Apocalipsis—Tene Miedu di Dje of Speransa den Dje?

“Awe apocalípsis no ta djis algu cu Bijbel ta pinta, sino el a bira un posibilidad masha real.”—Javier Pérez de Cuéllar, ex-secretario general di Nacionnan Uní.

E MANERA cu e figura importante ei di mundu a usa e palabra “apocalípsis” ta reflehá e manera cu mayoria hende ta comprend’é i mir’é den título di película i di buki, artículo di revista i informe di korant. E ta lanta imágennan di un cataclismo universal. Pero kico e palabra “apocalípsis” ta nificá realmente? I mas importante ainda, kico ta e mensahe cu e buki bíblico cu yama Apocalípsis, of Revelacion, ta contené?

E palabra “apocalípsis” ta bini di un término griego cu ta nificá “desvelá” of “revelá.” Kico e buki bíblico di Revelacion a revelá? Tabata exclusivamente un mensahe di calamidad, un anuncio di anikilacion sin ningun sobrebibiente? Ora a puntra historiadó Jean Delumeau, miembro di Institut de France, kico e ta pensa di Apocalípsis, el a declará: “Esei ta un buki di consuelo i speransa. Hende a dramatisá su contenido dor di enfocá riba su episodionan catastrófico.”

Iglesia dje Promé Siglonan i Apocalípsis

Con e promé “cristiannan” a mira Apocalípsis i e speransa cu e ta describí di Cristo su Reino di Mil Aña (Milenio) riba tera? E mésun historiadó a declará: “Ta parce mi cu e cristiannan dje promé par di siglonan, por lo general, a adoptá fe den e Milenio. . . . Entre e cristiannan dje promé siglonan cu tabata kere den e Milenio tabatin particularmente Papias, obispu di Hierápolis na Asia Menor, . . . San Justino, cu a nace na Palestina i cu a sufri como mártir na Roma rond di aña 165, San Ireneo, obispu di Lyons, cu a muri na aña 202, Tertuliano, cu a muri na aña 222, i . . . e gran escritor Lactancio.”

En cuanto Papias, cu segun informe a sufri martirio na Pérgamo na aña 161 of 165 E.C., The Catholic Encyclopedia ta declará: “Obispu Papias di Hierápolis, disipel di San Juan, a presentá como defensor di fe den e Milenio. El a afirmá di a ricibí su doctrina for di contemporáneonan dje Apostelnan, i Ireneo ta conta cu otro ‘presbiteriano,’ cu a mira i tende disipel Juan, a siña for di dje e creencia den Milenio como parti dje doctrina di Señor. Segun Eusebio . . . den Papias su buki, el a declará cu conviccion cu despues di e resureccion dje mortonan lo a sigui mil aña di un reino terenal visibel i glorioso di Cristo.”

Kico esaki ta bisa nos dje efecto cu e buki Apocalípsis, of Revelacion, tabatin riba e promé creyentenan? El a inspirá miedu of speransa? Interesantemente, historiadónan ta yama e cristiannan di promé ‘chiliasta,’ cu ta bini dje palabranan griego khí·li·a é·te (mil aña). Sí, hopi di nan tabata conocí p’e echo cu nan tabata kere den e Reino di Mil Aña di Cristo, cu lo introducí condicionnan paradísico riba tera. E único lugá den Bijbel cu ta mencioná specíficamente e speransa di Milenio ta Apocalípsis, of Revelacion. (20:1-7) Pues, en bes di spanta creyentenan, Apocalípsis a duna nan un speransa maraviyoso. Den su buki The Early Church and the World, profesor di historia di iglesia di Oxford, Cecil Cadoux, ta skirbi: “Aunke despues di tempu e punto di bista chiliasta a ser rechasá, pa basta tempu Iglesia a kere den dje. I algun dje autornan mas respetá tabata siña otro hende esei.”

Pakico A Rechasá e Speransa di Apocalípsis

Ya cu ta un echo histórico irefutabel cu hopi, si no ta mayoria, dje promé cristiannan a spera den Cristo su Reino di Mil Aña riba un tera paradísico, con bin “despues di tempu e punto di bista chiliasta a ser rechasá”? A surgi algun crítica hustificá pasobra, manera erudito Robert Mounce a señalá, “desafortunadamente, hopi chiliasta a duna rienda liber na nan imaginacion i a imaginá nan tur sorto di extremo materialista i sensual den e periodo di mil aña.” Pero por a corigí e puntonan di bista extremista aki sin rechasá e berdadero speransa di Milenio.

E medionan cu adversarionan a usa pa suprimí fe den e Milenio en berdad tabata sorprendente. E Dictionnaire de Théologie Catholique ta bisa di Cayo, miembro di clero romano (fin di siglo 2, principio di siglo 3), cu “pa por a vence fe den Milenio, el a rechasá rotundamente e autenticidad di Apocalípsis [Revelacion] i dje Evangelio di San Juan.” Mas aleu e Dictionnaire aki ta declará cu Dionisio, obispu di siglo 3 di Alehandria, a skirbi un tratado contra fe den Milenio cu “pa stroba esnan cu a pega n’e opinion aki di basa nan fe riba e Apocalípsis di San Juan, no a vacilá pa rechasá su autenticidad.” E oposicion malicioso ei contra e speransa di bendicionnan di milenio riba tera ta prueba di un influencia sutil cu tabata obrando den teólogonan dje tempu ei.

