Jehova Ta Pidi Demasiado di Nos?

“Kico Jehova ta pidi bek di bo sino di ehercé husticia i stima bondad i sea modesto canando cu bo Dios?”—MIKEAS 6:8.

1. Kico por ta e motibu pakico algun persona no ta sirbi Jehova?

JEHOVA ta pidi algu di su pueblo. Pero despues cu bo lesa e palabranan mencioná ariba, citá for dje profecia di Mikéas, bo por wel concluí cu Dios su rekisitonan ta razonabel. No obstante, hopi hende no ta sirbi nos Magnífico Creador, i algun cu un tempu tabata sirbié a stop di haci esei. Pakico? Pasobra nan ta haña cu Dios ta pidi demasiado di nos. Esei ta berdad? Of por ta cu e problema ta sinta den e actitud cu un persona tin tocante loke Jehova ta rekerí? Un relato histórico ta duna perspicacia den e asuntu aki.

2. Ken Naman tabata, i kico Jehova su profeta a mand’é haci?

² E hefe militar sirio, Naman, tabata sufri di lepra, pero nan a bis’é cu na Israel tabatin un profeta di Jehova cu lo por a cur’é. Di manera cu Naman i su delegacion a biaha pa Israel, i finalmente nan a yega cas di Eliseo, profeta di Dios. En bes di sali for di su cas pa saludá su bishitante distinguí, Eliseo a manda un criá bisa Naman: “Bo tin cu baña shete biaha den Jordan pa bo carni bolbe na bo; i sea limpi.”—2 Reynan 5:10.

3. Na promé instante, pakico Naman a nenga di haci loke Jehova a rekerí?

³ Si Naman a cumpli cu e rekisito cu e profeta di Dios a declará, lo el a cura di un enfermedad repugnante. Pues, Jehova tabata pidi demasiado di dje? Bon mirá, no. Pero tog, Naman no a bai haci loke Jehova a rekerí. “Abaná i Farpar, e riunan di Damasco, no ta mihó cu tur e awanan di Israel?” el a protestá. “Mi no por baña den nan i sigur bira limpi?” Cu esei, Naman a bira bai rabiá.—2 Reynan 5:12.

4, 5. (a) Ki recompensa Naman a ricibí pa su obedencia, i con el a respondé? (b) Kico nos lo considerá awor?

⁴ Kico realmente tabata Naman su problema? E rekisito no tabata hopi difícil pa cumpli cuné. Naman su sirbidónan a bis’é cu tacto: “Si ta un cos grandi e profeta mes a papia cu bo, lo bo no a hacié? Cuantu mas, anto, awor cu el a bisa bo: ‘Baña i sea limpi’?” (2 Reynan 5:13) E problema tabata Naman su actitud. El a haña cu nan no a trat’é cu e dignidad cu el a merecé, i cu nan a pidié haci algu cu aparentemente el a considerá ineficas i humiyante. Sin embargo, Naman a respondé n’e conseho cu su sirbidónan a dun’é cu tacto i a baha shete bes den riu Jordan. Imaginá su goso ora “su carni a bolbe mescos cu e carni di un mucha homber chikitu, i el a bira limpi”! El a keda masha gradicidu. Ademas, Naman a declará cu for dje dia ei padilanti, lo e no adorá ningun otro dios cu no ta Jehova.—2 Reynan 5:14-17.

⁵ Atrabes di historia humano, Jehova a pidi di hende pa nan cumpli cu vários regulacion. Nos ta invitá bo pa considerá vários di esakinan. Segun cu bo ta haci esei, puntra bo mes con abo lo a reaccioná si Jehova a rekerí di bo pa haci e cosnan ei. Mas despues, nos lo examiná kico Jehova ta pidi di nos awe.

