impresion ta robes. P’esei mi ta purba ser positivo i mira cada persona como un potencial ruman.”

Den e ministerio cristian i den hopi otro área, nos tin cu mustra cu otro hende por confia nos palabra. Ta cierto cu ta mas fácil pa bisa cu pa haci cierto cosnan. E homber sabí a bisa: “Un multitud di hende lo proclamá cada un su mes bondad amoroso, pero un homber fiel, ken por hañ’é?” (Proverbionan 20:6) Si nos ta determiná, nos por ta fiel i cumplidó di nos palabra.

Bendicion Ricu di Parti di Dios

Ta muestra di desonrades pa haci un promesa falsu deliberadamente. Por compará esei cu skirbi un chek sin fondo. Pero cuantu recompensa i bendicionnan nos ta ricibí si nos cumpli cu nos promesanan! Si nos ta digno di confiansa, nos lo ricibí e bendicion di un bon concenshi. (Compará cu Echonan 24:16.) En bes di sinti nos molestiá cu sintimentu di remordimentu, nos ta sinti nos satisfecho i na pas. Ademas, dor di cumpli cu nos palabra, nos ta contribuí n’e unidad dje congregacion, cu ta dependé di confiansa mutuo. Dor di “papia e berdad” nos ta recomendá nos mes tambe como ministernan dje Dios dje berdad.—2 Corintionan 6:3, 4, 7.

Jehova ta cumpli cu su palabra, i e ta odia “un lenga falsu.” (Proverbionan 6:16, 17) Dor di imitá nos Tata celestial, nos ta hala mas cerca dje. Sigur anto, nos tin bon motibu pa cumpli cu nos promesanan.

[Nota]

[Plachinan na página 10]

Jefte a cumpli cu su promesa, maske esei tabata doloroso

[Plachinan na página 11]

Si bo a primintí di bolbe bek, prepará bon pa haci esei