Yehova Ta Duna Su Lei

RÒNT di dos luna despues ku e israelitanan a sali for di Egipto, nan a yega na Seru Sinaí, ku ta ser yamá Horèb tambe. Esei ta e mesun lugá kaminda Yehova a papia ku Moisés for di e mata na kandela. E pueblo a lanta un kampamentu i a keda ei pa un tempu.

Miéntras ku e pueblo tabata spera abou, Moisés a subi e seru. Na haltu riba tòp di e seru, Yehova a bisa Moisés ku E ke pa e israelitanan obedes’é i bira Su pueblo spesial. Ora Moisés a baha for di e seru, el a bisa e israelitanan loke Yehova a bisa. I e pueblo a bisa ku nan lo obedesé Yehova, pasobra nan ke bira su pueblo.

E ora ei Yehova a hasi un kos straño. El a laga huma sali for di tòp di e seru, i a laga bos zona duru. Tambe el a papia ku e pueblo i bisa: ‘Mi ta Yehova boso Dios kende a saka boso for di Egipto.’ Anto el a duna nan e mandamentu: ‘Boso no mag adorá ningun otro Dios fuera di mi.’

Dios a duna e israelitanan nuebe otro mandamentu, òf lei. E pueblo a sinti masha miedu. Nan a bisa Moisés: ‘Abo papia ku nos, pasobra nos tin miedu ku si Dios papia ku nos, nos por muri.’

Despues Yehova a bisa Moisés: ‘Subi bin serka mi riba e seru. Lo mi duna bo dos tabla di piedra riba kua mi a skirbi e leinan ku mi ke pa e pueblo warda.’ P’esei Moisés a subi e seru atrobe. El a keda ei pa 40 dia i 40 anochi.

Dios tabatin masha hopi lei pa su pueblo. Moisés a skirbi nan tur. Dios a duna Moisés e dos tablanan di piedra tambe. Riba nan Dios mes a skirbi e 10 leinan ku el a bisa henter e pueblo. Nan ta ser yamá e Dies Mandamentunan.

E Dies Mandamentunan ta leinan importante. Pero e kantidat di otro leinan ku Dios a duna e israelitanan tambe ta importante. Un di e leinan ei ta bisa: ‘Bo tin ku stima Yehova bo Dios ku tur bo kurason, ku tur bo mente, ku tur bo alma i ku tur bo forsa.’ I un otro ta bisa: ‘Bo tin ku stima bo próhimo meskos ku bo mes.’ Hesukristu, e Yu di Dios, a bisa ku eseinan ta e dos leinan mas grandi ku Yehova a duna su pueblo Israel. Mas despues nos lo siña hopi kos tokante e Yu di Dios i su siñansa.