Loke Jehova A Rekerí den Pasado

6. Kico Dios a pidi dje promé pareha humano, i con abo lo a respondé n’e instruccionnan ei?

⁶ Jehova a instruí e promé pareha humano, Adam cu Eva, pa haña yu, someté e tera i tene dominio riba bestia. Tambe Dios a bendicioná e homber i su casá cu un hogar espacioso semehante na un parke. (Génesis 1:27, 28; 2:9-15) Pero tabatin un restriccion. Nan no tabatin mag di come di un cierto palu, unu entre e hopi palunan cu tabata pari fruta den e hofi di Eden. (Génesis 2:16, 17) Esei no tabata di mas pa pidi, no ta berdad? Abo lo no a cumpli cu smak cu un asignacion asina, cu e prospecto di biba pa semper den salú perfecto? Aunke un tentadó a presentá den e hofi, abo lo no a rechasá su argumento? I lo bo no tabata di acuerdo cu Jehova tabatin e derecho di imponé e solo restriccion simpel ei?—Génesis 3:1-5.

7. (a) Ki asignacion Noe a haña, i ki oposicion el a pasa aden? (b) Con abo ta mira loke Jehova a pidi di Noe?

⁷ Mas despues, Jehova a pidi di Noe p’e construí un arca como un medio pa scapa di un diluvio mundial. En bista dje tamaño inmenso dje arca, e tarea no tabata fácil, i probablemente el a topa cu hopi bofon i hostilidad ora di construyé. Tog, tabata ki un privilegio pa Noe cu e por a salba su famia di cas, pa no papia mes dje hopi animalnan! (Génesis 6:1-8, 14-16; Hebreonan 11:7; 2 Pedro 2:5) Si abo haña un asignacion asina, lo bo traha duru pa cumpli cuné? Of lo bo concluí cu Jehova ta pidi demasiado di bo?

8. Kico Dios a pidi Abraham haci, i kico e echo cu el a cumpli cuné a ilustrá?

⁸ Dios a pidi Abraham haci algu masha difícil. El a bis’é: “Tuma, por fabor, bo yu, bo único yu cu bo ta stima asina tantu, Isaac, i haci un biahe p’e tera di Moria i ofrec’é ei como un ofrenda kimá.” (Génesis 22:2) Como cu Jehova a yega di primintí cu Isaac, kende e tempu ei ainda no tabatin yu, lo a bini na yunan, esei a pone na prueba Abraham su fe den Dios su abilidad pa restorá Isaac na bida. Ora Abraham a haci intento pa sacrificá Isaac, Dios a scapa e yoncuman. E incidente aki a ilustrá cu Dios lo a ofrecé su mes Yu pa humanidad i despues resucit’é.—Génesis 17:19; 22:9-18; Juan 3:16; Echonan 2:23, 24, 29-32; Hebreonan 11:17-19.

9. Pakico Jehova no tabata pidiendo demasiado di Abraham?

⁹ Tin hende kisas ta pensa cu Jehova Dios tabata pidiendo demasiado di Abraham. Pero esei tabata e caso? Ta realmente un falta di amor di parti di nos Creador, kende por resucitá e mortonan, di pidi nos ser obediente na dje asta ora esaki nificá cu nos ta bai drumi temporalmente den morto? Jesucristo i su promé siguidónan no a pensa asina. Nan tabata dispuesto pa sufri di abusu físico, asta morto mes, pa por haci e boluntad di Dios. (Juan 10:11, 17, 18; Echonan 5:40-42; 21:13) Si circunstancianan exigí esei, abo lo ta dispuesto pa haci mescos? Considerá algun dje cosnan cu Jehova a rekerí di esnan cu a bai eens pa bira su pueblo.

Jehova Su Ley na Israel

10. Ken a primintí di haci tur loke Jehova a pidi di nan, i kico el a duna nan?

¹⁰ Abraham su desendientenan mediante su yu Isaac i su nietu Jacob, of Israel, a crece bira e nacion di Israel. Jehova a libra e israelitanan for di sclabitud den Egipto. (Génesis 32:28; 46:1-3; 2 Samuel 7:23, 24) Pronto despues di esei, nan a primintí di haci kico cu Dios a pidi di nan. Nan a bisa: “Tur loke Jehova a papia, nos ta dispuesto na haci.” (Exodo 19:8) Na armonia cu e deseo dje israelitanan pa laga Dios goberná nan, Jehova a duna e nacion mas cu 600 ley, incluso e Dies Mandamentu. Cu tempu, e leynan di Dios aki, duná mediante Moises, a bira conocí simplemente como e Ley.—Esdras 7:6; Lucas 10:25-27; Juan 1:17.

