E Ta un Buki Manera Tur Otro?
“Henter e Skritura ta inspirá di Dios i ta probechoso . . . , pa e sirbidó di Dios por ta plenamente kompetente, kompletamente prepará pa tur bon obra.”—2 TIMOTEO 3:16, 17.
NO TA tur hende ta di akuerdo ku loke e teksto ei ta bisa. Kiko di abo? Kua di e siguiente deklarashonnan ta kuadra mas ku bo punto di bista di Beibel? E ta . . .
• un ekselente obra literario
• un di e vários bukinan sagrado
• un buki di leyenda ku ta kontené lès moral
• e Palabra di Dios
Pero loke bo ta pensa di Beibel ta importante? Wak kiko Beibel ta bisa tokante su mes: “Tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.” (Romanonan 15:4) Pues, segun Beibel, su propósito ta pa instruí i konsolá nos i a la bes duna nos speransa.
Awor pensa riba esaki: Si Beibel ta djis un obra literario òf un di e vários bukinan sagrado, lo bo sigui su guia i us’é pa instruí bo famia, siendo ku su mensahe ta distinto for di loke abo ta kere ta korekto? Òf si Beibel ta djis un kolekshon di mito, su promesanan lo por ta un fuente di konsuelo i speransa pa bo?
Miónes di hende ku a studia Beibel ta konvensí ku e ta un buki úniko, e Palabra di Dios. Kon bini? Dikon Beibel ta distinto for di tur otro buki? E siguiente artíkulonan lo trata sinku rasgo ku ta mustra ku Beibel ta un buki úniko. I nos ta animá bo pa analisá nan.