Kasamentu Ku Ta Onorabel den Bista di Dios i di Hende

“Tabatin un kasamentu na Kana . . . Hesus ku su disipelnan tambe tabata kombidá pa e kasamentu.”—JUAN 2:1, 2.

1. Kiko nos por siña for di e relato tokante Hesus na Kana?

HESUS, su mama i algun di su disipelnan tabata sa di e goso ku un kasamentu onorabel entre sirbidónan di Dios por trese kuné. Kristu asta a duna realse na un kasamentu hasiendo su promé milager registrá einan, i asina a kontribuí na e goso di e okashon ei. (Juan 2:1-11) Kisas bo a yega di asistí i pasa ratunan agradabel na kasamentu di kristiannan ku kier a sirbi Yehova komo pareha felismente kasá. Òf tal bes bo mes tin pensá di kasa òf ta yudando un amigu òf amiga hasi su kasamentu un éksito. Kiko por kontribuí na esei?

2. Ki informashon Beibel ta duna enkuanto kasamentu?

² Kristiannan a ripará ku e konseho den e Palabra inspirá di Dios pa un hòmber i un muhé ku ta plania pa kasa ta masha probechoso. (2 Timoteo 3:16, 17) Ta bèrdat ku Beibel no ta bisa spesífikamente kon un kasamentu kristian mester tuma lugá. Esei ta komprendibel pasobra kada pais i kada époka tin su propio kustumbernan i asta rekisitonan legal. Por ehèmpel, den Israel di antigwedat, no tabatin un seremonia formal di kasamentu. Riba e dia di kasamentu, e brùidehòm simplemente tabata trese e brùit na su mes kas òf na kas di su tata. (Génesis 24:67; Isaias 61:10; Mateo 1:24, NW) Ku e akto públiko aki e pareha a duna di konosé ku nan a kasa. No tabatin e seremonianan formal ku sa tuma lugá den hopi kasamentu djawe.

3. Na ki evenemento Hesus a duna su kontribushon ora e tabata na Kana?

³ Pa e israelitanan, ku e akto di hiba e brùit na kas di e brùidehòm e kasamentu òf matrimonio a tuma lugá. Despues, kisas nan a tene un bankete pa selebrá e okashon. Juan 2:1 ta bisa: “Tabatin un kasamentu na Kana.” Pero un mihó tradukshon pa e palabra original ta “fiesta di kasamentu” òf “bankete di kasamentu.”a (Mateo 22:2-10; 25:10; Lukas 14:8) E relato ta mustra bon kla ku Hesus tabata presente na un fiesta en konekshon ku un kasamentu hudiu i ku el a duna su kontribushon na esaki. Ta bon pa nota sí ku e forma ku dos hende tabata kasa e tempu ei ta diferente for di loke ta komun awe.

4. Kon algun kristian ta opta pa kasa, i pakiko?

⁴ Awe, den hopi pais, ora un kristian ke kasa e mester kumpli ku sierto rekisitonan legal. Unabes e hasi esei, e por kasa den kualke manera ku lei ta permití. Esei por ta den un seremonia chikitu i simpel efektuá pa un hues, alkalde òf minister religioso outorisá pa gobièrnu. Algun kristian ta opta pa kasa den e forma ei. Kisas nan ta invitá algun famia òf amigu kristian pa ta presente komo testigu òf simplemente pa kompartí e goso dje okashon importante aki ku nan. (Jeremias 33:11; Juan 3:29) Podisé otro kristiannan ta preferá pa no tene un fiesta di kasamentu òf resèpsi grandi ku lo enserá bastante planiamentu i gastu. En bes di esei, tal bes nan ta pone un komementu simpel ku djis algun persona yegá na nan. Sea loke sea nos ta preferá personalmente, nos mester rekonosé ku otro kristiannan maduro por tin un punto di bista distinto for di esun di nos.—Romanonan 14:3, 4.

5. Pakiko hopi kristian ke tin un diskurso bíbliko ora nan ta kasa, i kiko e diskurso ei ta trese dilanti?

⁵ Mayoria pareha kristian ta opta pa tene un diskurso bíbliko na nan kasamentu.b Nan ta rekonosé ku ta Yehova a originá matrimonio i ku den su Palabra e ta duna konseho sabí riba kon un matrimonio por tin éksito i felisidat. (Génesis 2:22-24; Marko 10:6-9; Efesionan 5:22-33) Ademas, mayoria pareha ta deseá pa nan famia- i amigunan kristian tambe t’ei na e okashon gososo ei. Pero, kon nos tin ku mira e gran variedat di rekisito legal, prosedimentu i asta kustumbernan lokal establesí? E artíkulo aki lo analisá e situashon den vários region. Kisas algun di nan ta masha distinto for di loke abo konosé òf for di loke ta komun den bo área. No opstante, bo por tuma nota di sierto prinsipio- òf aspektonan general ku ta importante pa sirbidónan di Dios.

