Pedro ku Ananías A Gaña—Ki Lès Nos Por Siña?

Manera bo sa, un mentira ta algu ku bo ta bisa ku bo sa ku no ta bèrdat. Abo a yega di gaña?—a Asta algun hende grandi ku ta stima Dios a yega di gaña. Probablemente bo sa di un persona den Beibel ku a gaña. Su nòmber ta Pedro, un di e 12 apòstelnan di Hesus. Laga nos wak a base di un relato bíbliko pakiko el a gaña.

Despues ku nan a arestá Hesus, nan a hib’é na kas di e sumo saserdote. Tabata despues di meianochi. Pedro a drenta den patio di e kas di e saserdote sin ku ningun hende a ripará ku t’e. Den e klaridat di un kandela, e kriá di e sumo saserdote ku a laga Pedro drenta a rekonos’é. El a bis’é: “Abo tambe tabata huntu ku Hesus.” Pedro, yen di miedu, a bisa ku e no tabata sa di kiko e kriá ta papia.

Beibel ta bisa ku mas despues “un otro mucha muhé a mir’é.” El a bisa: “E hòmber akí tabata huntu ku Hesus.” Pedro a bolbe nenga esei. Despues di un ratu, otronan a bai serka Pedro i a bis’é: “Abo tambe sigur ta un di nan.”

Pedro a haña miedu. P’esei, pa di tres biaha el a gaña, bisando: “Mi no konosé e hòmber ei!” Anto na e momento ei un gai a kanta. Hesus a bira wak Pedro, i Pedro a kòrda loke Hesus a bis’é un ratu promé: “Promé ku gai kanta, lo bo nenga tres biaha ku bo konosé mi.” E kos a dal Pedro asina duru ku el a yora amargamente.

Un kos asina por pasa ku bo?— Kisas bo ta na skol, anto bo ta tende e muchanan papia tokante Testigunan di Yehova. Un di nan ta bisa: “Nan no ta saludá bandera.” Un otro ta bisa: “Nan no ta bai guera pa defendé nan pais.” Un otro mucha ta bisa: “Nan no ta kristian, pasobra nan no ta selebrá Pasku.” I un di nan ta drei wak bo i puntra bo: “Abo no ta Testigu di Yehova?” Kiko lo bo bisa?—

Promé ku un kos asina sosodé, bo mester ta prepará pa duna un bon kontesta. Pedro no tabata prepará. Ora el a hañ’é bou di preshon, el a gaña! Sinembargo, e tabatin hopi duele di loke el a hasi, i Dios a pordon’é.

Ananías, un otro disipel di Hesus, tambe a gaña. Pero Dios no a pordoná ni é ni su kasá Safira. Safira a bai eens ku su kasá pa nan gaña. Laga nos wak dikon Dios no a pordoná Ananías ku Safira.

Dies dia despues ku Hesus a bai laga e apòstelnan i bolbe na shelu serka Dios, mas o ménos 3.000 hende a batisá na Herúsalèm. Hopi di nan a bini di paisnan leu pa selebrá e Fiesta di Pentekòste, i despues ku nan a bira disipel di Hesus, nan kier a keda un par di dia mas pa siña mas tokante nan fe nobo. Pues, algun disipel di Hesus a usa nan plaka pa perkurá pa e rumannan akí.

Ananías ku su kasá a bende algun propiedat pa haña plaka pa yuda esnan resien batisá. Ora Ananías a trese e plaka pa e apòstelnan, el a bisa ku esei tabata tur loke nan a haña pa loke nan a bende. Pero esei no ta bèrdat! El a keda ku parti di e plaka! Dios a laga Pedro haña sa di esaki, i Pedro a bisa Ananías: “No ta hende bo a gaña, sino Dios!” Anto Ananías a dal abou muri. Despues di mas o ménos tres ora, su kasá Safira a kana drenta. Sin sa kiko a pasa ku su kasá, e tambe a gaña i a dal abou muri.

Ki un bon lès esaki ta pa nos: Ta importante pa papia e bèrdat! Sí, nos tur tin ku siña e lès akí! Ma nos tur ta faya, foral ora nos ta yòn. Bo no ta kontentu ku Yehova stima bo i ku e ta pordoná bo meskos ku el a pordoná Pedro?— Pero kòrda, nos tin ku papia e bèrdat sí. I si un dia nos kometé e fayo grandi di gaña, nos mester pidi Dios pa e pordoná nos. Sin duda, esei ta loke Pedro a hasi, i Dios a pordon’é. Si nos hasi esfuerso pa no gaña mas, Dios lo pordoná nos tambe!