11. Kico tabata un dje propósitonan dje Ley, i kico ta algun regulacion cu a sirbi pa logra esei?

¹¹ Un dje propósitonan dje Ley tabata pa protehá e israelitanan dor di duna nan regulacionnan sano cu a trata cosnan manera moralidad sexual, transaccion comercial i cuido di yu. (Exodo 20:14; Levítico 18:6-18, 22-24; 19:35, 36; Deuteronomio 6:6-9) A duna nan reglanan riba con pa trata otro hende i tambe un persona su animalnan. (Levítico 19:18; Deuteronomio 22:4, 10) Rekisitonan cu tabatin di haber cu fiestanan anual i reunimentu huntu pa adoracion a yuda protehá e pueblo den sentido spiritual.—Levítico 23:1-43; Deuteronomio 31:10-13.

12. Kico tabata e propósito principal dje Ley?

¹² Apostel Pablo a mencioná un propósito principal dje Ley. El a skirbi: “El a ser agregá pa saca ofensa na cla, te ora e simia [Cristo] a yega na ken e promesa a ser hací.” (Galationan 3:19) E Ley a recordá e israelitanan cu nan tabata imperfecto. Lógicamente anto, nan tabatin mester di un sacrificio perfecto cu lo por a eliminá nan picánan completamente. (Hebreonan 10:1-4) Pues e intencion dje Ley tabata pa prepará e pueblo pa aceptá Jesus, kende tabata e Mesías, of Cristo. Pablo a skirbi: “E Ley a bira nos maestro cu a guia nos na Cristo, pa nos por ser declará hustu debí na fe.”—Galationan 3:24.

Jehova Su Ley Tabata Pisá?

13. (a) Con hende imperfecto a mira e Ley, i pakico? (b) E Ley di berdad tabata pisá?

¹³ Aunke e Ley tabata “santu i hustu i bon,” hopi a haña cu e tabata pisá. (Romanonan 7:12) Dor cu e Ley tabata perfecto, e israelitanan no por a cumpli cu su norma haltu. (Salmo 19:7) P’e motibu ei apostel Pedro a yam’é “un yugo cu ni nos antepasadonan ni nos no por a wanta.” (Echonan 15:10) Claro cu e Ley mes no tabata pisá, i e pueblo a beneficiá dor di obedec’é.

14. Cua ta algun ehempel cu ta mustra cu e Ley a sirbi un propósito sumamente beneficioso p’e israelitanan?

¹⁴ Por ehempel, bou dje Ley no tabata encarcelá ladron, ma e tabatin cu traha pa paga dòbel of mas cu esei pa cubri loke el a horta. Asina e víctima no a sufri pérdida, ni hende trahadó no a haña nan cu un carga pa sostené un sistema di prizon. (Exodo 22:1, 3, 4, 7) Alimento peligroso tabata prohibí. Si no cushiná carni di porco bon, e por tin trichinosis (un tipo di bichi), i carni di conenchi por tin tularemia (un tipo di bacteria). (Levítico 11:4-12) Mescos tambe, e Ley a sirbi como un proteccion dor di a taha hende di atendé cu cadaver. Si un persona a mishi cu un cadaver, e mester a laba su mes i tambe su pañanan. (Levítico 11:31-36; Númeronan 19:11-22) Mester a dera sushi humano, loke a protehá e pueblo contra plamamentu di microbio. Tog, ta te den siglonan recien numa científiconan a descubrí nan existencia.—Deuteronomio 23:13.

