Pregunta di Lector

Den e hofi di Eden, con e colebra a comunicá na Eva e idea di violá e ley di Dios relacioná cu e palu di conocimentu di bon i malu?

Génesis 3:1 ta bisa: “Awor e colebra a resultá di ta esun mas cuidadoso di tur bestia salbahe di campo cu Jehova Dios a traha. Pues, el a cuminsá bisa e muher: ‘Di berdad ta asina cu Dios a bisa cu boso no mag come di tur palu dje hofi?’” Tin hopi punto di bista tocante con e colebra lo a comunicá cu Eva. Un di e opinionnan ta cu el a hacié mediante gesto di curpa of ademanes. Por ehempel, e pastor ingles Joseph Benson a bisa: “Tur cos ta mustra cu e tabata mediante un clase di seña. En berdad, algun hende a suponé cu e tempu ei colebra por a pensa i papia, . . . pero no tin prueba di esaki.”

Pero, dor di djis usa gesto di curpa, con e colebra por a comunicá na Eva e idea cu si e come for dje fruta prohibí e lo bira manera Dios, capas pa dicidí loke ta bon i loke ta malu? Ademas, Eva a participá den e combersacion i a contestá e pregunta cu e colebra a haci. (Génesis 3:2-5) E pensamentu di cu e colebra a comunicá solamente cu seña of gestonan di curpa lo nificá cu Eva a contest’é usando gestonan, miéntras cu Bijbel ta bisa cu Eva a papia.

Refiriendo na e incidente aki, apostel Pablo a spierta su compañeronan cristian: “Mi tin miedu cu di un of otro manera, mescos cu e colebra a seducí Eva dor di su astucia, boso mente por ser corumpí.” E peliger cu Pablo a papia di dje a bini di “apostelnan falsu, trahadónan engañoso.” E menasa cu e “apostelnan superfini” aki a representá no tabata limitá na gestonan di curpa i ademanes. Esei a sinta mas bien den nan forma di papia: palabranan astuto pa engañá otro hende.—2 Corintionan 11:3-5, 13.

Aunke comunicacion verbal a ser usá pa gaña Eva den e hardin di Eden, tog no tin ningun prueba cu e colebra literal tabatin stemband. Realmente e no tabatin mester di dje. Ora cu e angel di Dios a papia cu Balam mediante un buricu, e animal no tabatin mester di un órgano di abla complicá manera esun di un hende. (Númeronan 22:26-31) Ta bisto cu ora e ‘bestia di carga sin bos aki a expresá su mes cu bos di hende,’ e poder dje accion a bini for dje region di spiritu.—2 Pedro 2:16.

E criatura spiritual tras dje colebra cu a papia cu Eva ta ser identificá den Bijbel como “e colebra original, esun yamá Diabel i Satanas.” (Revelacion 12:9) Satanas, kende “ta sigui transformá su mes na un angel di lus,” ta fuente di e palabranan cu Eva a scucha i reaccioná ariba.—2 Corintionan 11:14.

[Plachi na página 27]

“Boso lo tin cu ta manera Dios, conociendo bon i malu”