3 Yudansa pa Dil ku Problema

Tin sierto problemanan ku pa awor nos no por evitá ni resolvé. Por ehèmpel, si bo a pèrdè un ser kerí den morto òf si bo tin un malesa króniko, e úniko kos ku bo por hasi ta di buska un manera pa dil ku bo doló. Beibel por yuda bo den situashonnan asina?

MALESA KRÓNIKO

Rose ta bisa: “Mi tin un problema genétiko ku ta pone ku konstantemente mi tin doló fuerte. Mi kalidat di bida a bai atras drástikamente.” Un di su preokupashonnan di mas grandi tabata ku tin bes e no por a konsentrá ora e ta studia Beibel i otro asuntunan spiritual. Pero e palabranan di Hesus na Mateo 19:26 a yud’é hopi: “Pa Dios tur kos ta posibel.” Rose a haña sa ku tin mas ku ún manera di studia. Komo ku e dolónan ta asina fuerte, tin bes ta kasi imposibel pa e lesa, pero el a kuminsá skucha grabashon di Beibel i literatura bíbliko.a E ta bisa: “Mi no sa kon otro lo mi por a kuida mi relashon ku Dios.”

Ora ku Rose ta tristu pa motibu ku e no por hasi e kosnan ku e tabata por a hasi ántes, e ta haña konsuelo den e palabranan na 2 Korintionan 8:12: “Si e disponibilidat t’ei promé, loke un hende ta duna ta spesialmente aseptabel pa Dios ora esei ta segun loke e tin, no segun loke e no tin.” E palabranan ei ta rekordá Rose ku Dios ta kontentu ku loke e ta hasiendo, pasobra e ta hasiendo tur loke e por segun su sirkunstansia limitá.

TRISTESA

Delphine, kende nos a menshoná anteriormente, ta bisa: “Despues ku mi yu muhé di 18 aña a fayesé, e doló tabata asina profundo ku m’a kere ku lo mi no por sigui biba. Nada lo no ta meskos mas.” Pero el a haña gran konsuelo na Salmo 94:19, kaminda e salmista ta bisa Dios: “Den e multitut di mi preokupashonnan den mi, bo konsuelonan ta alegrá mi alma.” Delphine ta bisa: “Mi a hasi orashon na Yehova pa e yuda mi hasi kos ku lo yuda kalma mi doló.”

El a tene su mes okupá ku trabou boluntario. Ku tempu el a kuminsá kompará su mes ku kreit. Asta kreit kibrá bo por usa. Di igual manera, maske el a sinti ku e tabata kibrá, el a siña ku ainda e por a yuda otro hende. E ta kòrda: “Diripiente mi a realisá ku ora mi tabata usa prinsipio di Beibel pa konsolá mi studiantenan, Yehova tabata usa esei pa aliviá mi i konsolá mi.” El a traha un lista di personahe bíbliko ku a pasa den periodonan di tristesa profundo. Delphine a realisá esaki: “Sin eksepshon, nan tur tabata hende di orashon.” Tambe el a siña ku “bo no por haña kontesta si bo Beibel ta será.”

Delphine a siña algu mas ora e tabata studia Beibel. E mester a focus riba futuro, no riba pasado. E speransa ku Echonan 24:15 ta papia di dje ta konsolá Delphine: “Lo bai tin un resurekshon di tantu hende hustu komo inhustu.” Kon sigur e ta ku Yehova lo resusitá su yu? Laga Delphine mes kontestá: “Mi ta mira mi yu den futuro. Nos siguiente ‘sita’ ta marká kaba. Ta komo si fuera e ta riba mi Tata su kalènder. Kla kla mi ta mira ami ku mi yu den nos hòfi; mes kla ku ora mi a wak e i stim’é dia ku el a nase.”

a Tin hopi di e grabashonnan ei riba e website jw.org.

Beibel por yuda bo haña konsuelo asta den e tempu di mas difísil

KON DIOS POR YUDA NOS?

E kontesta ku Beibel ta duna ta masha kla. E ta bisa: “SEÑOR ta serka di tur esnan ku ta sklama na dje, serka di tur esnan ku ta sklama na dje den bèrdat. E lo kumpli ku e deseo di esnan ku ta tem’é; tambe e lo tende nan sklamashon i lo salba nan.” (Salmo 145:18, 19) Esei no ta animá bo? Pero, kon Dios lo kontestá orashon di hende ku sinseramente ta buska su guia?

E TA DUNA FORSA:

Hopi bes, problema por desanimá i agotá nos físikamente, emoshonalmente i spiritualmente. (Proverbionan 24:10) Pero Yehova “ta duna forsa na esun kansá, i e ta oumentá poder pa esun ku ta falta poder.” (Isaías 40:29) Apòstel Pablo, kende a pasa den prueba pisá, a bisa: “Pa tur kos mi tin forsa pa medio di esun ku ta duna mi poder.” (Filipensenan 4:13) Pablo a haña forsa mediante e spiritu santu di Dios. Abo tambe por pidi Dios duna bo spiritu santu.—Lukas 11:13.

E TA DUNA SABIDURIA:

Kiko si bo tin mester di yudansa pa komprondé i apliká konseho di Beibel? Disipel Santiago a skirbi: “Si un di boso falta sabiduria, lag’é sigui pidi Dios, i lo e dun’é esaki, pasobra e ta duna tur hende generosamente, sin tira na nan kara.” (Santiago 1:5) Bo por aktua di akuerdo ku bo orashonnan dor di lesa Beibel i apliká loke e ta siña. (Santiago 1:23-25) Segun ku bo ta hasi esei, lo bo siña personalmente kon sabí konseho di Beibel ta.

E TA DUNA NOS PAS:

Asta ora bo ta sufri di ansiedat pisá, Yehova por yuda bo kalma. Su Palabra ta bisa: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente pa medio di Kristu Hesus.” (Filipensenan 4:6, 7) Bo no ta kere ta un bon idea pa pidi Yehova duna bo pas?

Pero, awor kiko si bo no haña solushon lihé pa bo problemanan? No pensa mesora ku Dios a bandoná bo. Asta si bo problemanan persistí, Dios por duna bo kurashi i forsa pa bo perseverá. (1 Korintionan 10:13) Tambe Beibel ta primintí ku e tempu lo yega ora Dios lo resolvé nos problemanan pa semper!