Biba cu Riesgo

“No tin un solo cos cu bo por haci riba un dia comun i coriente, ni sikiera drumi, cu no ta asina peligroso cu e por resultá di ta e último cos cu bo ta haci.”—Revista Discover.

HENDE a yega di bisa cu bida ta manera cana dor di un campo di mina, pasobra lesion of morto por sosodé na cualkier momento, i hopi bes sin duna aviso. Cada pais tin su mes factornan di riesgo. Tin accidente di tráfico, guera civil, hamber, AIDS, cancer, enfermedad di curason i un cantidad di otro cos. N’e paisnan africano cu ta keda zuid di Sahara por ehempel, AIDS a bira e causa principal di morto. Den e paisnan ei, segun U.S.News & World Report, den un aña recien AIDS a “tuma bida di 2,2 miyon hende, 10 biaha e cantidad di morto debí na tur guera civil africano.”

Miéntras tantu, mundu ta gasta miles di miyones di florin pa prolongá bida i reducí riesgo di malesa i desabilidad. Hopi dje ideanan cu ta ser promové, manera come i bebe responsabel i haci ehercicio, por producí algun bon resultado. Sin embargo, tin un fuente di informacion confiabel riba tur faceta importante di bida cu por yuda bo gosa di un bida cu ménos riesgo, i mas sigur. E fuente ei ta Bijbel. Bijbel ta contené guia tocante con pa trata cu un variedad amplio di asuntu cu tin efecto riba nos salú i bienestar. Claro cu Bijbel no ta trata cada problema na un manera detayá. Pero e ta duna principionan excelente pa guia nos den asuntunan manera hábito di come, salú físico, actitud mental, sex, i tambe uso di alcohol, tabaco i droga, i hopi otro cos.

Bida di hopi hende ta cargá cu insiguridad financiero tambe. Riba e tereno aki tambe Bijbel ta auxiliá nos. Ademas di animá un punto di bista sabí di placa i di maneho di placa, e ta mustra con pa bo ta un mihó trahadó of dunadó di trabou. Den poco palabra, Bijbel ta un guia sano, no pa siguridad financiero i bienestar físico so, sino pa bida mes. Lo bo kier mira con práctico Bijbel por ta awe? Anto por fabor sigui lesa.