15. Kico a resultá di ta un carga p’e israelitanan?

¹⁵ E Ley no a exigí demasiado dje pueblo. Pero no por bisa mescos di hende cu a asumí e papel di interpretadó dje Ley. Relacioná cu e reglanan cu nan a imponé, A Dictionary of the Bible, editá pa James Hastings, ta comentá: “Tur mandamentu bíblico tabata rondoná pa un red di regulacionnan insignificante. . . . Asina a haci un intento pa trece tur caso imaginabel den cuadro dje Ley, i pa regulá cu lógica sin compasion henter e conducta humano mediante reglanan general estricto. . . . A suprimí e bos di concenshi; a neutralisá i sofocá e poder bibu dje palabra Divino bou di un monton di regla externo.”

16. Kico Jesus a bisa tocante e regla i tradicionnan pisá di lidernan religioso?

¹⁶ Jesucristo a denunciá lidernan religioso cu a imponé un monton di regla, bisando: “Nan ta mara carga pisá i ta pone nan riba scouder di hende, pero nan mes no kier move nan ni cu nan dede.” (Mateo 23:2, 4) El a mustra cu e regla i tradicionnan pisá cu hende a traha, incluso ceremonianan elaborá di limpiesa, a haci “e palabra di Dios inválido.” (Marco 7:1-13; Mateo 23:13, 24-26) Pero, asta promé cu Jesus tabata riba tera, maestronan religioso den Israel tabata malrepresentá loke Jehova realmente ta rekerí.

Loke Jehova Realmente Ta Pidi

17. Di con Jehova no tabata contentu cu e ofrendanan kimá dje israelitanan sin fe?

¹⁷ Jehova a bisa mediante profeta Isaías: “Ya mi ta hartá di ofrenda kimá di chubat’i carné i e sebu di animal gordá; i den e sanger di toro yong i lamchi machu i chubat’i cabritu mi no a haña deleite.” (Isaías 1:10, 11) Pakico Dios no a keda contentu cu e ofrendanan cu e mes a exigí den e Ley? (Levítico 1:1–4:35) Pa motibu cu e pueblo a trat’é cu falta di respet. P’esei, a spierta nan: “Laba boso mes; haci boso mes limpi; kita e maldad di boso tratonan for di dilanti mi bista; stop di haci malu. Siña haci bon; busca husticia; corigí e opresor; dicta fayo p’e huérfano di tata; defendé e causa dje biuda.” (Isaías 1:16, 17) Esaki no ta yuda nos comprendé loke Jehova kier for di su sirbidónan?

18. Kico realmente Jehova tabata pidi dje israelitanan?

¹⁸ Jesus a mustra kico realmente ta loke Dios kier. El a haci esei ora nan a puntr’é: “Cua ta e mandamentu mas grandi dje Ley?” Jesus a contestá: “‘Bo tin cu stima Jehova bo Dios cu henter bo curason i cu henter bo alma i cu henter bo mente.’ Esaki ta e mandamentu di mas grandi i esun primario. E di dos, semehante na dje, ta esaki: ‘Bo tin cu stima bo próhimo mescos cu bo mes.’ Henter e Ley i e Profetanan ta dependé dje dos mandamentunan aki.” (Mateo 22:36-40; Levítico 19:18; Deuteronomio 6:4-6) Profeta Moises a mencioná e mésun punto ora el a puntra: “Kico Jehova bo Dios ta pidiendo di bo sino teme Jehova bo Dios, pa asina cana den tur su camindanan i pa stim’é i sirbi Jehova bo Dios cu tur bo curason i cu tur bo alma; pa warda e mandamentunan di Jehova i su statutonan?”—Deuteronomio 10:12, 13; 15:7, 8.

19. Con e israelitanan a purba parce santu, pero kico Jehova a bisa nan?

¹⁹ Apesar di nan malecho, e israelitanan kier a parce santu. Aunke e Ley a rekerí pa nan yuna solamente riba e Dia di Expiacion anual, nan a cuminsá yuna cu frecuencia. (Levítico 16:30, 31) Pero Jehova a reprendé nan, bisando: “No ta esaki ta e yunamentu cu mi ta scoge? Los e buinan di maldad, los e banchinan dje bara di yugo, i manda esnan aplastá bai liber, i pa boso kibra na dos tur bara di yugo? No ta pa parti bo pan cu esun hambrá, i pa bo trece den bo cas esnan afligí cu no tin dak riba nan cabes? Pa, den caso cu bo mira un hende sunú, bo tap’é, i pa bo no sconde bo mes for di bo propio carni?”—Isaías 58:3-7.

