2000​—Un Aña Marcá?

TIN algu special cu aña 2000? Por lo general, hende cu ta biba den paisnan occidental ta consider’é como e promé aña dje di tres milenio. Hopi preparacion pa celebr’é ta tumando lugá. Ta instalando oloshinan electrónico inmenso pa conta e secondenan cu falta p’e milenio nobo manecé. Hende ta organisando fiestanan di gala pa bispu di aña nobo. Tantu pacusnan den pueblito como centronan comercial den stadnan grandi ta bendiendo flanel cu lemanan di fin di milenio.

Iglesianan, grandi i chikitu, lo uni cu otro den e festividadnan di henter aña. Na cuminsamentu di otro aña, ta e intencion pa Papa Juan Pablo II biaha pa Israel pa conducí católiconan romano den loke a ser yamá “Iglesia Católico Romano su celebracion di hubileo dje milenio.” Segun cálculo, entre dos miyon i mei pa seis miyon turista, tantu deboto como curioso, ta planeando pa bishitá Israel otro aña.

Pakico asina tantu hende ta planeando pa bishitá Israel? Papiando p’e papa, Roger Cardinal Etchegaray, funcionario di Vaticano, a bisa: “Aña 2000 ta un celebracion di Cristo i su bida den e pais aki. P’esei ta masha natural cu Papa ta bini aki.” Den ki manera aña 2000 ta conectá cu Cristo? Supuestamente, aña 2000 ta marca exactamente 2.000 aña cu Cristo a nace. Pero esei ta berdad? Nos lo mira.

Aña 2000 ta asta mas significativo pa miembronan di algun grupo religioso. Nan ta convencí cu denter di un aña asina, Jesus lo bolbe bek na ceru di Olijfi i lo bringa e bataya di Armagedon cu e buki di Revelacion ta papia di dje, den e vaye di Megido. (Revelacion 16:14-16) Anticipando e sucesonan aki, cientos di residente mericano ta bendiendo nan cas i mayoria di nan pertenencianan i ta mudando pa Israel. P’e beneficio di esnan cu no por bandoná nan cas, segun informe, un prominente evangelista mericano a primintí di transmití e regreso di Jesus na television, anto na color!

Den paisnan occidental, plannan pa introducí e di tres milenio ta intensificando. Sin embargo, hende den otro pais ta sigui cu nan actividadnan normal di tur dia. E hendenan aki—cu ta forma mayoria dje poblacion di mundu—no ta kere cu Jesus di Názaret tabata e Mesías. Ni nan no necesariamente ta aceptá e sistema di marca fecha cu P.C. of A.D.a Por ehempel, hopi moslim tin nan mes kalender. Pa nan, otro aña lo ta 1420, i no 2000. Moslim ta conta aña desde e fecha cu profeta Mohamed a hui for di Mecca bai Medina. Rond mundu hende ta usa, na tur, mas o ménos 40 diferente kalender.

Aña 2000 mester ta significativo pa cristiannan? Promé di januari 2000 ta realmente un dia di importancia special? Lo contestá e preguntanan aki den e siguiente artículo.

[Nota]