Ceru Atos​—Un “Ceru Santu”?

PA E mas cu 220 miyon miembronan di Iglesia Ortodox, ceru Atos, un elevacion di superficie brutu cu bista riba laman na parti nort di Grecia, ta “e ceru mas santu di mundu ortodox cristian.” Pa hopi di nan, un peregrinacion bai Atos, “e ceru santu,” ta un soño precioso. Kico e “ceru santu” aki ta? Con el a bira asina importante? Anto, ta n’e “ceru” ei hende cu ta teme Dios mester acudí pa guia spiritual i adoracion berdadero?

En berdad e expresion “ceru santu” ta aparecé den Bijbel. E ta conectá cu e adoracion santu, puru i elevá dje Dios berdadero, Jehova. Ceru Síon na antiguo Jerusalem a bira un “ceru santu” ora rey David a hiba e arca di pacto ei. (Salmo 15:1; 43:3; 2 Samuel 6:12, 17) Despues cu Sálomon a construí su tempel riba ceru Moria, e nomber “Síon” a bin incluí e sitio dje tempel tambe; asina Síon a sigui ta Dios su “ceru santu.” (Salmo 2:6; Joël 3:17) Dor cu e tempel di Dios tabata na Jerusalem, na algun ocasion nan a referí na e stad ei tambe como Dios su “ceru santu.”—Isaías 66:20; Daniel 9:16, 20.

Kico di awe? Ceru Atos, of cualkier otro ceru, ta e “ceru santu” cu hende mester basha bai na dje pa adorá Dios di un manera aceptabel?

Monasterionan Riba e “Ceru Santu”

Ceru Atos ta na e parti oost dje Península Calcidice, n’e punta di un faha smal di tera cu ta drenta Laman Egeo, net oost di caminda Tesalónica ta actualmente. E ta un ceru cu un punta impresionante, cu piedra di marmer, i cu ta subi steil te na un haltura di 2.032 meter riba nivel di laman.

Pa hopi tempu caba nan ta considerá Atos un lugá santu. Den mitologia griego e tabata e lugá caminda e diosnan tabata biba, promé cu ceru Olimpo bira nan cas. Algun tempu despues di Constantino e Grandi (siglo 4 E.C.), Atos a bira un lugá santu pa iglesianan cristian. Segun un leyenda, ora “bírgen” Maria, compañá pa Juan e evangelisadó, tabata biahando pa Chipre pa bishitá Lázaro, el a subi tera na Atos como resultado di un tormenta violento. Impresioná cu su bunitesa, Maria a pidi Jesus e ceru. Como resultado, Atos a bira conocí tambe como “Hofi dje Santísima Bírgen.” Pa meimei dje era Bizantino, henter e elevacion di piedra a bira conocí como e ceru Santu. Meimei di siglo 11 emperador Constantino IX Monomaco a adoptá i confirmá e título aki oficialmente.

Dor cu e ta un lugá brutu i isolá, Atos ta e tipo di lugá cu ta pas net bon pa practicá un estilo di bida liber di placer. Atrabes di siglonan, el a atraé hombernan religioso for di tur caminda dje mundu ortodox: griego, serbio, rumano, búlgaro, ruso i otronan. Nan a construí un cantidad di monasterio, cu nan misanan i comunidadnan. Como 20 di nan a keda te n’e dia djawe.

Ceru Atos Awe

Awe, Atos ta un region autónomo, cu un constitucion adoptá na 1926. Despues di a mengua pa añanan largu, awor e cantidad di ‘mónik’ a aumentá na mas cu 2.000.

Cada monasterio tin su propio red di hacienda, kapel i lugá di biba. E santuario máximo dje móniknan ta na e pueblo Karoúlia, haltu riba ceru Atos. Aki tin un grupito di cabaña cu bo por alcansá solamente via un laberinto di caminda di tera, trapi di piedra i cadena. Riba Atos, ainda e móniknan ta efectuá nan rutina di liturgia diario a base dje contamentu di ora estilo bizantino (dia ta cuminsá ora solo sali) i e calendario juliano (13 dia atras compará cu di nos, esun gregoriano).

Apesar cu nan ta bisa cu e sitio religioso aki ta debe su “santidad” na un hende muher, pa 1.000 aña caba su móniknan a declará cu henter e península ta teritorio prohibí pa tur forma di bida femenino, hende i bestia, ademas di cualkier homber eunuco of sin barba. Ultimamente nan a flexibilisá e regla tocante hende sin barba i algun bestia hembra, pero ainda ta estrictamente prohibí pa hende muher yega mas leu cu 500 meter for dje costa di Atos.

Un “Ceru Santu” pa Tur Hende

Ta ceru Atos ta e “ceru santu” cu cristiannan temeroso di Dios mester bini na dje pa adorá? Papiando cu un muher samaritano cu a kere cu mester a adorá Dios riba ceru Gerizim, Jesus a splica bon cla cu lo no apuntá ningun ceru literal como e lugá pa adorá Dios. Jesus di: “E ora ta bini den cua ni riba e ceru aki [Gerizim] ni den Jerusalem boso lo no adorá e Tata.” Di con? “Dios ta un Spiritu, i esnan cu ta ador’é mester adorá cu spiritu i cu berdad.”—Juan 4:21, 24.

Indicando nos tempu, profeta Isaías a profetisá cu un “ceru [simbólico] dje cas di Jehova” simbólico lo “bira firmemente establecí mas haltu cu e top dje cerunan,” i den un sentido figurativo, hende di tur nacion lo basha bai na dje.—Isaías 2:2, 3.

Homber i muher cu kier tin un relacion di aprobacion cu Dios ta ser invitá pa adorá Jehova cu “spiritu i cu berdad.” Miyones di hende rond mundu a haña e caminda pa e ‘ceru di Jehova.’ Nan, mescos cu otronan, ta pensa manera e abogado griego cu a bisa tocante Atos: “Mi ta duda cu spiritualidad ta cerá meimei di muraya of den monasterio.”—Compará cu Echonan 17:24.

[Kuadro na página 31]

Un Tesoro Scondí pa Hopi Tempu

Atrabes di siglonan, móniknan di Atos a acumulá un tesoro formá dor di, segun cálculo, 15,000 manuscrito. Supuestamente, algun di nan ta data for di siglo cuater, loke ta hacié un dje coleccionnan mas balioso na mundu. Tin rol, volúmennan completo i blachi los di e evangelionan, salmonan i canticanan religioso, ademas di pintura, ícono, estatua i obranan di metal masha bieu. Nan ta calculá cu un cuarta parti di tur manuscrito griego na mundu ta na ceru Atos, aunke falta pa catalogá hopi di nan corectamente ainda. Na 1997 pa promé bes e móniknan a permití pa exhibí algun di nan tesoronan na Tesalónica.

[Rekonosementu pa Potrèt na página 31]

Telis/Greek National Tourist Organization