Un Matrimonio Onorabel Ta Kumpli ku Rekisitonan Legal

6, 7. Pakiko nos mester ta interesá den e aspektonan legal di matrimonio, i kon nos por manifestá esaki?

⁶ Ounke ta Yehova a originá matrimonio, personanan ku ta kasa mester kumpli tambe ku e rekisitonan di gobièrnu humano. Esaki ta na su lugá pasobra Hesus a bisa: “Duna Cesar loke ta di Cesar, i Dios loke ta di Dios.” (Marko 12:17) Meskos tambe, apòstel Pablo a duna e instrukshon: “Laga tur hende someté nan mes na e outoridatnan ku ta goberná. Pasobra no tin outoridat ku no ta di Dios, i esnan ku ta eksistí, ta Dios a establesé nan.”—Romanonan 13:1; Tito 3:1.

⁷ Den mayoria pais, Cesar, esta, outoridatnan sivil, ta determiná ken ta bini na remarke pa kasa. P’esei, ora dos kristian ku ta bíblikamente liber disidí pa kasa ku otro, nan ta kumpli debidamente ku e leinan lokal relashoná ku matrimonio. Kisas esaki ta enserá optené un pèrmit pa kasa via di un persona outorisá pa gobièrnu, i tal bes registrá e matrimonio despues ku esaki a tuma lugá. Tempu ku Cesar Augusto a saka un dekreto pa tur hende “registrá” nan mes, Maria ku Hosé a kumpli ku esei i a biaha bai Bètlehèm pa nan a “wòrdu registrá.”—Lukas 2:1-5.

8. Ki práktikanan Testigunan di Yehova ta evitá, i pakiko?

⁸ Ora dos kristian kasa ku otro den un manera legal i rekonosé, den bista di Dios e union ei ta definitivo. P’esei, Testigunan di Yehova no ta keda ripití e akto di matrimonio dor di tene vários seremonia legal, ni nan no ta renobá nan voto matrimonial, por ehèmpel, riba nan di 25 òf di 50 aniversario di boda. (Mateo 5:37) (Algun religion no ta rekonosé matrimonionan legalmente aprobá pa medio di un seremonia sivil komo válido. Nan ta pretendé ku e matrimonio no ta válido a ménos ku un pastor efektuá un rito di kasamentu òf deklará e pareha komo hòmber i muhé kasá.) Den hopi pais, gobièrnu ta outorisá un ansiano di Testigunan di Yehova pa kasa hende. Si ta eksistí e posibilidat ei, probablemente lo e deseá di hasi esei huntu ku un diskurso di matrimonio na Salòn di Reino. Esei ta e lugá lokal di adorashon berdadero i un sitio apropiá pa un diskurso tokante e areglo aki ku Yehova Dios a instituí.

9. (a) Den kaso di un matrimonio sivil, kiko un pareha kristian por opta na hasi? (b) Kon e ansianonan ta enbolbí den e plannan di kasamentu?

⁹ Den otro paisnan, lei ta rekerí pa un pareha kasa na un ofisina di gobièrnu, manera registro sivil, òf dilanti un ámtenar apuntá pa esei. Hopi bes kristiannan ta opta pa despues di e akto ofisial ei tene un diskurso di matrimonio na Salòn di Reino riba e mesun dia òf e siguiente dia. (Nan lo no ke laga muchu dia pasa entre e seremonia sivil i e diskurso bíbliko, ya ku tantu dilanti Dios komo dilanti hende, inkluso e kongregashon kristian, nan ta kasá.) Si un pareha ku ta bai kasa na registro sivil ta deseá di tin un diskurso na un sierto Salòn di Reino, nan mester pidi e ansianonan ku ta forma e Komité di Sirbishi di Kongregashon pèrmit pa esei promé. Ademas di konfirmá ku e pareha tin un bon reputashon, e superintendentenan aki lo sòru pa e ora di e kasamentu no interferí ku e reunionnan regular i otro aktividatnan programá na e salòn. (1 Korintionan 14:33, 40) Tambe nan lo analisá kon e pareha lo ke drecha e salòn, i disidí si lo hasi un anunsio tokante uso di e salòn.

