PREGUNTA KU BEIBEL TA KONTESTÁ

Dikon nos mester hasi orashon?

Yehova Dios ke pa nos sinti nos mes liber pa papia regularmente kuné tokante nos preokupashonnan. (Lukas 18:1-7) E ta skucha nos pasobra e ta interesá den nos. Komo ku nos Tata selestial ta invitá nos bondadosamente pa hasi orashon, bo no ta kere ku nos mester aseptá su invitashon?—Lesa Filipensenan 4:6.

Orashon no ta djis un medio pa pidi yudansa. Mas bien, orashon ta yuda nos hala serka Dios. (Salmo 8:3, 4) Ora nos ekspresá nos sintimentunan na Dios ku regularidat, nos ta krea un amistat mas será kuné.—Lesa Santiago 4:8.

Kon nos mester hasi orashon?

Ora nos ta hasi orashon, Dios no ke pa nos usa palabra grandi òf ripití orashon for di kabes. Tampoko e no ta eksigí pa nos ta den un posishon spesial. Yehova ta invitá nos pa hasi orashon di kurason. (Mateo 6:7) Por ehèmpel, den Israel di antigwedat, Ana a hasi orashon tokante un problema di famia ku a traha hopi kuné. Despues, ora ku su angustia a kambia bira goso, el a hasi un orashon di kurason pa gradisí Dios.—Lesa 1 Samuel 1:10, 12, 13, 26, 27; 2:1.

Ki un privilegio maravioso nos tin! Nos por aserká nos Kreador ku tur nos preokupashonnan. Tambe nos por alab’é i gradisié pa tur loke e ta hasi pa nos. Laga nos probechá anto di e privilegio presioso akí.—Lesa Salmo 145:14-16.