Pakico Hende Tin Miedu di Apocalípsis?

“PA DECADANAN caba fundamentalistanan cristian a bin ta profetisá cu tin un tipo di desintegracion di henter sociedad tras di porta,” segun Damian Thompson, un escritor riba religion, den e revista Time. “Awor, pa nan asombro, net e hendenan cu tabatin custumber di haci mofa di nan, no solamente ta tumando e senarionan aki mashá na serio, sino asta ta plama nan. Entre e hendenan aki tin programadó di computer, lider comercial i políticonan.” Thompson ta bisa cu miedu di un fayo mundial di computer na aña 2000 “a combertí personanan totalmente seglar den creyentenan improbabel di un milenio” cu tin miedu di yegada di desasternan manera “pánico masal, parálisis di gobiernu, bringamentu pa cuminda i avionnan cu ta dal den edificionan haltu.”

Loke ta haci e ansiedad general mas grandi ta e actividadnan inkietante di vários grupo religioso chikitu, hopi bes yamá “apocalíptico.” Na januari 1999, den un artículo titulá “Jerusalem i e Sirenanan di Apocalípsis,” e korant frances Le Figaro a bisa: “E servicionan di siguridad [israelí] ta calculá cu tin mas cu shen creyente den milenio ta warda e parousia of apocalípsis riba of banda di ceru di Olijfi.”

E 1998 Britannica Book of the Year ta contené un informe special riba “Cultonan di Huicio Final.” E ta mencioná entre otro, cultonan suicidio, manera Porta di Shelu, Tempel di Pueblo i e Orden di Tempel Solar, i Aum Shinrikyo (Berdad Supremo), cu na 1995 a organisá e atake di gas venenoso mortífero den e metro di Tokio, matando 12 hende i heridando miles. Resumiendo e informe aki, Martin E. Marty, profesor di religion na Universidad di Chicago, a skirbi: “Ta algu inspirador pa bira e página di kalender pa 2000—i esei casi sigur lo inspirá tur clase di profecia i movementu. Algun por bira peligroso. Lo no ta un tempu pa enfrentá cu muchu confiansa.”

Historia dje Miedu Apocalíptico

Apocalípsis, of Revelacion, ta nomber dje último buki den Bijbel, skirbí na fin di promé siglo E.C. En bista dje caracter profético i lenguahe sumamente simbólico dje buki aki, a cuminsá aplicá e adhetivo “apocalíptico” na un forma di skirbi cu a cuminsá hopi tempu promé cu a skirbi e buki bíblico di Revelacion. E simbolismo mitológico dje literatura aki ta bai bek te na Persia di antigwedad i asta promé cu e tempu ei. P’esei, The Jewish Encyclopedia ta papia di “e característica distintivo di Babilonia di mayoria dje elementonan mitológico incorporá den e literatura [hudiu apocalíptico] aki.”

Literatura hudiu apocalíptico a florecé for di cuminsamentu di siglo 2 P.E.C. te cu fin di siglo 2 E.C. Splicando e motibu tras dje skirbimentunan aki, un erudito di Bijbel a skirbi: “E hudiunan tabata dividí tur tempu den dos época. Tabatin e época actual aki, cu ta totalmente malu . . . P’esei, e hudiunan a warda riba e fin di cosnan manera nan ta. Tabatin e época pa bini cu lo mester tabata totalmente bon, Dios su época di oro den cua lo tabatin pas, prosperidad i husticia . . . Con e época actual aki mester a bira e época pa bini? P’e hudiunan, institucionnan humano hamas lo por a realisá e cambio. P’esei nan a spera riba e intervencion directo di Dios. . . . Nan a yama e dia di binida di Dios E Dia di Señor i esei lo tabata un tempu teribel di teror i destruccion i huicio cu lo tabata e dolornan di parto dje época nobo. Tur literatura apocalíptico ta trata cu e sucesonan aki.”

Miedu di Apocalípsis Ta Hustificá?

E buki bíblico di Revelacion ta papia di “e guera dje gran dia di Dios e Todopoderoso,” esta Armagedon, ora cu lo destruí e malbadonan, siguí pa un periodo di mil aña (tin bes yamá e Milenio) durante cua lo cera Satanas den abismo i Cristo lo husga humanidad. (Revelacion 16:14, 16; 20:1-4) Den Edad Medio, algun persona a comprendé e profecianan aki robes pasobra e católico “San” Agustin (354-430 E.C.) a declará cu e Milenio a cuminsá n’e nacementu di Cristo despues di cua lo a sigui e Huicio Final. Aparentemente Agustin no a pensa mashá riba tempu, pero segun cu aña 1000 tabata acercá, miedu a aumentá. Historiadónan no ta eens cu otro riba con grandi e miedu apocalíptico aki tabata den Edad Medio. Pa plamá cu e miedu ei tabata, a resultá sigur cu e no tabatin base.

Mescos awe, tin un miedu religioso i seglar cu aña 2000 of 2001 lo trece cuné un apocalípsis spantoso. Pero e miedu aki ta hustificá? I e mensahe cu e buki bíblico di Revelacion, of Apocalípsis, ta contené ta algu pa tene miedu di dje of, al contrario, ta algu cu nos mester tin speransa aden? Sigui lesa por fabor.

[Plachi na página 4]

Miedu di Apocalípsis den Edad Medio a resultá di ta sin base

[Credit Line

© Cliché Bibliothèque Nationale de France, Paris

[Rekonosementu pa Potrèt na página 3]

Maya/Sipa Press