10. Si e pareha mester kasa promé den un seremonia sivil, kiko lo mester tene kuenta kuné den e diskurso di matrimonio?

¹⁰ E ansiano ku ta duna e diskurso di kasamentu lo hasi esfuerso pa papia den un forma kariñoso, spiritualmente edifikante i ku dignidat. Si e pareha a kasa promé den un seremonia sivil, lo e splika ku nan a kasa kaba segun e lei di Cesar. Den kaso ku e seremonia sivil no a inkluí e voto matrimonial, kisas e pareha lo kier hasi esaki durante e diskurso.c Si e seremonia sivil ei a inkluí e voto matrimonial pero e pareha resien kasá ta deseá di hasi esaki dilanti Yehova i e kongregashon, nan lo present’é den forma di pasado (verleden tijd) mustrando asina ku ya nan ta ún kaba.—Mateo 19:6; 22:21.

11. Na sierto lugánan, kon un pareha ta kasa, i kiko mester bini dilanti den e diskurso di matrimonio?

¹¹ Na sierto paisnan, kisas lei no ta rekerí pa un pareha kasa den un seremonia, ni dilanti un representante di gobièrnu. E matrimonio ta tuma lugá na momento ku e pareha entregá na un ámtenar un formulario firmá di registrashon di matrimonio. E ora ei e ámtenar ta registrá e matrimonio. Den e manera aki e pareha ta wòrdu konsiderá komo esposo i esposa, i e fecha ku nan a entregá e formulario ta sirbi komo e fecha di nan matrimonio. Manera nos a menshoná kaba, kisas djis despues di e registrashon aki e pareha ku a kasa den e forma ei lo kier tin un diskurso bíbliko na Salòn di Reino. E ruman spiritualmente maduro ku nan a skohe pa duna e diskurso lo informá tur persona presente ku e pareha a kasa pa medio di e registrashon ku a kaba di tuma lugá. Si nan ta deseá di hasi nan voto matrimonial, esaki lo tuma lugá manera a keda deskribí den paragraf 10 i e nota na pia di página. Tur persona ku asistí na Salòn di Reino lo alegrá huntu ku e pareha i benefisiá di e konseho duná for di e Palabra di Dios.—Kantika di Salomon 3:11.

Matrimonionan Tradishonal i Sivil

12. Kiko ta un matrimonio tradishonal, i kiko ta konsehabel pa hasi despues di un matrimonio asina?

¹² Den algun pais, parehanan ta kasa den forma di loke por ser yamá un matrimonio tradishonal (òf di tribu). No ta trata aki di dos persona ku ta djis biba ku otro, ni di un akuerdo di konvivensia ku den algun pais ta duna e pareha sierto status pero ku no ta un matrimonio kompletamente legal.d Nos ta papiando aki di un matrimonio di dos persona ku ta kasa ku otro siguiendo un kustumber públikamente rekonosé di e tribu òf área en kuestion. Kisas esaki ta enserá e pago kompletu i aseptashon di un bruidsprijs, mediante kua e pareha ta legalmente i bíblikamente kasá. Gobièrnu ta mira e matrimonio tradishonal ei komo válido, legal i permanente. Despues di esei, por lo general ta posibel pa registrá e matrimonio tradishonal ku a tuma lugá, i ora e pareha hasi esei, nan por risibí un sertifikado ofisial. Registrashon por ofresé protekshon na e pareha òf na e esposa, si e bira biuda, i na e yunan ku nan lo por haña den futuro. E kongregashon lo urgi tur pareha ku a kasa den un forma tradishonal pa registrá nan matrimonio mas pronto posibel. Ta interesante pa nota ku aparentemente bou di e Lei di Moisés tabata registrá matrimonio i nasementu di yu ofisialmente.—Mateo 1:1-16.

13. Despues di un matrimonio tradishonal, kiko ta apropiá enkuanto e diskurso di kasamentu?

¹³ E pareha uní pa lei den un prosedimentu tradishonal ta bira esposo i esposa ora e matrimonio ei tuma lugá. Manera nos a menshoná kaba, kristiannan ku kasa legalmente asina lo ke tin un diskurso di matrimonio, inkluyendo voto matrimonial, na Salòn di Reino. Si esei tuma lugá, e oradó lo menshoná ku e pareha a kasa kaba na armonia ku e leinan di Cesar. Lo tin ún diskurso so asina. Ta ún matrimonio tin, den e kaso aki e matrimonio tradishonal (di tribu) válido pa lei, i ún diskurso bíbliko. Si e pareha mantené e dos kosnan ei mas serka di otro posibel, preferiblemente riba e mesun dia, esei lo yuda onra matrimonio kristian den e komunidat.

