Kiko Ta Pasa Realmente ora un Hende Muri?

“Tur alma ta inmortal, asta alma di esnan malbado . . . Kastigu di kandela ku no por paga i e echo ku nan no ta muri, ta pone ku ta imposibel pa nan miseria [kaba].”​—Klemente di Alehandria, un eskritor di siglo 2 i 3 di nos era.

MESKOS ku Klemente, hende ku ta promové e siñansa di fièrnu di kandela ta asumí ku alma humano ta inmortal. Pero Beibel ta apoyá e siñansa akí? Wak kon e Palabra di Dios ta kontestá e siguiente preguntanan.

E promé ser humano, Adam, tabatin un alma inmortal? E tradukshon di Beibel Santu ta bisa tokante kreashon di Adam: “SEÑOR Dios a forma hende di e stòf di tera i a supla e rosea di bida den su nanishi; i hende a bira un ser bibu [òf “alma bibu,” King James Version].” (Génesis 2:7) Tuma nota ku e teksto akí no ta bisa ku Adam a haña un alma.

Kiko a pasa ku Adam despues ku el a peka? Dios no a sentensiá Adam na tormento eterno den fièrnu. Mas bien, Beibel Santu a tradusí Dios su sentensia na e siguiente manera: “Ku sodó di bo frenta lo bo kome pan, te ora bo bolbe na tera, pasobra for di dje bo a wòrdu tumá; pasobra stòf bo ta, i na stòf lo bo bolbe.” (Lèter skùin ta di nos; Génesis 3:19) Dios su deklarashon no ta indiká ku un parti di Adam a sigui biba ora el a muri. Ora Adam a muri, e alma, ku ta Adam mes, a muri.

Hende tin un alma inmortal? Dios a bisa profeta Ezekiel: “E alma ku peka lo muri.” (Ezekiel 18:4) Apòstel Pablo a skirbi: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Pues, si tur hende ta peka, anto lógikamente tur alma ta muri.

Un alma ku muri ta konsiente di algu òf por sinti algu? E Palabra di Dios ta bisa: “E bibunan sa ku nan lo muri, ma e mortonan no sa nada.” (Eklesiastés 9:5) Beibel ta deskribí loke ta pasa ku un hende ora e muri na e siguiente manera: “E ta bolbe na tera; e mes dia ei su pensamentunan ta peresé.” (Salmo 146:4) Si e mortonan “no sa nada” i nan “pensamentunan ta peresé,” kon nan lo por sinti ku nan ta ser tormentá den fièrnu?

Hesukristu no a kompará morto ku un forma di bida konsiente sino ku soño.a (Juan 11:​11-14) Pero kisas algun hende ta argumentá ku ta Hesus mes a siña hende ku fièrnu ta kayente i ku lo tira pekadó den fièrnu di kandela. Laga nos ban wak kiko Hesus a bisa realmente tokante fièrnu.

[Nota]