Kaha di Pregunta

◼ Si un pareha ta deseá di usa Salòn di Reino pa nan kasamentu, ki asuntu nan tin ku konsiderá ku e ansianonan?

Kasamentunan ku ta ser organisá na armonia ku prinsipionan di Beibel ta trese onor pa Yehova. Esaki ta e kaso spesialmente ora ta trata di un kasamentu na Salòn di Reino, ya ku pa e komunidat, programanan ku ta tuma lugá einan ta un refleho di nos organisashon. Pues pa “tur kos sosodé korektamente i na un manera ordená,” ta na su lugá pa ansianonan lokal papia ku e pareha riba asuntunan ku tin di haber ku nan kasamentu, si esaki ta tuma lugá na e Salòn di Reino.​—⁠1 Kor. 14:⁠40.

Un pareha ku ta deseá di usa Salòn di Reino pa nan kasamentu mester manda un petishon por eskrito pa e komité di sirbishi di un kongregashon ku ta reuní na e salòn ei. Nan mester entregá e karta sufisiente tempu di antemano i e karta mester indiká e dia i e ora ku nan ta deseá di usa e salòn. Nan mester tene kuenta ku e ansianonan lo no kambia e reunionnan di kongregashon pa e kasamentu. Ademas, tantu e brùit komo e brùidehòm mester tin bon reputashon, bibando na armonia ku prinsipionan bíbliko i ku Yehova su normanan hustu.

Pa hasi sigur ku e kasamentu ta duna un bon impreshon di nos gran Dios, e pareha mester papia ku e komité di sirbishi tokante nan plannan promé ku nan tuma desishon final. Ansianonan lo no purba imponé nan preferensia personal, pero si tin kualke kos planiá ku no ta aseptabel, lo mester hasi ahuste. Por toka solamente e Melodianan di Reino òf kantikanan ku tin den nos buki di kantika. Pa dekorá Salòn di Reino òf kambia posishon di e stulnan tambe mester haña aprobashon di e komité. Si ke saka potrèt òf filma, esaki no mester rebahá e dignidat di e okashon. E ansianonan por permití un ensayo na Salòn di Reino basta esaki no ta interferí ku otro aktividatnan di kongregashon. No mester pega invitashon di kasamentu riba e bòrchi di informashon. Sinembargo, e ansianonan por hasi un anunsio breve durante e Reunion di Sirbishi pa informá e kongregashon tokante e diskurso di matrimonio ku lo bai tuma lugá na Salòn di Reino.

Ounke no ta un rekisito pa tur esnan ku ta sirbi kasamentu ta batisá, lo ta inapropiá pa inkluí hende ku ta hiba un bida ku ta kompletamente kontrario ku prinsipio bíbliko òf ku su kondukta lo por lanta pregunta den mente di e presentenan. Un ansiano mester duna e diskurso di matrimonio. Ansianonan ta maestronan eksperensiá di e Palabra di Dios, pues nan ta bon kapasitá pa resaltá prinsipionan bíbliko ku ta aplikabel na e okashon importante akí.​—⁠1 Tim. 3:⁠2.

Siendo ku e kasamentu ta duna un impreshon tambe di e ansiano ku lo duna e diskurso di matrimonio, e ruman akí mester ta debidamente informá tokante e areglonan relashoná ku e kasamentu. E lo tene un reunion ku e pareha pa informá tokante nan kondukta moral durante namorashon; e pareha mester ekspresá nan mes den un forma habrí i onesto. Si e brùit òf e brùidehòm tabata kasá anteriormente, e mester prueba ku e ta liber pa kasa, tantu den sentido bíbliko komo den sentido legal. (Mat. 19:⁠9) Esaki ta enserá mustra e ansiano un kopia di e akta di divorsio.

E kasamentu lo ta un okashon felis pa tur hende ora e pareha koperá i komuniká libremente ku e ansianonan.​—⁠Pro. 15:⁠22; Heb. 13:⁠17.