14. Kiko un kristian por hasi si tantu un matrimonio tradishonal komo sivil ta posibel?

¹⁴ Den algun pais kaminda matrimonio tradishonal ta ser rekonosé pa lei, tin tambe e posibilidat pa kasa den un forma sivil. Por lo general, un matrimonio sivil ta ser efektuá dilanti un ámtenar, i esei por inkluí tantu e hasimentu di voto matrimonial komo firmamentu di un registro. Algun pareha kristian ta preferá e matrimonio sivil aki en bes di esun tradishonal. Lei no ta eksigí pa efektuá tur dos; pa lei, kada un ta válido. Loke paragraf 9 i 10 a trese dilanti tokante un diskurso di matrimonio i voto matrimonial ta apliká aki tambe. E kos prinsipal ta pa e pareha kasa na un manera ku ta onorabel den bista di Dios i di hende.—Lukas 20:25; 1 Pedro 2:13, 14.

Mantené Onor den Matrimonio

15, 16. Kon onor mester ta un parti esensial di un matrimonio?

¹⁵ Ora a surgi un problema den e matrimonio di un rei di Persia, un konsehero prinsipal ku tabata yama Memukan a duna konseho ku por tabatin un efekto positivo, esta, ‘pa tur esposa duna onor na nan esposo.’ (Ester 1:20) Den matrimonionan kristian, esei no ta algu ku un rei humano tin ku dekretá; un esposa ta deseá di onra su esposo. Meskos tambe, un esposo kristian ta onra su esposa i ta elogi’é. (Proverbionan 31:11, 30; 1 Pedro 3:7) Nos no tin ku warda hopi aña pasa pa kuminsá onra nos matrimonio. Mester manifestá esei for di un prinsipio, sí, kuminsando for di riba e dia di kasamentu.

¹⁶ No ta e hòmber i muhé so—e esposo i esposa—mester mustra onor riba e dia di kasamentu. Si un ansiano kristian ta duna un diskurso di kasamentu, esei tambe mester reflehá onor. E diskurso mester ta dirigí na e pareha. Komo muestra di su onor na e pareha, e oradó lo evitá un presentashon humorístiko òf dichonan popular. E no mester inkluí komentarionan muchu personal ku por pone e pareha i e oyentenan sinti nan inkómodo. Mas bien, lo e hasi esfuerso pa papia na un manera kariñoso i edifikante, halando atenshon na e Originadó di matrimonio i Su konseho sobresaliente. Sí, e ansiano su diskurso presentá ku dignidat lo kontribuí na un kasamentu ku ta onra Yehova Dios.

17. Pakiko kasamentu kristian tin su aspekto legal kuné?

¹⁷ Probablemente bo a tuma nota di hopi punto tokante e detayenan legal di matrimonio den e artíkulo aki. Kisas algun aspekto no ta apliká direktamente den bo área. Sin embargo, nos tur mester ta konsiente ku ta masha importante pa kasamentu entre Testigunan di Yehova manifestá rèspèt pa leinan lokal, esta, pa e rekisitonan di Cesar. (Lukas 20:25) Pablo a urgi nos: “Duna tur hende loke boso debe nan: si boso ta debe belasting, paga belasting; si ta tributo, tributo; . . . si ta onor, onor.” (Romanonan 13:7) Sí, ta apropiá pa kristiannan, kuminsando for di e dia di kasamentu, mustra onor pa e areglo ku Dios ta permití te awor.

18. Ki otro aspekto opshonal di un kasamentu ta meresé atenshon, i unda nos por haña informashon riba e asuntu aki?

¹⁸ Hopi kristian ta pone despues ku nan kaba di kasa un reunion sosial, sea un fiesta di kasamentu, un komementu òf un resèpsi. Kòrda ku Hesus mes a bai un fiesta asina. Si ta bai tin un reunion sosial asina, kon e konseho di Beibel por yuda nos hasi sigur ku esaki tambe lo trese onor na Dios i reflehá faborablemente riba e pareha resien kasá i riba e kongregashon kristian? E siguiente artíkulo lo konsiderá e punto aki.e

[Nota]

Bo Ta Kòrda?

• Pakiko nos mester ta interesá den tantu e aspektonan legal komo spiritual di kasamentu?

• Si dos kristian kasa den un seremonia sivil, kiko nan por disidí di tin djis despues di esei?

• Ku ki propósito ta duna diskurso di kasamentu na Salòn di Reino?

[Plachi na página 18]

Den un kasamentu israelita di antigwedat, e brùidehòm tabata trese e brùit na su mes kas òf na kas di su tata

[Plachi na página 21]

Despues di un matrimonio tradishonal, kristiannan lo ke tin un diskurso na Salòn di Reino