20. Pa ki motibu Jesus a reprendé e hipócritanan religioso?

²⁰ E israelitanan hustu den nan mes bista ei tabatin mes problema cu e hipócritanan religioso na ken Jesus a bisa: “Boso ta duna e décimo dje yerbabuena i dje eneldo i dje comino, pero boso a pasa por haltu dje asuntunan di mas peso dje Ley, esta, husticia i misericordia i fieldad. Ta esaki ta e cosnan cu tabata obligatorio pa haci, tog sin pasa por haltu dje otro cosnan.” (Mateo 23:23; Levítico 27:30) E palabranan di Jesus no ta yuda nos comprendé kico realmente Jehova kier for di nos?

21. Con profeta Mikéas a resumí loke Jehova ta pidi i loke e no ta pidi di nos?

²¹ Pa clarificá loke Jehova ta rekerí i loke e no ta rekerí di nos, Dios su profeta Mikéas a puntra: “Cu kico lo mi presentá mi na Jehova? Cu kico lo mi buig dilanti Dios den haltura? Lo mi presentá mi cu ofrenda kimá, cu bisé di un aña di edad? Jehova lo keda contentu cu miles di chubat’i carné, cu decenas di miles di stroom di zeta? Lo mi duna mi yu primogénito pa mi rebeldia, e fruta di mi barica p’e picá di mi alma? El a bisa bo, o hende terenal, loke ta bon. I kico Jehova ta pidi bek di bo sino di ehercé husticia i stima bondad i sea modesto canando cu bo Dios?”—Mikéas 6:6-8.

22. Kico particularmente Jehova tabata kier di esnan cu tabata bou dje Ley?

²² Pues anto, kico particularmente Jehova a rekerí di esnan cu a biba bou dje Ley? Claro cu nan mester a stima Jehova Dios. Ademas, apostel Pablo a bisa: “Henter e ley ta keda cumplí den un dicho, esta: ‘Bo tin cu stima bo próhimo mescos cu bo mes.’” (Galationan 5:14) Di mes manera, Pablo a bisa e cristiannan na Roma: “Esun cu ta stima su próhimo a cumpli cu e ley. . . . Amor ta cumplimentu di e ley.”—Romanonan 13:8-10.

E No Ta Demasiado

23, 24. (a) Pakico nunca no mester ta di mas pa nos haci loke Jehova ta pidi di nos? (b) Kico nos lo considerá siguientemente?

²³ E clase di Dios amoroso, compasivo i misericordioso cu Jehova ta, no ta impresioná nos? Su Yu unigénito, Jesucristo, a bini na tera pa engrandecé Dios su amor, esta, pa laga hende sa con precioso nan ta pa Jehova. Pa ilustrá Dios su amor, Jesus a bisa di mofi insignificante: “Ningun di nan ta cai na suela sin conocimentu di boso Tata.” P’esei el a concluí: “No tene miedu: boso ta bal mas cu hopi mofi.” (Mateo 10:29-31) Siguramente, hamas mester ta demasiado pa nos haci loke sea un Dios asina amoroso pidi di nos!

²⁴ Sin embargo, kico Jehova ta pidi di nos awe? I pakico aparentemente algun hende ta pensa cu Dios ta exigí demasiado? Dor di examiná e preguntanan aki, nos lo mester por mira pakico ta un privilegio maraviyoso pa haci loke sea Jehova pidi di nos.

Bo Por Contestá?

◻ Pakico kisas algun hende ta nenga di sirbi Jehova?

◻ Con Jehova su rekisitonan a varia atrabes di añanan?

◻ Ki propósito e Ley tabatin?

◻ Pakico loke Jehova ta pidi di nos no ta demasiado?

[Plachi na página 18]

Regla cu hende a traha, manera ceremonia elaborá di limpiesa, a haci adoracion bira pisá