E Israelitanan A Hasi un Promesa na Yehova

Mas o ménos dos luna despues ku e israelitanan a sali for di Egipto, nan a yega seru Sinaí. Einan, nan a habri nan tèntnan. Yehova a papia ku Moises, i Moises a subi e seru. Yehova a bis’é: ‘Mi a salba e israelitanan. Si nan obedesé mi i sigui tur mi mandamentunan, nan lo bira un pueblo spesial pa mi.’ Moises a baha for di e seru, i el a bisa e israelitanan loke Yehova a bis’é. Bo sa kiko nan a bisa e ora ei? Nan a bisa: ‘Nos lo hasi tur loke Yehova bisa nos pa hasi.’

Moises a bolbe subi seru Sinaí, i einan, Yehova a bis’é: ‘Denter di tres dia, lo mi papia ku bo. Bisa e pueblo tene kuidou pa nan no yega serka di seru Sinaí.’ Pues, Moises a baha for di e seru, i el a bisa e pueblo pa nan prepará nan mes pa tende loke Yehova tabatin di bisa nan.

Riba e di tres dia, e israelitanan a mira welek i nubia skur riba e seru. Nan a tende bos ta klap duru i zonido di kachu. Despues, Yehova, rondoná di kandela, a baha riba e seru. E israelitanan tabata tembla di miedu. Henter e seru tabata sagudí masha duru mes, i e tabata tur na huma. E zonido di kachu tabata bira mas i mas duru. Anto Dios a bisa: ‘Ami ta Yehova. Boso no tin mag di adorá niun otro dios.’

Moises a subi e seru atrobe, i Yehova a dun’é hopi lei pa e pueblo. E leinan ei a siña nan kon pa adorá Yehova i kon pa komportá nan mes. Moises a skirbi e leinan, i despues el a lesa nan pa e israelitanan. Anto nan a primintí: ‘Nos lo  hasi tur loke Yehova manda nos hasi.’ Pues asina nan a hasi un promesa na Dios. Pero nan lo a tene nan mes na e promesa ei?