Ken Su Promesanan Bo Por Konfia?

“E TEMPU ei, su promesanan tabata mes poderoso kuné; pero su echonan tabata meskos ku e ta awor, nulo.”—Rei Henry Ocho, di William Shakespeare.

Shakespeare a referí na e promesanan di e kardinal ingles Thomas Wolsey, kende tabatin hopi poder na Inglatera durante siglo 16. Algun hende lo bisa ku e deskripshon di Shakespeare ta pas ku mayoria promesa ku nan ta tende awe. Bes tras bes hende ta risibí hopi promesa pero masha tiki ta kumpli. P’esei, no ta difísil pa komprondé pakiko nan a kuminsá duda den tur promesa.

Desilushon Ta Abundá

Por ehèmpel, durante e konflikto teribel na Balkan den e dékada di 1990, Konseho di Siguridat di Nashonnan Uní a deklará ku e stat Bosnia na Srebrenica ta un “área safe.” E deklarashon ei a parse un garantia konfiabel ku a bini di un organisashon internashonal. Míles di refugiado musulman na Srebrenica a kere den e deklarashon ei. Sin embargo, finalmente e promesa di un lugá di refugio safe a resultá di ta un promesa bashí. (Salmo 146:3) Na yüli 1995, forsanan enemigu a djis hala e forsanan armá di Nashonnan Uní un banda i a poderá di e stat. Mas ku 6.000 musulman a disparsé i por lo ménos 1.200 sivil musulman a ser asesiná.

Den tur área di bida tin kantidat di promesa ku no ta kumpli. Hende ta sinti ku awendia nan ta ser bombardiá ku “un gran kantidat di propaganda falsu i engañoso” ku ta nèk nan. Nan ta keda desilushoná dor di “promesanan ku míles di polítiko ta hasi durante kampaña pero ku nan no ta kumpli kuné.” (The New Encyclopædia Britannica, Volúmen 15, página 37) Lidernan religioso den kua hende ta pone nan konfiansa i ku ta primintí di perkurá pa nan tou, ta abusá di nan den e manera di mas horendo. Asta riba e terenonan manera esun di edukashon i medisina—kaminda supuestamente e profeshonalnan ta ser dirigí dor di kompashon i interes den hende—algun a traishoná e konfiansa ku hende a pone den nan i a eksplotá òf asta asesiná esnan ku nan mester a kuida. P’esei no ta nada straño ku Beibel ta spièrta nos pa no kere tur kos!—Proverbionan 14:15.

Promesanan Ku Ta Kumpli

Klaru ku tin hopi hende ku ta kumpli ku nan palabra, asta ora ku esaki ta nifiká ku nan tin ku hasi hopi sakrifisio. (Salmo 15:4) Nan ta hende di ún palabra i nan ta kumpli kuné. Tin otronan ku ta primintí ku e mihó intenshon i ku sinseramente kier kumpli ku nan. Nan ta kla i dispuesto pa kumpli ku loke nan a primintí, pero simplemente nan no por. Sirkunstansia por stroba asta e plannan di mas noble.—Eklesiastés 9:11.

Sea kual sea e motibu, realidat ta ku hopi hende tin problema pa pone konfiansa den promesa di kualke persona. P’esei ta surgi e pregunta: Tin promesa ku nos por konfia? Sí. Nos por konfia e promesanan ku nos ta haña den e Palabra di Dios ku ta Beibel. Pakiko no analisá loke e siguiente artíkulo tin di bisa di e tópiko aki? Podisé lo bo yega n’e mesun konklushon ku miónes di otro hende a yega kaba, esta, ku nos por konfia e promesanan di Dios.

[Rekonosementu pa Potrèt na página 3]

AP Photo/Amel Emric