Ora un Kasá Bira Infiel

“Mi kier a muri ora mi esposo a bisa mi ku e ta bai laga mi pa un mucha muhé mas yòn. Esei tabata hopi inhustu, spesialmente ora mi a kòrda riba e sakrifisionan ku mi a hasi p’e.”—Maria, Spaña.

“Ora mi esposa a bai laga mi, mi a sinti komo si fuera un parti di mi a muri. Tur nos soñonan i nos plannan a kaba na nada. Tabatin dia ku mi a sinti ku mi ansiedat a kita, pero despues mi tabata bolbe sinti mi masha deprimí.”—Bill, Spaña.

UN PERSONA por sintié hopi kibrá ora su kasá bira infiel. Ta bèrdat ku tin persona ta pordoná nan kasá i ta drecha nan relashon ku otro.a Pero sea ku nan relashon drecha òf nò, esnan ku deskubrí ku nan kasá tabata infiel ta sinti un doló inmenso. Kiko por yuda un persona trata ku e doló ei?

TEKSTO DI BEIBEL KU POR YUDA BO

Hopi hende ku a ser traishoná pa nan kasá i ku a sinti nan mes hopi kibrá a haña konsuelo den Beibel. Nan a haña sa ku Dios ta mira nan lágrimanan i ta sinti nan doló.—Malakías 2:13-16.

“Den e multitut di mi preokupashonnan den mi, bo konsuelonan ta alegrá mi alma.”—Salmo 94:19.

Bill a bisa: “Ora mi a lesa e versíkulo akí, mi a imaginá kon Yehovab ta konsolá mi meskos ku un tata amoroso.”

“Bo ta fiel pa esun ku ta fiel.”—Salmo 18:25, BPK.

Carmen, kende su esposo tabata infiel pa vários luna, a splika: “Mi kasá a traishoná mi. Pero mi tabata sa ku Yehova nunka lo no traishoná mi ni laga mi na kaya.”

“No sea anshá tokante nada; mas bien, den tur kos, pa medio di orashon i súplika . . . laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason.”—Filipensenan 4:6, 7.

Sasha a bisa: “Mi a keda lesa e versíkulonan akí bes tras bes. Mas mi a hasi orashon, mas mi a sinti e pas di Dios den mi bida.”

Tur e personanan ku nos a kaba di menshoná kier a entregá na sierto momento. Pero nan a konfia den Yehova Dios, i Beibel a duna nan forsa. Bill a ekspres’é asin’akí: “Mi fe a duna mi bida propósito ora tabata parse ku tur kos a basha den otro. Aunke pa un tempu mi a ‘kana den e vaye di sombra di morto,’ Dios tabata ku mi.”—Salmo 23:4.

a Pa haña mas informashon tokante si mester pordoná òf nò ora un kasá bira infiel, wak e seri di artíkulo den e ¡Despertad! di 22 di aprel 1999, “Cuando el cónyuge es infiel.”

b Beibel ta bisa ku Dios su nòmber ta Yehova.

Loke A Yuda Algun Hende

Meditá riba tekstonan di Beibel ku por animá bo.

Bill a splika: “Mi a lesa e buki di Yòb i despues e buki di Salmo, i mi a marka tur e partinan ku a pas ku mi sirkunstansia. Mi a ripará ku e hendenan ku mi a lesa di dje a eksperensiá e mesun tipo di doló i ansiedat ku ami tabata sinti.”

Skucha músika.

Carmen ta kòrda: “Ora mi no por a drumi anochi, mi tabata skucha músika. Esei a aliviá mi masha hopi mes.” Daniel a bisa: “Mi a siña toka guitara, i e músika a duna mi un pas mental.”

Deshogá bo mes.

Daniel a bisa: “Mi no tabatin e kustumber di papia tokante mi sintimentunan. Pero mi tabatin algun bon amigu, i mi a kòmbersá ku nan tur dia. Mi a laga nan sa kon mi tabata sinti. Mi a skirbi nan karta i mi tabata papia ku nan en persona. Esei a yuda mi hopi.” Sasha a bisa: “E yudansa di mi famia tabata hopi importante. Mi mama semper tabat’ei pa mi. Si mi mester a papia, semper e tabata kla pa skucha mi. Mi tata tambe a laga mi sinti mi safe i stimá, i el a yuda mi rekuperá pokopoko.”

Sigui hasi orashon.

Carmen a bisa: “Mi tabata hasi orashon konstantemente, i mi tabata sinti ku Dios ta band’i mi, skuchando mi i yudando mi. Durante e tempu duru ei, mi a hala mas serka di Dios.”