Ta Eksistí un Religion Ku Ta Digno di Bo Konfiansa?

Si un religion en partikular a desapuntá bo, kisas lo ta difísil pa bo konfia kualke religion. Pero bo por ta sigur ku ta eksistí un religion ku sí ta digno di bo konfiansa. Tempu Hesus tabata riba tera, el a reuní un grupo di fiel siguidó i a siña nan kon pa biba di akuerdo ku Dios su normanan. Te ainda bo ta haña berdadero siguidó di Kristu, esta, hende ku di kurason ta hasi esfuerso pa biba segun normanan kristian. Pero, ken nan ta?

Estelle, menshoná anteriormente, a bisa: “Ora m’a kuminsá studia Beibel ku Testigunan di Yehova, pokopoko pero sigur m’a siña komprondé e Palabra di Dios. No a dura hopi pa m’a komprondé e teksto di Huan 8:32 ku ta bisa: ‘Boso lo konosé e bèrdat, i e bèrdat lo hasi boso liber.’”

Ray tambe a bisa: “Ora m’a studia Beibel ku Testigunan di Yehova, m’a bin komprondé ku no ta Dios ta kousa sufrimentu di humanidat. Mi tabata kontentu ku m’a siña ku aunke Dios tin bon motibu pa permití maldat eksistí te ainda, e ta primintí ku pronto lo e kaba ku esaki.”

Ta bèrdat ku no ta fásil pa hasi loke ta bon den e mundu degenerá akí. Pero e ta posibel sí. Hopi hende tin gana di haña yudansa pa komprondé i apliká e siñansanan di Beibel. P’esei, Testigunan di Yehova ta kondusí estudio di Beibel grátis ku miónes di hende rònt mundu. Tur siman, un gran kantidat di hende ta haña sa kiko Beibel ta siña realmente. Komo resultado di esei, nan ta hala serka nan Kreador i ta logra hiba un bida mas felis.a

E siguiente biaha ku bo topa Testigunan di Yehova, puntra nan dikon nan ta konfia nan religion. Wak si nan siñansanan ta kuadra ku nan echonan. Anto disidí pa bo mes si ta eksistí un religion ku ta digno di bo konfiansa.