Kere den un Dios Ku Kisas Nos No Konosé
DI KADA tres hende na Alemania dos ta kere den Dios. Sin embargo, ora a pidi mas ku mil di nan pa duna un deskripshon di e Dios ku nan ta kere aden, kasi tur a duna un kontesta diferente. Segun e revista FOCUS: “Pueblo aleman ta konsistí di vários tipo di hende i asina tambe kada un tin nan ideanan tokante Dios.” Ounke riba su mes ta bon ku hende ta kere den Dios, no ta lamentabel pa kere den un Dios sin sa ken realmente e ta?
No ta na Alemania so hende ta insigur tokante e naturalesa òf persona di Dios; den otro paisnan europeo tambe ta eksistí e insiguridat ei. Un estudio ku nan a hasi na Gran Bretaña, Hulanda i Oustria a revelá ku por lo general hende ta di akuerdo ku Dios ta “un poder supremo òf un sekreto ku hende no por deskribí.” Foral pa hóbennan, asta pa esnan ku ta kere den Dios, e ta un misterio.
Abo Konosé Dios Personalmente?
Tin un diferensia grandi entre sa ken un persona ta i konos’é personalmente. Ora bo sa di un persona—manera den kaso di un monarka ku bo no por aserká, un super atleta òf un strea di sine—esei ta kuestion di djis rekonosé ku e persona ei ta eksistí. Sin embargo, konosé un persona personalmente ta nifiká hopi mas. E ta enserá konosé e persona su karakter, komportashon, sintimentunan, loke e ta gusta i loke e no ta gusta, i tambe su plannan pa futuro. Si bo konosé un persona personalmente, esei ta habri kaminda pa kultivá un relashon íntimo kuné.
Sientos di míles di persona a yega n’e konklushon ku solamente un idea vago di Dios—òf djis sa ku e ta eksistí—no ta sufisiente. Nan a bai hopi mas aleu dor di siña konosé Dios íntimamente. Nan a haña ku esei ta bale la pena? Un hòmber ku yama Paul, kende ta biba den e parti nort di Alemania i ku un tempu tabata djis kere aribariba den Dios, a disidí di siña konos’é mihó komo persona. Paul ta splika: “Pa bo konosé Dios bon ta tuma tempu i esfuerso, pero e rekompensa ta bale la pena. Ora bo tin un relashon íntimo ku e Kreadó, bo bida di tur dia ta bira mihó.”
Ta bale la pena tuma e tempu i hasi e esfuerso nesesario pa siña konosé Dios íntimamente? Sea asina bon di lesa e siguiente artíkulo.
[Plachi na página 3]
Tin un diferensia grandi entre sa ken un persona ta i konos’é personalmente