E Mentira Ku Dios Ta un Misterio

LOKE HOPI HENDE TA KERE

“E tres denominashonnan di mas grandi di religion kristian, esta, religion katóliko, òrtodòks i protestant ta kere den un Dios ku ta konsistí di tres Persona: Dios Tata, Dios Yu i Dios Spiritu Santu. Di akuerdo ku teologia kristian, esaki no ta nifiká ku nan ta kere den tres dios, sino ku e tres personanan akí ta básikamente ún dios.”​—The New Encyclopædia Britannica.

LOKE BEIBEL TA BISA

Hesus, e Yu di Dios, nunka a pretendé di ta igual òf di e mesun supstansia ku su Tata. Mas bien, el a bisa: “Mi ta bai serka e Tata, pasobra e Tata ta mas ku mi.” (Huan 14:28) Tambe el a bisa un di su siguidónan: “Mi ta subi bai serka mi Tata, ku ta boso Tata tambe, i serka mi Dios, ku ta boso Dios tambe.”​—Huan 20:17.

Spiritu santu no ta un persona. E kristiannan di promé siglo “a yena ku spiritu santu,” i Yehova a bisa: “Lo mi drama un poko di mi spiritu riba tur sorto di hende.” (Echonan 2:1-4, 17) Spiritu santu no ta parti di un Trinidat. E ta mas bien Dios su poder den akshon.

DIKON ESEI MESTER INTERESÁ BO

Segun e teólogonan katóliko Karl Rahner i Herbert Vorgrimler, ‘hende no por komprondé Trinidat sin revelashon, i ni despues di un revelashon nan lo no por komprond’é kompletamente tampoko.’ Bo por realmente stima un persona ku bo no por konosé ni komprondé? P’esei e doktrina di Trinidat ta stroba hende di konosé i stima Dios.

Marco, menshoná den e promé artíkulo, a mira Trinidat komo un barera entre é i Dios. El a bisa: “Mi a haña ku Dios tabata skonde su mes pa mi i esei a hasié mas misterioso i inaserkabel pa mi.” Sinembargo, “Dios no ta un Dios di konfushon.” (1 Korintionan 14:33, BS) E no a skonde su identidat pa nos. E ke pa nos konos’é. Hesus a bisa: “Nos ta adorá loke nos konosé.”​—Huan 4:22.

Marco a bisa: “Ora mi a siña ku Dios no ta parti di un Trinidat, finalmente mi por a kuminsá forma un relashon personal kuné.” Si nos mira Yehova komo un persona real i no komo un persona deskonosí i misterioso, ta bira muchu mas fásil pa stim’é. Beibel ta bisa: “Ken ku no ta stima no a siña konosé Dios, pasobra Dios ta amor.”​—1 Huan 4:8.