“Nos A Haña e Mesías!”

Shete shen aña despues ku Mikéas a profetisá ku e Mesías lo a nase na Bètlehèm, e profesia akí a kumpli. Un 30 aña despues, na aña 29 di promé siglo, e promé parti di e profesia di Daniel tokante e yegada di e Mesías tambe a kumpli. Hesus a batisá i Dios a ungié ku spiritu santu. Asina, e “desendiente,” e Mesías tan sperá, a yega nèt na e tempu stipulá!

Mesora Hesus a kuminsá prediká “e bon notisia di e Reino di Dios.” (Lukas 8:1) Manera Beibel a bisa di Hesus, e tabata un hòmber bondadoso i amabel, i e tabatin interes sinsero den hende. Ku amor el a siña nan lèsnan práktiko i el a kura “tur sorto di malesa i tur sorto di enfermedat” ku nan tabatin. Tur esaki a duna prueba ku e tabatin Dios su aprobashon. (Mateo 4:23) Hende di tur edat ku a aserká Hesus a yega na e mesun konklushon ku un di su disipelnan: “Nos a haña e Mesías!”—Huan 1:41.

Hesus a profetisá ku djis promé ku su Reino tuma mando kompleto lo tin guera, temblor i hopi otro difikultat. P’esei el a urgi tur su siguidónan pa “keda vigilá.”—Marko 13:37.

Hesus tabata un hòmber perfekto ku semper a obedesé Dios, pero e tabatin enemigunan ku despues a laga mat’é. Su morto a perkurá e sakrifisio perfekto ku por yuda nos haña bèk loke Adam ku Eva a pèrdè: bida pa semper den Paradeis.

Hesus su morto i tambe su resurekshon komo un kriatura spiritual poderoso a kumpli ku profesia. Despues ku Hesus a resusitá, el a aparesé na mas ku 500 di su disipelnan. Promé ku el a subi na shelu, el a manda su siguidónan pa hiba e bon notisia tokante dje i su Reino na “hende di tur nashon.” (Mateo 28:19) Te na ki grado nan a kumpli ku e asignashon ei?

​—Basá riba Mateo, Marko, Lukas, Huan i 1 Korintionan.