Pregunta di Lektor

Kiko kier men ku un persona tin “bida den su mes”?

Beibel ta bisa di Hesukristu ku e tin “bida den su mes” i di su siguidónan ku nan ‘tin bida den nan.’ (Juan 5:26; 6:53) Sin embargo, e dos tekstonan bíbliko aki no tin e mesun nifikashon.

Hesus a deklará: “Meskos ku e Tata tin bida den su mes, asina el a duna e Yu tambe pa tin bida den su mes.” Promé ku Hesus a hasi e deklarashon remarkabel aki, el a bisa: “Di bèrdat, di bèrdat, mi ta bisa boso, esun ku tende mi palabra i kere esun ku a manda mi, tin bida eterno . . . E ora lo yega i ta awor, ku e mortonan lo tende e bos di e Yu di Dios, i esnan ku tende lo biba.” Aki Hesus tabata referí na un poder ekstraordinario ku e Tata a dun’é: e kapasidat di duna hende un posishon aprobá dilanti di Dios. Ademas, Hesus tin poder pa resusitá esnan ku ta drumí den morto i duna nan bida. Den kaso di Hesus, e echo ku e tin “bida den su mes” ta nifiká ku el a risibí e podernan aki. Meskos ku e Tata, e Yu tambe tin ‘den su mes e don di bida,’ ku ta un otro manera ku por tradusí e palabranan aki. (Juan 5:24-26) Kiko di su siguidónan?

Rònt di un aña despues, Hesus a bisa su oyentenan lo siguiente: “Di bèrdat, di bèrdat, mi ta bisa boso, si boso no kome e karni di e Yu di hende i bebe su sanger, boso no tin bida den boso. Esun ku kome mi karni i bebe mi sanger tin bida eterno, i lo mi lant’é den e último dia.” (Juan 6:53, 54) Aki Hesus a mustra ku e ekspreshon “tin bida den boso,” ta igual ku haña “bida eterno.” Den otro partinan di e Skritura Griego nos ta haña mas ekspreshon ku tin e mesun konstrukshon gramatikal ku esun di “bida den boso.” Dos ehèmpel ta: “Perkurá pa tin salu den boso mes” i “risibí den nan mes persona e kastigu meresí.” (Marko 9:50; Romanonan 1:27) Den e kasonan aki, e frase no ke men e poder pa duna salu òf duna kastigu meresí na otro hende. Mas bien, e ta referí n’e echo ku e persona ta kompletu di paden. Pues e ekspreshon “bida den boso mes” usá na Juan 6:53 simplemente ta nifiká haña bida den su forma kompletu.

Ora Hesus a referí na e echo ku su siguidónan tin bida den nan mes, el a menshoná su karni i su sanger. Despues, ora el a instituí e Sena di Señor, Hesus a bolbe papia tokante su karni i su sanger i a manda su siguidónan ku lo ta den e pakto nobo pa nan tuma di e emblemanan, esta, e pan sin zürdeg i biña. Pero esaki ke men ku ta solamente kristiannan ungí, ku ta den e pakto nobo ku Yehova Dios, ta haña bida den su forma kompletu? Nò. E dos susesonan menshoná aki a tuma lugá un aña despues di otro. Esnan ku a tende e palabranan di Hesus ku ta skirbi na Juan 6:53 i 54 no tabata sa di un selebrashon anual ku emblemanan ku a representá e karni i sanger di Kristu.

Segun Juan kapítulo 6, na promé instante Hesus a kompará su karni ku mana, bisando: “Boso tatanan a kome mana den desierto i nan a muri. Esaki ta e pan ku ta baha for di shelu, pa un hende por kome di dje i no muri. Ami ta e pan bibu ku a baha for di shelu; si un hende kome di e pan aki, e lo biba pa semper.” Hesus su karni, huntu ku su sanger, tabata mas grandi ku e mana literal. Den ki sentido? Den e sentido ku su karni a ser duná pa “bida di e mundu,” i asina a hasi bida eterno posibel.a P’esei, e deklarashon tokante tin “bida den boso” na Juan 6:53 ta apliká na tur hende ku ta haña bida eterno, sea den shelu òf riba tera.—Juan 6:48-51.

Na ki tempu e siguidónan di Kristu ta haña bida den nan mes, es desir, ta haña e plenitut di bida? Pa e herederonan ungí di Reino, esaki ta sosodé ora nan resusitá pa bida selestial komo kriaturanan spiritual inmortal. (1 Korintionan 15:52, 53; 1 Juan 3:2) Hesus su “otro karnénan” ta haña e plenitut di bida despues ku Hesus su Reino di Mil Aña terminá. Pa e tempu ei, nan lo a wòrdu poné na prueba, hañá fiel i deklará hustu pa bida eterno den Paradeis riba tera.—Juan 10:16; Revelashon 20:5, 7-10.

[Nota]

[Plachinan na página 31]

Tur kristian berdadero por tin ‘bida den nan mes’