Religion i Moralidat

“M’a bai universidat ku hopi hóben ku a bisa ku nan ta religioso, pero tòg nan tabata spik i usa droga. Nan religion no tabatin ningun influensia riba nan bida.” Asina Sylvia, ku ta traha den salubridat, a bisa.

Un hòmber ku yama Lionel a konta: “Mi koleganan di trabou ta bèl bisa ku nan ta malu aunke nan ta bon-bon di salú. Nan tin nan religion wèl, pero e ta manera un muebel ku t’ei djis pa prònk.”

Religion no tin ningun influensia riba e norma- i balornan di nan miembronan. Hopi hende tin un “aparensia di ta deboto” ma “no ta demostrá e deboshon ei den nan bida.” (2 Timoteo 3:5) Nan lidernan religioso mes no a pone un bon ehèmpel, ni no a duna nan miembronan e konsehonan bíbliko nesesario pa nan por hiba un bida moralmente limpi. P’esei, no ta nada straño anto ku hopi hende ta pensa ku Dios no ta preokupá kon bo ta hiba bo bida.

KIKO BEIBEL TA SIÑA?

Beibel ta mustra ku Dios tin sintimentu i ku e ta masha interesá den nos kondukta. Ora Israel di antigwedat a rebeldiá kontra Dios, nan “a hasié tristu.” (Salmo 78:40) Di otro banda, tin gran “goso den shelu” ora un persona hasi berdadero esfuerso pa kambia su mal proseder. (Lukas 15:7) Ora un hende siña di e bunita kualidatnan di nos Tata selestial, su amor p’e lo krese i lo motiv’é pa stima loke Dios ta stima i odia loke Dios ta odia.—Ámos 5:15.

KIKO TESTIGUNAN DI YEHOVA TA HASI?

E korant Deseret News di Salt Lake City, Utah, Merka, a bisa di Testigunan di Yehova: “Nan ta promové lasonan familiar fuerte i ta yuda hende bira siudadano trahadó i onrado.” El a bisa mas aleu: “Nan miembronan ta kere den un norma moral haltu. Pa nan, humamentu, bebementu di mas, uso di droga, wega di plaka, sèks parotin i homoseksualidat ta práktikanan ku ta daña hende su relashon ku Dios.”

Mas Testigunan siña di Dios su personalidat, mas esei ta benefisiá nan. Kon asina? Wèl Sylvia, menshoná anteriormente, a bisa: “Riba tereno di salubridat, ta masha komun pa kometé froude. Pues ta fásil pa kai den e praktiká akí. Pero, e echo ku mi sa kon Yehovaa ta mira esaki ta yuda mi hasi loke ta korekto. Esei ta hasi mi kontentu i ta duna mi pas mental.” Sylvia ta konvensí ku su determinashon pa pega na su konvikshonnan religioso a yud’é bai dilanti den bida.