Den su buki The Pursuit of the Millennium (E Búskeda dje Milenio), profesor Norman Cohn ta skirbi: “Siglo 3 a mira e promé intento pa desacreditá creencia den Milenio, tempu cu Orígenes, tal bes e teólogo mas influyente di tur teólogo dje Iglesia antiguo, a cuminsá presentá e Reino como un suceso cu lo no a tuma lugá literalmente, sino solamente den alma di hende creyente.” Basando su mes riba filosofia griego mas bien cu riba Bijbel, Orígenes a rebahá e speransa maraviyoso di bendicionnan terenal bou dje Reino Mesiánico den un suceso incomprendibel “den alma di hende creyente.” Autor católico Léon Gry a skirbi: “E influencia predominante di filosofia griego . . . a ocasioná gradualmente e caida di ideanan chiliasta.”

“Iglesia A Perde Su Mensahe di Speransa”

Sin duda Agustin tabata e Tata di Iglesia cu a contribuí mas na mescla filosofia griego cu loke, pa su tempu, tabata solamente un aparencia di cristianismo. Na principio e tabata un defensor ferviente di fe den e Milenio, pero cu tempu el a rechasá tur idea di un futuro Reino di Mil Aña di Cristo riba tera. El a duna un nificacion simbólico trocí di Revelacion capítulo 20.

The Catholic Encyclopedia ta bisa: “Finalmente Agustin a bin carga e conviccion cu lo no tin un milenio. . . . E ta bisa nos cu e promé resureccion, over di cua e capítulo aki ta bai, ta referí n’e renacementu spiritual den bautismo; e sabat di mil aña, despues dje seis mil aña di historia, ta tur loke ta bida eterno.” The New Encyclopædia Britannica ta declará: “Agustin su creencia simbólico den Milenio a bira e doctrina oficial di iglesia . . . E reformadónan protestant di tradicionnan luterano, calvinista i anglicano . . . a keda firmemente pegá n’e punto di bista di Agustin.” Dje manera ei a priva miembronan di iglesianan di cristiandad dje speransa di Milenio.

Ademas, segun e teólogo suiso Frédéric de Rougemont, “dor di repudiá su fe inicial den e reino di mil aña, [Agustin] a causa daño incalculabel na Iglesia. Cu e peso grandi cu su nomber tin, el a aprobá un eror cu a priva [Iglesia] di su ideal terenal.” E teólogo aleman Adolf Harnack tambe tabata di opinion cu e rechaso di fe den e Milenio a priva pueblo comun di “e religion cu nan a comprendé,” reemplasando “e fe bieu i e speransanan bieu” cu “un fe cu nan no por a comprendé.” E misanan bashí djawe den hopi pais ta prueba palpabel cu hende tin mester di un fe i un speransa cu nan por comprendé.

Den su buki Highlights of the Book of Revelation (Puntonan Sobresaliente dje Buki di Revelacion), e erudito di Bijbel George Beasley-Murray a skirbi: “Pa gran parti debí n’e influencia inmenso di Agustin, i di otro banda p’e echo cu sectanan a adoptá fe den e milenio, católico i protestant a uni den nan rechaso di dje. Ora puntra ki speransa alternativo nan tin pa hende den e mundu aki, e contesta oficial ta: Absolutamente nada. Mundu lo ser destruí ora Cristo yega pa traha lugá pa un shelu i fiernu eterno den cua lo lubidá historia. . . . Iglesia a perde su mensahe di speransa.”

E Speransa Maraviyoso di Apocalípsis Ta Bibu Ainda!

Testigonan di Jehova di nan parti, ta convencí cu e promesanan maraviyoso en coneccion cu e Milenio lo ser realisá. Ora a entrevistá historiadó frances Jean Delumeau den un programa di television frances riba e tema “Aña 2000: Miedu di Apocalípsis,” el a bisa: “Testigonan di Jehova ta siguiendo exactamente e pensamentu di fe den e milenio, pasobra nan ta bisa cu pronto . . . nos lo drenta—en berdad, atrabes di cataclismo—den un periodo di 1.000 aña di felicidad.”

Esaki ta netamente loke apostel Juan a mira den un vision i a describí den su buki Apocalípsis, of Revelacion. El a skirbi: “Mi a mira un shelu nobo i un tera nobo . . . Cu esei mi a tende un bos fuerte for dje trono bisa: ‘Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.’”—Revelacion 21:1, 3, 4.

Testigonan di Jehova ta haciendo un trabou mundial di educacion bíblico pa laga mas tantu hende posibel brasa e speransa aki. Gustosamente nan lo yuda bo siña mas tocante dje.

[Plachi na página 6]

Papias a afirmá di a ricibí e doctrina di Milenio directamente for di contemporáneonan dje apostelnan

[Plachi na página 7]

Tertuliano a kere den Cristo su Reino di Mil Aña

[Rekonosementu]

© Cliché Bibliothèque Nationale de France, Paris

[Plachi na página 7]

“Dor di repudiá su fe inicial den e reino di mil aña, [Agustin] a causa daño incalculabel na Iglesia”

[Plachi na página 8]

E tera paradísico cu Apocalípsis ta primintí ta algu pa spera ansiosamente ariba