Ken Dios Ta?

Hopi hende ta bisa ku nan ta kere den Dios. Pero ora bo puntra nan ken Dios ta, bo ta haña diferente kontesta. Pa algun hende, Dios ta un hues kruel ku ta kla pa kastigá hende pa nan pikánan. I otronan ta bisa ku semper Dios ta amoroso i kla pa pordoná, sin importá kiko nos hasi. Ademas, tin otronan ku ta kere ku Dios ta hopi leu for di nos i ku e no ta interesá den nos. Debí na e diferente opinionnan ei, hopi hende kisas ta pensa ku ta imposibel pa haña sa ken Dios ta.

Ta importante pa haña sa ken Dios ta? Sí, pasobra ora bo siña konosé Dios mihó, bo bida ta haña mas sentido. (Echonan 17:26-28) I mas bo hala serka Dios, mas lo e stima bo i yuda bo. (Santiago 4:8) Anto, unabes ku bo siña konosé Dios bon, bo por haña bida eterno.​—Huan 17:3.

Kon bo por siña konosé Dios? Pensa un ratu riba un hende ku bo konosé bon, manera un bon amigu. Kon boso a bira bon amigu? Promé kos ku bo a haña sa ta su nòmber, i despues bo a haña sa, entre otro, ki personalidat e tin, loke e ta gusta i loke e no ta gusta, i tambe loke el a hasi i kiko e tin pensá di hasi. Pues, loke a atraé bo na e persona ta ku bo a siña konos’é.

Asina tambe, bo por siña konosé Dios ora bo haña kontesta pa e siguiente preguntanan:

• KON YAMA DIOS?

• KON DIOS TA?

• KIKO DIOS A HASI DEN PASADO?

• KIKO DIOS LO HASI DEN FUTURO?

• KI BENEFISIO LO BO HAÑA SI BO SIÑA KONOSÉ DIOS?

A prepará e revista akí spesialmente pa kontestá e preguntanan ei ku yudansa di Beibel. E artíkulonan lo yuda bo haña sa ken Dios ta. Pero no esei so, nan lo yuda bo tambe pa haña sa ki benefisio bo por haña si bo bira amigu di Dios.