Pregunta di Lektor

Si un persona kometé suisidio, un minister kristian lo por duna un diskurso di entiero?

Ta keda na kada minister kristian si su konsenshi ta pèrmitié duna un diskurso di entiero pa un persona ku aparentemente a kometé suisidio. Ora e ta tuma su desishon, e mester puntra su mes lo siguiente: Kon Yehova ta mira suisidio? Ta e persona mes a mata kurpa? Ta un trastorno mental òf emoshonal a hiba na e suisidio? Kon e komunidat lokal ta mira suisidio?

Komo kristian, nos ta interesá den Yehova su punto di bista di suisidio. Pa Yehova bida humano ta algu presioso i sagrado. (Génesis 9:5; Salmo 36:9) Un persona ku ta mata kurpa intenshonalmente ta kometé homisidio, i p’esei e ta desagradá Dios. (Éksodo 20:13; 1 Huan 3:15) Esei ta nifiká ku no por duna un diskurso di entiero pa esun ku a kometé suisidio?

Tuma por ehèmpel e kaso di Rei Saul di Israel. Ora el a realisá ku lo e no sobrebibí su bataya final kontra e filisteonan, en bes di sufri un morto humiante na man di su enemigunan, “Saul a kohe su spada i a tira su kurpa riba dje.” Ora e filisteonan a haña su kadaver, nan a peg’é riba e muraya dje stat di Bèt-san. Ora e habitantenan di Jabes-galat a haña sa kiko e filisteonan a hasi, nan a kita e kadaver i kim’é. Anto nan a kohe su wesunan i dera esakinan. Asta nan a yuna shete dia, lokual tabata un rito tradishonal dje israelitanan pa lamentá morto di un ser kerí. (1 Samuel 31:4, 8-13; Génesis 50:10) Ora David, e ungí di Yehova, a haña sa loke e habitantenan di Jabes-galat a hasi, el a bisa nan: “Ku SEÑOR bendishoná boso, pasobra boso a mustra e kariño aki na Saul, boso señor, i a der’é. I awor, ku SEÑOR mustra kariño i bèrdat na boso.” (2 Samuel 2:5, 6) E Skritura no ta duna ningun indikashon ku Dios a kondená e habitantenan di Jabes-galat pasobra nan a hasi loke por ser konsiderá un seremonia di entiero pa Rei Saul. Kompará esei ku e kaso di esnan ku no a haña un entiero pa motibu di nan malechonan. (Yeremías 25:32, 33) Un minister kristian lo por pensa riba e relato di Saul ora e ta disidí si e por duna un diskurso di entiero pa un persona ku a kometé suisidio.

Tambe e minister lo kier konsiderá e propósito di un diskurso di entiero. Distinto di hende ku ta kere den inmortalidat di alma, Testigunan di Yehova no ta dera nan defuntu ku e idea eróneo ku esaki a pasa pa un mihó mundu. E propósito prinsipal di e diskurso di entiero ta pa konsolá esnan ku a keda atras i pa duna un testimonio tokante e kondishon dje mortonan na esnan ku ta asistí. E diskurso no ta yuda e defuntu mes ku nèt nada. (Eklesiástes 9:5, 10; 2 Korintionan 1:3-5) Un otro motibu importante pa tene un diskurso di entiero ta pa yuda tur persona ku asistí reflekshoná riba kon kòrtiku bida ta. (Eklesiástes 7:2) E diskurso di entiero pa e persona ku a kometé suisidio lo kumpli ku e propósitonan aki?

Algun hende por sinti ku ta e persona mes a kita su bida intenshonalmente, kompletamente konsiente ku el a peka kontra Yehova. Pero ta posibel semper pa proba un sintimentu asina? Kisas e tabata un akto deskabeyá? Algun hende ku ta purba kometé suisidio ta kambia di pensamentu i no ta sigui ku nan intenshon. Despues di morto un persona no por repentí pa loke el a hasi.

Un otro faktor importante ta e trastorno mental i emoshonal enbolbí den hopi suisidio. E hendenan aki ta berdaderamente víktima di suisidio. Segun estadístika, 90 porshento di esnan ku ta kometé suisidio tin un òf otro problema mental, emoshonal òf di adikshon. Yehova lo pordoná hende ku ta mata kurpa den un kondishon mental asina? Nos no ta den un posishon pa husga si e defuntu a kometé un piká imperdonabel den bista di Yehova. Un minister kristian por tuma e sirkunstansianan i historia médiko dje defuntu na konsiderashon ora e ta puntra su mes si e por duna un diskurso di entiero pa e persona ku a kometé suisidio.

Tin un aspekto mas pa konsiderá: Kon hende den e komunidat ta mira e suisidio i e morto dje persona? Esaki ta spesialmente un punto di preokupashon pa e ansianonan ku ta interesá den e reputashon dje kongregashon lokal di Testigu di Yehova. Dependiendo dje komunidat su punto di bista relashoná ku suisidio, i partikularmente relashoná ku e kaso en kuestion, e ansianonan lo por preferá pa no duna nan respaldo públikamente na un entiero asina òf pa ten’é den Salòn di Reino.

No opstante, si e famianan pidi un minister kristian duna un diskurso, kisas e ta sinti ku e por hasi esei, pero no komo representante di kongregashon. Si e disidí di dal bai, e mester ta diskreto i no menshoná nada spesífiko den direkshon di un posibel resurekshon pa e persona ku a kometé suisidio. Kualkier futuro speransa pa e defuntu ta keda den man di Yehova, i ningun hende ta den posishon pa bisa si e defuntu lo haña un resurekshon òf nò. E minister por konsentrá riba e bèrdatnan bíbliko tokante morto i ofresé konsuelo pa esnan ku a keda na pena.